Un saç al met in cont passât e futûr
di chest patrimoni musicâl furlan
Di libris su lis vilotis e sui cjants popolârs dal Friûl no ‘nd è pôcs. Forsit a son un pôc datâts, ma nol impuarte, parcè che lafè a àn di jessilu, viodût che a son une grande testemoneance di racuelte di cjants cence timp, cjapâts de oralitât, propit in gracie di studiôs, ricercjadôrs, antropolics, etnomusicolics, passionâts che a àn dedicât timp e competencis par trascrivi musichis e peraulis che cumò si stente cetant a sintî dal vîf. E al è midiant di figuris come la precursore Ella Adaïewsky, Angelo Arboit, Luigi Ciceri, Mario Macchi, Bindo Chiurlo, Giso Fior, Mario Montico, Luigi Garzoni, Claudio Noliali, Giuseppe Peresson e tancj altris, che chestis melodiis furlanis a son stadis salvadis de dismentie.
Une passion, chê leade aes vilotis, che no à mancjât tal passât – in particolâr a partî dai agns Trente e cu lis primis significativis racueltis publicadis di bande de Societât Filologjiche Furlane tai agns Sessante – di inviâ ricercjis seriis sul cjamp e discussions tra i cultôrs, cun ancje cualchi cavîl su lis interpretazions, come che si pues lei in cierts articui saltâts fûr su pe stampe furlane dal periodi.
Se lis vilotis no son dal dut sparidis, al è in gracie ancje des corâls che a continuin a pandi la espression musicâl tipiche de nestre tiere. Par dî il vêr, a son simpri di mancul ancje chestis, stant che la plui part cumò si dediche a coltivâ e a proponi composizions di stamp contemporani, ancje se par fortune no mancjin lis bielis ecezions, cun grups corâi che a van indenant a tignî in prime place la vilote e il cjant popolâr.
Un cjant che al continue a jessi studiât e proponût ae lûs di gnovis considerazions, di bande di musiciscj come par esempli Lino Straulino, Andrea Del Favero, e ancje di grups musicâi che a riconsiderin la vilote daûr des formis de musiche atuâl. Tra i studis resints plui interessants su cjarte stampade a proposit de vilote, scrits a dî il vêr simpri mancul frecuents, al è il saç vignût fûr su pe riviste “Dada Rivista di Antropologia post-globale” tal Dicembar dal an passât, e che si pues cjatâ su internet, scrit di bande de professore di Siencis politichis de Universitât di Triest, Giuliana Parotto, e dal titul: “La villotta friulana. Musica popolare tra identità e contraddizione”. Al è un studi che si concentre su cheste tipologjie particolâr, dute furlane, di musiche popolâr ae lûs des sôs carateristichis formâls e di contignût, par passâ daspò a une vision strumentâl di cheste forme a nivel politic e sociologjic, par analizâ infin la vilote inte produzion leterarie e cinematografiche di Pier Paolo Pasolini.
Di rilêf intal saç al è l’aspiet sociopolitic, indulà che Giuliana Parotto e met in clâr la contraposizion tra la “vilote îr” e la “vilote vuê”, intal dualisim di une societât antighe, plene di valôrs spirituâi, e une societât moderne e massificade. E puarte ancje tant che esempli, lant indaûr al timp dal fassisim, un articul di Odo Samengo, jessût su pe riviste “La porta orientale: rivista mensile di studi giuliani e dalmati”, tal 1935. Par lui, la vilote – come che al scrîf par talian e che nô o tradusin -, ven a stâi “il cjant tradizionâl dal popul, vôs gjenuine dal Friûl”, e jere cetant menaçade di bande des “vueriliis politichis dai partîts di prime de vuere”, de “svintade di folie rosse dal dopovuere”. Il stes che al titolave Arturo Zardini, viodût tant che salvadôr di cheste forme musicâl, come il “Bart dal Friûl”.
Cjalant tal spieli la storie, al ven di domandâsi se ancje tal timp presint e in chel futûr la vilote e sedi in pericul, o se in gracie di libris, publicazions discografichis e esecuzions corâls, si è vuadagnade la salvece. O crôt infin che se la int, il popul furlan tal so insiemi nol continue a cjantâ lis vilotis e a insegnâlis come che a son nassudis, inte lôr nature orâl, cheste forme e riscje di pierdi la sô autenticitât, cundut di studis impuartants che si spere di continuâ a produsi sul lôr cont. ❚
Alessio Screm