Sfuei Mensîl Furlan Indipendent
Archivi de Patrie

LA INTERVISTE – Giannola Nonino: Une rivoluzion partide des lidrîs

Dree Venier
Giannola Nonino su la cuviertute dal nestri mensîl (part.)

Siore Giannola, di dulà vegnial il so amôr pe civiltât contadine? Aie vivût di piçule in campagne?
Chest amôr al ven fûr dal privileç di vê vût  gjenitôrs che mi àn trasmetût l’amôr e il rispiet pe mê tiere, il Friûl, pes sôs tradizions, pai siei ûs e costums.
O soi nassude a Percût, tal comun di Pavie di Udin, un paîs soredut agricul fin ae fin de vuere, ma che dopo, massime dai agns Cincuante indenant, si è mudât intun paîs artesanâl, in gracie de industrie de cjadree nassude inte zone di Manzan. Al è stât pardabon un savoltament di plante fûr! In chê volte nol esisteve un plan regoladôr e no esisteve la culture pal rispiet de architeture rurâl. Il gno amât paîs si è cjatât avantazât pe economie, ma al à pierdût dal dut la sô identitât!
Tai ultins vincj agns, lis personis si son fatis plui studiadis e a àn tornât  a discuvierzi e a rispietâ lis lôr lidrîs. Ma, magari cussì no, la plui part dal dam al jere za fat. O ami cetant Percût, li che o ai ponts di riferiment insostituibii, tant che la buteghe di Rino Lestuzzi, che al fâs sù la robe insacade e lis luianiis plui buinis dal mont. I abitants dal gno paîs a fasin part dai afiets de mê vite di ogni dì. Lis vecjis stradis dulà che o zuiavi di picinine, il glereâl de Tor, li che i miei mi puartavin cun mê sûr a fâ barcjutis su la aghe, i cjamps, i boscuts li che ancjemò cumò o voi in biciclete o cul quad (une specie di moto  a cuatri ruedis, ndr) di Toni, gno zinar, insiemit a Benito, il gno om.
O rivi ancjemò a cjatâ lis violutis, lis primulis, lis pomulis, dut un mont che mi fâs tornâ indaûr a cuant che o jeri frute e che, cuant che o torni dai viaçs di lavôr, mi da la serenitât e la gjonde di cuant che o jeri picinine.
Mi àn dite che a so pari i plaseve lei La Patrie dal Friûl…
Gno pari al leieve La Patrie dal Friûl, in plui dal Corriere della Sera. O pensi di vênt cualchi numar storic metût vie di cualchi bande. Emigrant, fi di emigrants, al jere inamorât de sô tiere, il Friûl, e  mi à trasmetût l’amôr pes mês lidrîs, pe cognossince dal teritori e dai siei tesaurs. Fin di piçule mi spiegave parcè che lis vîts e i vignâi nostrans furlans a podevin dâ risultâts cussì siôrs dome tal lôr ambient: parcè che la tradizion no je dome fate di conservazion, ma ancje de esperience di chei che a son vignûts prime di nô. Al bateve tal dîmi chel che dome vuê, a distance di tancj agns e dopo  tancj erôrs, a ametin cuasi ducj: chescj prodots antîcs, chescj valôrs antîcs, a àn di jessi protezûts, salvâts, fale la pierdite de nestre identitât. Ve parcè che al è nassût il Premi Nonino – Risit d’Aur.

«Cirint lis trapis di vîts autoctonis furlanis, – Pignûl, Sclopetin, Ribuele Zale e Tacelenghe –, mi soi inacuarte che no esistevin plui! O miôr: uficialmentri, no esistevin plui. La otusitât dai orghins preponûts e veve fat in mût che no fossin metûts dentri te liste comunitarie des varietâts di vîts coltivadis in Friûl»

