Sfuei Mensîl Furlan Indipendent
Archivi de Patrie

La pescje tradizionâl si candide a “Patrimoni culturâl imateriâl de Unesco”

Adriano Del Fabro
Seraie (foto Schuf Margitta)

La iniziative dal Grup di Azion de Pescje Friûl-VJ

Il Grup di Azion Locâl de Pescje dal Friûl-VJ, insiemi cun altris vot Grups operatîfs in sîs regjons costieris talianis, ai 31 di Març al à consegnât la candidature de “Pescje cun imprescj tradizionâi intes lagunis e in mâr” pe iscrizion ae Liste rapresentative dal Patrimoni Culturâl Imateriâl de Unesco. Dilunc dal percors di preparazion, a son stâts declinâts chescj obietîfs operatîfs: favorî la cognossince di mistîrs, manufats e furniments colegâts ae pescje professionâl, tant che espression de identitât des comunitâts e dai teritoris de cueste; valorizâ il patrimoni culturâl imateriâl di mistîrs, manufats e furniments colegâts ae pescje professionâl, individuant azions di tutele e di difese; comunicâ il patrimoni culturâl imateriâl cun azions di comunicazion, struments audiovisîfs e azions locâls sui teritoris interessâts.
◆ Il progjet al previôt di favorî la cognossince dal patrimoni culturâl imateriâl costituît dai mistîrs, dai manufats e dai furniments tradizionâi colegâts ae pescje, favorint visibilitât e cussience, stimolant la definizion di azions indreçadis ae tutele e promozion, e promovint la partecipazion des comunitâts e dai operadôrs locâi.
◆ La sostignibilitât gjenerâl dal progjet e je rinfuarçade de ativitât di comunicazion, pe divulgazion de varietât, dal valôr e de rapresentativitât di un patrimoni ogjet de creativitât des comunitâts costieris.
◆ L’inviament dal iter di candidature a Patrimoni culturâl imateriâl dai elements candidabii al è rapresentatîf de diversitât e de complessitât dal patrimoni tradizionâl, tant che sintesi de sô trasmissibilitât e de corelazion cul ambient de cueste, cu la sô storie, cu la apartignince sociâl e culturâl e cu la sostignibilitât.

LA PESCJE CUI GRASIÙI
La pescje cui grasiùi e je il mistîr cun imprescj di postazion plui antîc e complet tra chei praticâts inte Lagune di Maran e di Grau. Al è un strument di pescje tradizionâl di lagune, classificât inte legjislazion di pescje tra i imprescj di postazion che a jentrin inte categorie di cogoli e bertoveli.
◆ Chest imprest al à lidrîs antighis: sul imprin lu fasevin cun rêts di coton e cun cjanis palustris (Phragmites australis) assembladis cun art dai pescjadôrs dilunc dal lunc periodi di inativitât invernâl.
Po dopo si è evolût, e a son stadis dopradis dome rêts: al è in vore ore presint tant che strument principâl di pescje inte lagune. Si trate di un sisteme costituît di parêts di rêts montadis su pâi metûts dentri inte aghe, che a crein une bariere e che a oblein il pes a un percors che ju puarte aes vuatis, o ben i cogoi o cogùi (tiermin locâl par chel che par talian al è il “bertovello”). I grasiùi a son, duncje, un sisteme di rêts di bariere associadis ai “bertovelli”.
◆ Piçulis porzions di lagune (seraie), estratis a sorte (toco), a vegnin sieradis cun rêts di pueste (seraie) sul tacâ des dôs stagjons plui impuartantis di pescje: te Vierte (toco de quaresema) e in Sierade (toco di peschere). La seraia e je, duncje, sedi une porzion di lagune (cognossude dai pescjadôrs cul so toponim), dulà che e ven metude la rêt di pueste, sedi la rêt stesse.
La seraia e je formade di panei di rêts cuntune lungjece lineâr variabile, componude di un fin a sîs busi: ogni buso al è componût di 80-90 pâi di len distanziâts di plui o mancul 1,5 m, che a vegnin armâts ae rêt (pessa) che par solit e je di dôs altecis standard: plui alte e cun maiis plui largjis inte pessa ciara, dedicade ae cature di pes grancj; mancul alte e cun maiis plui piçulis inte pessa fissa, dedicade a pes e crustacis plui piçui. Ogni buso al è completât cun 4-6 cogùi (i “bertovelli”, come che si à dit) metûts dilunc de seraia, soredut al principi, ae fin e a metât dal buso. Fra lis seraie e ven mantignude une distance di rispiet (10-15 m) par permeti in passaç dai natants.
◆ I cogùi a son il strument efetîf di cature e a son costituîts di rêts tubolârs che a finissin a sac, tignudis viertis di cerclis rigjits cun dentri invîts di rêt a forme di plere (gulini) che a permetin al pes di jentrâ, ma no di saltâ fûr. Il cogòi al è formât di trê parts: la boca che e rive fin al prin cercli (sèrcic), il bust o sedi il cuarp centrâl, e la code o ben la part terminâl che e ven leade al pâl (coéta) cuntune piçule cuarde (vèta). Ancje i cogùi doprâts a son di doi gjenars, in relazion aes dimensions des maiis de rêt e ae divierse tipologjie di pescjât:

