La politiche e scancele la “cuistion furlane”

Lu vevin za capît, ma dut ce che al bol inte cite de politiche di cheste disgraciade Regjon nol fâs che confermâlu: pai sorestants di Triest, zonte e consei, maiorance e oposizion, aromai il Friûl e je dome une “espression gjeografiche”. Par nissun di chei che a sentin dulà che si cjapin lis decisions a esistin un popul e une identitât furlans. Ducj a son aromai inneâts intal pantan di chel palût clamât “Io sono FVG”, inventât par gloti la anime plui antighe de int di chenti e par indreçâ furlans e triestins a deventâ fradis. Àno storiis diferentis? Po ben, cuntune sglavinade di bêçs si jude int, associazions e impresis a dismenteâ cui che si è.
◆ Tal non des cjadreis si dismentein ancje lis ideis. Par esempli, se il Friûl nol esist si pues ancje meti in bande l’autonomisim furlan che vie pal Nûfcent al à cirût di interpretâ lis resons e lis bisugnis dai furlans. In cheste gnove interpretazion fantastoriche e fantagjeografiche difindi la autonomie al significhe copâ chestis vecjis impostazions. Ma la domande e je une sole: bastial scancelâ la idee di Friûl par scancelâ ancje ducj i problemis de sô int? La “cuistion furlane“, par jessi muarte, e varès di jessi stade prin risolte. Invezit al è evident che nol è cussì.
◆ E somee la idee dal struç che al met il cjâf sot dal savalon. Fasint fente che i furlans no esistin, fasintju jentrâ intune altre grande “famee effevugine”, no saran plui “di bessôi”. A Triest al è cui che al pense a lôr cuntun sproc “regjonalist” funzionâl dome a consolidâ un sisteme bipolâr dulà che si fâs crodi che no si podedi cjatâ nissun spazi pussibil tra i Fratelli di Italia o i FratElly di Elly. O di cà, o di là.
◆ Ma isal pardabon cussì? Nissun al pues pensâ che nol sedi un lavôr dificil, e al è sigûr che a coventin agnorums, forsit gjenerazions, par fâlu. Ma in altris Regjons autonomis i moviments autonomiscj a son. A resonin intune maniere che i nestris sorestants di chenti a definissin egoistiche, etnocentriche e localiste: a esistin, e a vincin, ancje tal gnûf Mileni. No pretindin di cambiâ il mont, ma a van indenant pe lôr strade, cirint la poie di cui che al è al guvier par fâ pesâ i interès de lôr int. Ogni tant, ur capite ancje di vinci: cun sistemis eletorâi diferents, ma a vincin. Parcè? Parcè che la comunitât ju scolte e ju riten crodibii, stant che a fevelin la lôr lenghe e a scoltin la lôr int.
◆ In cheste Regjon invezit al è il contrari, e je la int che e à di scoltâ… la politiche. I furlans a àn di capî che inte modernitât la tension des bataiis di Tessitori, dal Moviment Friûl, e plui di resint dai Cecotti e dai Strassoldo, e va metude in bande, anzit sul cjast. La soluzion dal gnûf mileni no je plui l’autonomisim ma il regjonalisim. Che al dopre la autonomie dome cuant che i covente par sostignî lis sôs iniziativis, ma si plate daûr di un dêt cuant che i si domande parcè che in Italie o in Europe i moviments autonomiscj a puartin simpri la vôs di un popul.
◆ “La Patrie dal Friûl” e continue a crodi che al esisti un popul furlan. E fin cuant che al sarà, e à voie di jessi la “vôs dai furlans che no si rindin”, nancje cuant che l’autonomisim al somee muart. In timps plui dificii di chescj, in timps di vuere e distruzion di ogni identitât, Pier Pauli Pasolini al à scrit sul Stroligut tal Avrîl dal 1944, “Al vegnarà ben il dì che il Friul si inecuarzarà di vei na storia, un passat, na tradision!”. Chel dì forsit nol è ancjemò rivât, ma nô o sin convints che al vignarà. O lavorìn par dâ cussience ai furlans, no par gjavâje. Par lâ daûr dai nestris vons, no par dineâju. Par dâ un avignî a cheste tiere, no par fâle paronâ di chei altris. ❚