La letare: si torne ae Ete di Mieç

“Chest Friûl fruçât in 17 emirâts pustiçs al è un tornâ ai frazionaments medievâi e semi feudâi”. Domenico Zannier, poete, predi, inteletuâl, un che al cognòs ben la storie dal Friûl (al à vût cetancj ricognossiments pe sô ativitât leterarie e tra chescj ancje la candidature al Premi Nobel pe leterature) intune letare mandade al President de Provincie di Udin al pant il so pinsîr sul riordin dai ents locâi burît fûr de Zonte regjonâl e lis consecuencis di chel dissen par Udin e pal Friûl.
Friûl: si torne ae Ete di Mieç
A jerin siet secui che nol sucedeve. Dal Stât Patriarcjâl, passant pal domini venezian, napoleonic, austriac e talian, Udin e jere simpri stade la capitâl aministrative dal Friûl. Il passaç di Gurize ai Asburgo al veve causât une prime division regjonâl e statuâl, no sanade dome par pôc subit daspò de Grande Vuere. La Provincie dal Friûl integrâl e durà pôc e Gurize e tornà cjâf lûc di Provincie. Tal Secont Dopovuere si è costituide la Provincie di Pordenon, avantazade di Triest, deventade intant capitâl de Regjon composite Friûl – Vignesie Julie.
L’ultin tentatîf di slambrâ il Friûl al è stât il progjet de cuinte provincie di Tumieç. Triest e à simpri vude la manie di cerclâ, a tuart o a reson. La no juste mutilazion dal teritori ator dal Cjars e podarès jessi une scuse che vuê no ten sù. Cumò a vegnin azeradis dutis lis provinciis de Regjon a vantaç dal unic centri no furlan. Udin e rapresentave il Friûl te realtât storiche, culturâl e aministrative, ancje se plui debil par cause di cjampanilisims e divisions inutilis. La sô cancelazion e je un at di injustizie viers de realtât de Patrie dal Friûl e un at di dispreseament viers de nestre identitât e de nestre Storie. Ma si puedial domandâ rispiet a cualchidun che nol sa nuie dal Friûl? Di un pôc di timp in ca i Furlans a votin par esits imberdeâts. Dulà sono lâts i radicalfurlaniscj? I leniniscj de lenghe? E il clericât etnic e i inteletuâi di ogni specie e grât? Ducj cjapâts in cuintri pît o cjavai di Troie. Al è inutil lamentâsi di realtâts teritoriâls e linguistichis slambradis, cuant che si lavore al slambrament dal Friûl par entitâts furlanis e fintremai no talianis. Chest Friûl fruçât in 17 emirâts pustiçs al è un tornâ ai frazionaments medievâi e semi feudâi. Un comun par sô nature nol à mai la vision globâl dal teritori di un ent sorecomunâl che al fâs di eculibri tes diviersis esigjencis. Mi domandi parcè che si sono abolîts i mandaments che a ilustravin lis citâts provinciâls mediis. Simpri par sparagnâ? E par bêçs preturis e tribunâi? E par bêçs lis provinciis? Al pues jessi. Ma finìnle di dî stupidagjinis.
Si fasaressin ancje riformis falsis e fantasiosis par stâ sù sot dal aspiet politic e in chest câs favorî une uniche citât, no furlane, che a chê o vin di stâ sot e servî. Sperìn cuintri ogni sperance pal ben dal Friûl. Il President de Provincie di Udin che e je daûr a murî, Pietro Fontanini al à fat celebrâ l’An dai Patriarcjis cun manifestazions e publicazions di atualitât straordenarie. No mi interessin lis critichis ae sô iniziative ancje di bande di cui che al sta diluint il Friûl. I Patriarcjis a rapresentin, insiemi al Ducât Langobart, un moment fuart e che no si pues ripeti de nestre identitât storiche e umane.
La abolizion des Provinciis e anule la presince des realtâts civîls e dal Stât. No saran plui prefets, presidents, cuestôrs. I presidents des “Unions” a saran dome dai sempliçs “primi inter pares”.
Lis citâts cjâf lûc di Provincie no podaran fondâ identitât civîl, ridusudis a cimelis storics. A restin lis Diocesis cui Vescui. Nol risulte che l’Arcidiocesi di Udin e chê di Gurize e Concuardie-Pordenon a vignedin canceladis e i Furlans a podaran viodi tes lôr sedis episcopâls e ta chel teritori une agregazion morâl e culturâl plui largje. E i nestris Vescui a son ancje i erêts dal gloriôs Patriarcjât di Aquilee, di Aquilee e no di Triest, cun buine pâs di ciertis riformis. Se il Stât (o il Friûl) si disfe, supplet Ecclesia. ❚
✒ Domenico Zannier – Cjasesole di Maian, ai 13 di Fevrâr dal 2015