  • i cogùi ciari (maie largje) a àn dimensions des maiis variabilis daûr des zonis (Maran e Grau), dut câs di plui di 10 mm; ancje lis dimensions de boca a svariin tra lis dôs localitâts. Cui cogùi ciari si pescjin cuasi dutis lis speciis lagunârs, in particolâr bisats, grançs, lis cinc speciis di cieui, passaris, sfueis, gjavedons, brancins, oradis, mormoris, sepis, moi;
  • i cogùi fissi (maie fine) a àn la dimension de maie che e rive al massim a 10 mm, misuris che a calin de boca ae code. Cui cogùi fissi si pescjin pes e crustacis di piçulis dimensions: gjambars, gjambars grîs, angudelis, gobidis, mazzancolle e ancje sardons. Sui cogùi fissi, cun di plui, al ven metût, su la bocje, un filtri formât di une rêt tirade, cu la funzion di prevignî la jentrade dai grançs e dai uciei acuatics che a pescjin te aghe.
    ◆ Cuant che i busi a son metûts in zonis plui profondis, a puedin jessi somerzûts cu la alte maree, creant pericul pe navigazion. Par evitâ cualsisedi gjenar di pericul, il principi e la fin de seraia a vegnin segnalâts cuntun pâl (coèta) plui alt cuntune bandiere. Lis seraie a son cundizionadis de stagjon e a vegnin movudis lant daûr dai moviments des speciis bersai intal cors des stagjons.
    Intal Comun di Maran lis porzions di lagune a vegnin assegnadis gjavant a sorte (toco) e chest al permet di destinâ in maniere democratiche areis di lagune a ducj i pescjadôrs che, rispietant lis regulis detadis dal “Regolament Municipâl sul ûs e sul gjoldiment des aghis comunâls e su la pescje intal Comun di Maran” (1899), a àn lis carateristichis par podê esercitâ in condizion paritarie la ativitât par un timp fissât. Il toco al ven anunziât cun cartei metûts fûr de Aministrazion Comunâl e al pues jessi fat in doi mûts diviers: cun gjavade a sorte o midiant di une conte. I afidaments a vegnin fats li de Sede Municipâl in presince dal assessôr ae Pescje e de Polizie Municipâl che a àn di verificâ lis carateristichis di chei che a àn dirit, garantî il davuelziment regolâr des operazions, regjistrâ i risultâts de gjavade a sorte e proviodi ae divulgazion publiche dal toco. Cul toco si sielç la seraia dulà che ogni pescjadôr al à l’oblic di lavorâ par un mês, dopo di che l’assegnatari al pues ancje movisi e abandonâ il sît, racueìnt i siei imprescj. Pal toco de quaresema la lagune (el paluo) e à di jessi libare di cualsisedi seraia, intant che par el toco di peschere la seraia e pues jessi lassade in pescje cul oblic, de bande dal proprietari, de sô rimozion tal câs che cheste e vegni sielzude (sunàda) di un altri pescjadôr tal moment dal toco.

UNE TRADIZION SOSTIGNIBILE
La pescje cui grasiùi e je calcolade sostignibile stant che e je une vore seletive, smirade, pôc invasive e distrutive. In zonte e je di calcolâ che la cernete e ven fate tant par timp, dopo un o pôcs salpamenti dai cogùi: chest al permet di lassâ lâ te aghe, ancjemò vîf, il pes sot misure o che no si pues comerciâ.
◆ Cun di plui, ancje il sisteme di sostituzion e di suiadure des pesse al pues jessi calcolât sostignibil. Di fat, cu la permanence in aghe, lis rêts a son subietis al fouling (incrostazions che a cuvierzin la superficie dal ogjet somerzûts in aghe), deventant man a man mancul eficientis, cun mancul capacitât di pescjâ e pesantis. Lis pesse a vegnin duncje sostituidis e puartadis a suiâ su cualchi baridure lagunâr (tapi), cuasi dome intal periodi invernâl. Là lis rêts a vegnin distiradis in verticâl parant dentri i pâi di poie inte baridure ma vint la atenzion di lassâ un spazi tra la tiere e la lime dai plomps cussì di permeti il passaç de aghe, dai animâi e di garantî une cierte aerazion dai terens. Adotant cheste precauzion, si calin i impats erosîfs che cheste operazion di pulizie naturâl, fate in prossimitât dai sîts di pescje, e podarès provocâ.❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +