La mont che e cjale al Mont, dal locâl al globâl

Istât di riflession in tancj paîs de Cjargne
e dal Cjanâl dal Fier cu la rassegne “vicino/lontano mont”
La peraule “Mont” par furlan e à doi significâts: al feminin je une realtât altimetriche (par talian, “montagna”) ma al masculin e segne la maniere par clamâ dut il planet là che o vivìn. Zuiant su la ambiguitât di chest tiermin, la associazion culturâl vicino/lontano e propon par dut Avost e Setembar, in tancj paîs de Cjargne e dal Cjanâl dal Fier, desenis di incuintris su culture, ambient e avignî intune rassegne clamade “vicino/lontano mont”. Chest gnûf spazi di riflession al va a concentrâsi sui temis de contemporaneitât declinâts sedi in clâf locâl (cjalant bande la mont furlane) che globâl (fevelant dal mont e dai siei cambiaments, climatics, culturâi, economics). Il progjet al met adun int che di tancj agns e lavore pal disvilup locâl e pe valorizazion dal teritori, ancje midiant de culture. Ma e je ancje la voie di dâ spazi ai zovins in plusôrs incuintris, cun concierts (tal program, che al viôt la presince di nons tant che chel di Daniele Silvestri, al è puest par artiscj di chenti come Dj Tubet e  Doro Gjat) e moments di discussion e dibatit. Nol è un câs che il calendari si sierarà cun Umberto Galimberti che al discorarà cuntune zovine cjargnele, parcè che l’avignî di cheste tiere al cjaminarà su lis gjambis des gnovis gjenerazions. Ma tal mieç – a partî de scree cui gjenitôrs di Giulio Regeni – si fevelarà di dirits, di pandemie, di bens comuns, e di ce che al pues jessi util par imagjinâ un doman sostignibil. La mont e je il laboratori ideâl par concepî e par sperimentâ chestis soluzions cence la savoltâ i ecuilibris che la nature e fâs simpri plui fature a mantignî.
◆ Grancj ospits di nivel talian come Fabrizio Gatti, Massimo Zamboni e Paolo Rumiz, si alternaran intal calendari a figuris cognossudis dal panorame furlan: par nomenâ dome cualchidun, Carlo Tolazzi, Maurizio Mattiuzza, Lino Straulino, Ulderica Da Pozzo, Angelo Floramo. Ancje “La Patrie dal Friûl” e colabore a cheste iniziative: sabide ai 28 di Avost il diretôr Walter Tomada al condusarà une biele zornade organizade in Malghe Glaçât la che si rivarà a buinore a pît par rifleti su “Il lavôr in malghe îr e in dì di vuê”: de apiculture di une volte al fevelarà Sandro Menegon, chê di vuê le descrivaran Ennio Pittino e Mauro Pascolini. Dopo gustât si discorarà di “Feminis e oms di mont” cun Daniela Tarman, presidente de Cooperative Agricultôrs Valcjanâl – Latarie di Ugovize, Paola Zanzi, arlevadore a Grauçarie, Simone Toffolo De Piante, casâr sui Plans dal Montâs daspò vê zirât a fâ chest mistîr ator pal mont, e Kaspar Nickles, contadin di mont in Dordole. Vie par dute la zornade, la malghe si animarà cu la musiche (a bas volum) di Dj Tubet. ❚
Redazion