La Provincie di Udin e à deliberât 20 mil euros pes iniziativis di promozion e valorizazion de lenghe furlane

Al è di 20 mil e 300 euro il prin ripart di contribûts pal 2015 che la Provincie di Udin e da a sogjets publics e privâts par ativitâts di promozion de lenghe furlane.
La assegnazion, la prime di dôs pal an 2015 e poiade cun fonts propris di belanç, e je stade decidude de zonte di Palaç Belgrât su propueste dal president Pietro Fontanini.
“Cun cheste cifre, ancje se ridusude in confront ai agns prime, – al spieghe Fontanini — la Provincie e inten continuâ a dâ un sostegn reâl a chês ativitâts davueltis in lenghe furlane o dedicadis ae promozion de marilenghe, de storie e de culture furlane e des identitâts storichis.
Al è impuartant che a chestis realtâts a sedin destinâts fonts ancje di bande di ents publics par podê garantî la continuitât des progjetualitâts tal timp, par prudelâ la identitât furlane e la lenghe soredut daspò dai dâts sul câl dal 1% ad an dai residents in Friûl – Vignesie Julie che a fevelin la lenghe furlane, dât che al ven fûr te relazion dal plan gjenerâl di politiche linguistiche 2015 — 2019 proponût de ARLeF”. In merit al ripart stabilît de Provincie, “e je une volontât — al zonte Fontanini — di stimolâ e poiâ la promozion de nestre lenghe e culture midiant lis tantis iniziativis disvilupadis sul teritori, soredut des associazions”. Il contribût plui impuartant (5.000 euro) al è stât dât al “Istitût Ladin Furlan Pre Checo Placeran” pal sostegn te organizazion de Fieste dal Friûl 2015; 2.500 euro invezit ae associazion culturâl “Colonos” pe realizazion di un spetacul dedicât ae produzion poetiche par furlan, 1000 euros pe nestre riviste “La Patrie dal Friûl”.
Un contribût ancje pai “Cjastrons” pe realizazion di “Friûl Revolution- Scufiot Tv”, un format televisîf in sîs pontadis in lenghe furlane.
La tabele complete cun ducj i beneficiaris e je sul sît de Provincie (Delibare di zonte provinciâl n. 92 dai 25 di Mai dal 2015). ❚
Redazion