“E sôra grandi tombi a si cjamìna // Catedral di ômbra. E l’aria a é ferma. // Sì, E sôra grandi tombi a si cjamìna // Diu ch’i cjamìni su di te, poeta! // E umiliàda i ritiri il piè. Fossel almancu nût / cencia la polvera di stradi superbi e glêsi muârti. // I tu so laiù tu al scûr a vôi davièrs. // Oh poeta, pôlvera inamorada. // E suridint i ti cjamìni sôra, e i càlchi il pié”.
La prime des disevot lirichis di cheste plaquette nus puarte lontan, inte catedrâl di Westminster a Londre, li che e je la tombe dal poete Geoffrey Chaucer. Inta chestis sessante pagjinis o cjatarìn ancje Humphrey Bogart (però cence spagnolet in bocje), e e tornarà fûr ancje Londre cul so flum, il Thames e i siei magazins Harold’s. Nol mancjarà Menòs, Menocchio, che al sarès il Giordano Bruno di chenti, che cun lui al à condividût il destin di jessi brusât tant che eretic. E che, come lui, al à simpri volût pensâ cul so cjâf e nus à lassât une memorie straordenarie di inteligjence e di spirt critic. O cjatarìn ancje un Orfeu dai falîts e, come lui, o sarìn tentâts di cjalâsi indaûr. E, dentri in Pofabri, no si darìn di maravee di cjatâ ancje Auschiwitz e Hiroshima. Po nus vignarà incuintri sâr Bernart de Ventadorm, poete trobadôr provenzâl, convocât a cjantâ cu la autore l’amôr dai siei gjenitôrs, Tite e Eve (ju viodìn ancje in fotografie in cuviertine e a pagjine 35), in ocasion dai lôr cincuante agns di matrimoni, cuant che la fie e à pensât di fâur chest regâl poetic (Mari fra li ondi p. 42 e Pari fra li ondi p. 44). E culì la poetesse e torne a cjapâ in man la epiche familiâr de sô prime racuelte furlane Maa Onda (1997) intitulade a la ave (la none), femine furlane fuarte, come che a savevin jessi fuartis lis feminis furlanis di une volte. Une continuitât inte ispirazion, cemût che e rimarche ben Francesca Cadel inte sô presentazion. Poesie dificile, cheste di Ida. O disarès ermetiche. I vûl lete dôs o trê voltis par capîle. Ancje par vie di chel furlan des valadis de Midune e de Celine che al piert i “S” dai plurâi feminins, ma che al manten lis I finâls, indizi sigûr di furlanetât. Ma e vâl la pene: la poesie e je buine di cumbinazions di inzirli, tant che storia e utopia un soul vin (p. 54)! ❚
