Sfuei Mensîl Furlan Indipendent
Archivi de Patrie

LA POESIE. L’an invecjât è fat agonizant

............

L’an invecjât è fat agonizant,
Ridot al pont ducuant ingrizignît,
Ju miedis ducj lu dan par ispedît,
E Sant Silvestri i puarte il Vueli sant:
Ma però se ben mûr, intun istant
Rinàs plui fuart, e plui rinvigorît,
E fra pôcs dîs dut plen di flôrs guarnît,
Farà pompe di sé biele, e galant.

Ermes di Colorêt (1622- 1692).
Al jere un nobil nassût intal cjascjel di Colorêt di Montalban. Daspò di vê vivût li dal granduche di Toscane e inte cort di Viene e di vê fate la vuere, al si ritirà intai siei possidiments di Guriz, dongje Codroip, par cirî la trancuilitât che tant i plaseve. Lis sôs poesiis furlanis a son stadis studiadis di Rienzo Pellegrini che al à buride fûr une edizion critiche. Cualchidune e je ancje metude in musiche e cjantade di Lino Straulino.
par cure di Laurin Zuan Nardin