La muart pai fruts in tune cjançon di Ferigo

Al teme de muart, il grant cjantautôr cjargnel Zorç Ferigo i à dedicât plui di une cjançon di chês dal sô grup Povolâr Ensanble. Us proponìn il test di une di chestis. Publicade intal 1981, duncje cuant che la “invasion” di Halloween no jere rivade in Friûl, e tache propit cuntun riferiment a lis cavocis cun lis cjandelis dentri, tradizion che e jere ben presinte ancje in Cjargne. Il test nus conte di cemût che i fruts a vivin la muart, scuasit tant che un zûc, un alc che si à sintût fevelâ par cemût che e pues sucedi, une formule religjose, une robe “di grancj” di no disturbâ.
Cjantôsa dai agnuluts
Muart a è una cavoça
cun denti una cjandela
e i dincj di stecs
Muart a è una pelanda
bandiera di piratas
plena di blecs
Muart a è un vuarbìt
ch’al peta su tai vôi
colp-di-malore
bagno-dopogustât
clapada tal cernêli
Chi Tocca I Fili Muore
Muart a è trai la recuie
a un vecju in varas
limuesina dal sâl
«Jo ch’i lu ai tocjât,
ch’al è grant coragjo,
i puartarai la crôs e tu il ferâl»
Muart a è i Novissimi
imparâts a dutrina
(e cumò ju dîs:)
Muart a è tal orden:
Morte Giudizio
Inferno e Paradîs
Muart a è un giûc di batisasso
giuiât sotvôs par no
disturbâ i corots
Muart a è un giûc
– …le bombe del canon… –
ch’i no vin finît da macarots
Muart, lâra di not
ch’a gira pa vila
a pisclâ tal plat
Muart, çaupa avonda
s’a roba i fruts
ch’a no pain riscat
Muart a è chest nuia
garofui multrinâts
boss par tet
Muart a son chestas gravas
ch’a clamin dal Signôr
cença furmia
nè çupet
(Giorgio Ferigo, 1981) ❚
✒ Redazion