Al tiermin di un lavôr preparatori lunc e di une ancjetant lungje gjestazion, intal 2018 la Pitina e à otignût la protezion europeane de Igp (Indicazion Gjeografiche Protete). Dopo dal persut di San Denêl Dop e di chel di Sauris Igp, al è il tierç prodot di cjar “ecelent” tutelât dal Friûl- Vignesie Julie. Une risorse buine pe economie e pal turisim dai cjanâi de mont pordenonese dulà che par tradizion si prodûs la “polpete dal braconîr”. O torni sul teme par contâ lis modificazions resintis sul Dissiplinâr di produzion fatis buinis tal Zenâr dal 2023 de Union Europeane.
◆ Al è stât cambiât il limit ametût dal contignût di sâl (<5,3%), corezint un erôr di batidure de prime version dal Dissiplinâr.
Al è stât cambiât il contignût di proteinis (<38%) par vie dal ûs di une materie prime, la cjar, che vuê e à carateristichis diviersis a pet di chê tradizionâl, doprade une volte.
A son stadis ancje descritis miôr lis operazions di suiadure e di fumadure che a coventin pe produzion de Pitina Igp.
Conservants necessaris?
Ma, soredut, l’ûs dai conservants chimics, tant che i nitrîts (E249, nitrît di potassi; E250, nitrît di sodi) e i nitrâts (E251, nitrât di sodi; E252, nitrât di potassi), al è stât rindût facoltatîf (prime la zonte e jere in pratiche obligatorie). Chest mi console, viodût ancje che al jere stât un dai doi temis tratâts intal gno curt intervent fat in ocasion de audizion publiche, un dai passaçs obleâts di ogni Dissiplinâr intal iter par otignî la protezion europeane. Di là di chest, in tancj miei altris intervents passâts o ai sostignût la idee che, almancul intai prodots tipics e tradizionâi, si evitassin chestis zontis che no simpri a coventin, e che tancj studiôs e agjenziis internazionâls lis calcolin danosis pe salût umane.
Conservants danôs?
L’ultin alarme, in ordin di timp, al è stât lançât di un grup di ricercjadôrs, vuidât di Chris Elliott Obe, che a àn fat un studi te Queen’s University di Belfast (Irlande dal Nord). Alimentant surîs cul 15% di cjars lavoradis che a contegnin nitrîts, i roseadôrs a àn disvilupât il 75% in plui di tumôrs a pet des surîs alimentadis cun cjar di purcit cence conservants. la Organizazion Mondiâl de Sanitât e veve individuât za i nitrîts tant che cause di 32 mil câs di tumôr intestinâl ad an. Ancje la Autoritât europeane pe sigurece alimentâr (Efsa) cun sede a Parme, di resint e à esprimût un parê inzornât, che al domande di ridusi i nivei di nitrîts intai aliments, tignût cont dai problemis pe salût che a compuartin.
Duncje, ben che e vegni cheste gnove version de Pitina plui in linie cu la tradizion, cu lis propuestis europeanis e cu la tutele de salût dai consumadôrs, che ur reste il compit di no pierdi il “vizi” di lei lis etichetis prime di fâ i acuiscj. ❚
