LA POESIE. Viarte (1911)

Il vert dai arbui, tenar, al traspâr:
come un velût si tenz plui scûr, plui clâr.
La lûs ca e là s’indore su lis fueis
fra i arbui ‘l è un incjant di maraveis
e sore chest biel vert spiche sul rest
il cîl, l’imensitât di un biel celest.
Dut ‘l è trancuîl, no je ombre di nûl,
scuindût tes frascjis cjante il rusignûl
Celso Cescutti (Argeo) (1877-1966). Origjinari di Flaiban, al à vude une vite ritirade. La sô poesie e je simpri vuidade di un fuart sintiment de nature. Oparis: Primevere (1911), Roses di pradarie (1921), Nêf e fantasiis, realtât e poesiis (1929) e Inzalidis d’autun lis fueis ‘a colin (cence date).
Pasolini al à vude preseade la sô ‘fuarce espressive elementâr’ e al à inseridis sôs lirichis inte sô Antologjie di poesie dialetâl dal Nûfcent, publicade intal 1952.
par cure di Laurin Zuan Nardin