Il vuestri sucès al è stât chel di creâ un prodot rivoluzionari tant che la sgnape “monoue” (“monovitigno”) ma une altre rivoluzion e je stade ancje il fâ comunicazion par fâlu cognossi. Isal cussì? Ancje in chest câs  isal stât par vie di un lavôr continui o vêso vude une iluminazion particolâr, un fat…
Il nestri sucès al ven daûr di pôcs ma essenziâi valôrs: crodi  tal nestri lavôr, jessi determinâts tal impegnâsi cun capacitât, ricercje, intuizion, par rivoluzionâ la cualitât e la imagjin de sgnape in Italie e par dut il mont. In chê volte, e o feveli dai agns Sessante, la sgnape e jere un distilât considerât grubian, une ereditât de miserie, dal frêt e de fam. Benito, interprete insuperabil dal lambic, daspò agnorums di studis, ricercjis, provis e cercjis, inte vendeme dal 1973 al à madressût un meracul: cuntune distilazion artesanâl, gote a gote, il prin di Dicembar dal 1973 – no lu dismentearai mai – al à otignude la prime sgnape di une sole ue, il Picolit. In chê dì e je scomençade la rivoluzion de sgnape, la rivoluzion Nonino, e il so riscat ae concuiste dal mont. Cemût che al à vût scrit R. W. Apple, tancj agns dopo sul New York Times: «Par desenis di agns, la sgnape e je stade nome une sorte di riscjaldament inte sachete pai contadins dal nord de Italie (…), i talians plui rafinâts e la plui part dai forescj le disdegnavin. Ma dut chest al sucedeve prime che i Nonino di Percût a vignissin  ae ribalte» (R.W. Apple Jr., New York Times,  31 di Dicembar dal 1997).
La sgnape si preparave a jessi la regjine des aghis di vît. La cualitât dal prodot e jere bielzà straordenarie, ma al mancjave ancjemò alc. Al coventave svicinâ e morosâ il consumadôr plui esigjent e cualchi volte ancjetant distrat, che al disgradave la sgnape, che al veve miôr i distilâts forescj, pensant che a fossin miôr, o almancul plui ae mode. Di chel moment, e nas une operazion spontanie di marketing. La idee vincente e je stade chê di sierâ chest  netar intune ampole di veri soflât cetant rafinade, cuasi une relicuie, cuntun confezionament rivoluzionari par chei timps, complet di etichetis milesimadis, che o ai sotscritis jo a man personalmentri une par une. In cheste maniere, la presentazion e faseve subit intuî, ae prime voglade, la unicitât e la preziositât de sgnape che e jere dentri.
Lis aziendis furlanis, fiis de  praticitât furlane pluitost ruspiose, clopino un pôc te comunicazion?
Sì, purtrop! Ogni volte che mês fiis e jo si cjatìn tal forest par presentâ la nestre sgnape, si rindìn cont che no si cognòs ancjemò dulà che e je logade la nestre Regjon, tant che o vin di fâ riferiment a Vignesie…
Simpri fevelant di so pari, jê e à dit che i plasevin i vins furlans – come il Tacelenghe – e di chel, a  jê i è vignût il spont pal prin premi “Risit d’Aur”, che cumò al è ancje un innomenât premi leterari. Nus puedie contâ cemût che al è nassût?
Cirint lis trapis di vîts autoctonis furlanis, lis vîts de mê infanzie, chês che gno pari mi veve fat discuvierzi, cognossi e amâ – Pignûl, Sclopetin, Ribuele Zale e Tacelenghe –, mi soi inacuarte che no esistevin plui!
O miôr: uficialmentri, no esistevin plui. La otusitât dai orghins preponûts e veve fat in mût che no fossin metûts dentri te liste comunitarie des varietâts di vîts coltivadis in Friûl, e in cheste maniere a ‘nd vevin declarade la muart sigure. Jo no podevi acetâlu. A fasevin part de nestre storie, de mê vite, a vevin un caratar, un leam precîs cu la nestre tiere. Cun Benito e cu la poie di Gino Veronelli, mestri indiscutibil de Enogastromie e amì insostituibil, o ai decidût cussì di istituî un premi a pro dai viticultôrs che a vessin acetade la sfide di salvâ chês vîts: un milion di liris – o jerin tal 1975 – a chei che a vessin metût une o plui di chestis varietâts.
La dì dopo dal nestri  “proclame” e je rivade, puntuâl e frede, la difide dai sorestants ae viticulture: o o ritiravin il bant o a varessin fat distruzi i vignâi di chestis varietâts, cun multis pesantis pai viticultôrs e pai vivariscj  che ju coltivavin.
