La nassite di une gnove Arcidiocesi

No podìn lassâ a la svelte il secul XVIII, parcè che al fo il timp di un cambiament che o vin ancjemò di frontâ e che al condure tal dì di vuê cu la sô ereditât. O stoi fevelant de nassite de Arcidiocesi di Gurize. Ce che a noaltris nus somee une formalitât di jurisdizion eclesiastiche, in chê volte si jere aromai disvilupât intun braç di fier politic jenfri la Serenissime e i Asburcs.
◆ Ancje se il Patriarcjât di Aquilee al jere sorevivût inte sô funzion spirituâl dopo la concuiste veneziane dal Friûl, la sielte dai patriarcjis e jere deventade une prerogative di Vignesie. Cheste situazion e cambià a metât dal Sietcent. Chest al fo puartât sedi dal procedi de riorganizazion aministrative di Marie Taresie, sedi dal dibisugn di risolvi la lungje negligjence pastorâl tal teritori. Chest secont probleme si presentave come une vore urgjent pe Sante Sede, che e finì cul lâ in jutori plui ai imperadôrs.
◆ Cuant che lis ultimis obiezions e i dubis venezians a forin superâts, tal 1751 il pape Benedet XIV, cu la bole pontificie “Iniuncta nobis”, al abolì une des diocesis catolichis plui antighis, chê di Aquilee. Al fo decidût di rimplaçâle cun doi arcivescovâts gnûfs, un cu la sô sede a Udin e chel altri a Gurize. L’an dopo, Carli Micjêl di Attems al deventà il prin Arcivescul di Gurize, in plui che une des figuris religjosis asburgjichis plui impuartantis dal secul. Di fat, si presentà come un fâr pai fedêi che a popolavin une regjon une vore largje, che si slungjave fin tal cûr de Austrie e de Slovenie di vuê, e lu fasè ancje midiant di une ativitât fuarte di promozion educative e assistenziâl.
◆ Propit cuant che l’Iluminisim – cu lis sôs corints dispès anticlericâls – al jere daûr a madressi, la piçule citât di Gurize e vuadagnave plui lustri e dinamisim culturâl in gracie di cheste gnove istituzion. Dut câs, al fo propit in chel timp di riformis turbolentis che la diocesi e riscjà di sparî, pôc timp dopo de sô creazion.
◆ Daspò de muart di Marie Taresie, che e veve lavorât une vore par valorizâ la gnove sede arcivescovîl, Josef II al inaugurà la ete jurisdizionaliste che, plui indevant, e sarès stade cognossude tant che Josefanisim. In pratiche, al smirave a modificâ i rapuarts jenfri Glesie e Stât eliminant la influence dal pape inte struture eclesiastiche dai Stâts asburgjics. In part par vie de oposizion a chestis riformis di bande dal sucessôr dal Attems, Ridolf di Edling, l’imperadôr al fasè abolî la diocesi tal 1787. Dut câs, e fo ripristinade dal pape Piu VI za tal 1791, dopo la muart di Josef II, ancje se cun amputazions teritoriâls impuartantis.
◆ O podìn sierâ ricuardant che une des consecuencis de bole di Benedet e fo la identificazion di une clare demarcazion politiche: jenfri il 1757 e il 1758 si fasè une ricognizion comune austroveneziane dal confin jenfri i “doi Friûi”, fasint finî il lunc periodi di controversiis. Cualchi deceni dopo, però, dut al sarès cambiât in maniere radicâl sot di Napoleon. ❚