Sacrabolt, mi soi dite, miôr pierdi la nestre identitât, jessi sclâfs de France, plantant i varis Pinot, Sauvignon, e vie indenant, invezit di salvâ lis nestris varietâts? Une bataie cussì e jere pan pai miei dincj. No varès molât. O ai cjapât dentri te jurie pe assegnazion dal Premi chei che a varessin vût di penalizânus. Cussì, tal 1975, al è nassût il Premi Nonino Risit d’Aur. Dopo trê agns, lis vîts autoctonis de mê infanzie a jerin salvis. Dal 1983 a jerin racomandadis e dopo cualchi an, in particolâr Sclopetin e Pignûl, a jerin tornâts a jessi lis perlis enologjichis dal nestri Friûl e si preparavin ae concuiste dal mont. Dal premi tecnic sientific al premi leterari, nassût par rimarcâ la atualitât permanente de civiltât contadine, il pas al è stât naturâl. Cussì, tal 1978, a Percût al rive Ermanno Olmi, il grant regjist, seguît di Leonardo Sciascia, che al declare: «La civiltât industriâl e je za muarte; tal moment che e murarà la civiltât contadine, al murarà ancje l’om!».
Al è l’inizi di une aventure straordenarie no dome pe nestre aziende ma soredut par ognidun di nô. In gracie di un prodot considerât fin îr puar e  dispreseabil in confront cun altris, i Roncs di  Percût a deventin par une volte ad an une piçule capitâl de culture. A rivin scritôrs, dramaturcs, atôrs, regjiscj, antropolics, sienziâts, imprenditôrs e tancj amîs di dut il mont.
Cheste storie mi samee al câs dal non “Tocai”, li che forsit la resistence e podeve jessi plui fuarte e atente. Ce isal: il classic “masse rispiet” pe autoritât (la sotanance) o magari la volontât di tirâ une rie suntun passât di puaretât?
Cheste storie e met in lûs une resistence scjarse: no di bande dai furlans, ma di bande – o ai pôre –  di chei che nus àn rapresentâts e che a son stâts cussì pôc atents ai problemis di difese dai nestris prodots.
Par cheste bataie, ma ancje par chê dal “monoue”, o vês vût di scombati cuintri i stes furlans. Cemût isal batisi pal amôr de tô tiere cuintri chei che a fasin part di cheste stesse tiere amade? Ae fin – rivade la vitorie – ce restial dentri: plui sodisfazion o delusion, un tic di marum?
O ami la mê tiere, o soi braurose di jessi furlane, ma cun grant displasê o ai vût di cjapâ at che une vore dispès i coleghis furlans no son solidaris cun cui che al rive a vê ideis vincentis, cun cui che al à sucès. Anzit, dispès a combatin in maniere pesante lis intuizions e lis inovazions che intun secont timp, no cate lôr, a son costrets a imitâ e a seguî. Clarementri, il lôr ricognossiment, ancje se tardîf, al da plui sodisfazion che delusion. Par altri, un pocje di amarece e incrès la voie di scombati.
Voaltris no vês vude pôre di meti un non furlan suntune etichete. Parcè cheste sielte? Secont jê, la lenghe furlane podaressie fâ il percors: di prodot considerât di puars a prodot di gale?
A son dôs robis dal dut diferentis. La decision di meti in etichete un non furlan e je une sielte dal dut personâl. Par chel che al inten la trasformazion de sgnape di un prodot puar a un di grant presi, no lu à fat la lenghe furlane, ma ben Benito, Giannola e po dopo Cristina, Antonella e Elisabetta, in gracie de ricercje, de cualitât otignude, de presentazion, dal marketing e dal messaç continui che la famee interie e trasmet a dut il mont, fasint cognossi in chest mût no dome la sgnape e la sô cualitât, ma ancje la regjon Friûl, a vantaç no dome propri, ma di dut il teritori.
La vuestre famee e je stade descrite tant che un matriacjât  e jê e à vût dit che e à miôr lavorâ cu lis feminis. Parcè? E àno alc di diviers e di speciâl lis feminis furlanis?
O rimarchi che ca di nô nol esist un matriarcjât e che Benito, unic om, al reste simpri il “sorestant”: al è restîf, ma simpri presint. Mi plâs lavorâ cu lis feminis parcè che a esistin tra di nô une cierte complicitât e valôrs comuns: il spirt di sacrifici, la determinazion, il desideri di realizâsi, ancje di fûr de famee. Par chel che al inten lis feminis furlanis, o finìs cuntun sproc che dispès gno pari al citave: «La femine furlane e ten sù trê cjantons de cjase».
Par finî. Voaltris o vês savoltât e atualizât il concet de sgnape: nus disie dôs robis dal Friûl di salvâ o – ancjemò miôr  – di promovi ben, o che a laressin fatis?
No ai la bachete magjiche e no mi sint di dâ conseis. Mi limiti a esprimi un desideri: o volarès che ducj nô furlans o pandessin plui braure e rispiet pe nestre tiere. I nestris valôrs e lis nestris lidrîs nus fasin cognossi di simpri tal mont. Parcè sotvalutâju, cuasi vergognâsi di lôr, culì, a cjase nestre?
Dree Venier

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +