LA INTERVISTE. Nazionâls cence Stât ma cul balon

Stant che cumò al è timp di Campionâts Mondiâi di Balon, al ven di pensà a cemût che si vîf il Balon ancje in chei puescj, dulà che a vivin popui cence Stât.
Ven a stâi che, pardabon, ancje Nazionâls di Balon che a partecipin a chescj mondiâi in Sud Afriche, di fat no son rapresentativis dal Stât intîr di partignince.
Par esempli la Ingletiere (alenade tra l’altri dal bisiac di Pieris Fabio Capello), e je une des nazionâls di Balon plui preseadis dal Mont, ma no je rapresentative dal so Stât, che come che a san ducj, si clame «Ream Unît di Grande Bretagne e Irlande dal Nord…». Di fat si cjatin ancje altris che a àn une proprie identitât e che a àn ancje une proprie Nazionâl di Balon rapresentative, che a son: il Gales, la Scozie e la Irlande dal Nord. Scuadris di Balon che a fasin part dal organisim uficiâl dal Balon European, che si clame «U.E.F.A.» e di chel Mondiâl che si Clame «F.I.F.A».
Po dopo, restant simpri  in cjamp European, si fevele par esempli ancje di Nazionâls di Balon che a son rapresentativis dal lôr teritori di divignince ma che no son dentri ni de UEFA e ni de FIFA.
In Spagne si cjate la selezion di Balon de Catalogne. In chest câs, no jessint dentri ni de UEFA e ni de FIFA, la selezion de Catalogne no pues partecipâ a manifestazions uficiâls come i Campionâts Europeans di Balon o apont chei Mondiai, ancje se plui voltis e à provât a jentrâ in tal organisim de UEFA, ma cence nissun risultât.
Simpri in Spagne si cjate le Selezion di Balon dai Paîs Bascs, nomenade «Euskal Selekzioa», ancje jê fûr dai organisims uficiâi dal Balon, sedi UEFA sedi FIFA.
Ma viodût che si fevele di organisims uficiâi dal balon, lant a torzeon pe Rêt internet, si scuvierç ancje che e esist une federazion di Balon des Scuadris di entitâts teritoriâls che, gjavadis pocjis ecezions, come par esempli il Principât di Monaco, no son Stâts Sovrans. Cheste Federazion si clame «NF-Board» (www.nf-board.com) e je state fondade tal 2003. Par cumò dentri de »NF-Board» a son plui di 30 Stâts: 3 associâts (il Sealand, la Basse Sassonie Meridionâl e la Republiche di Saugeais, che e je in Francie sul confin cu la Svuizare); 18 a son chei uficiâi (tra chescj la Lapponie, il Principât di Monaco, la Republiche Turche di Cipro dal Nord, il Kurdistan, la Ocitanie, la Provence, la Groenlandie, Fiume, il Camerun Meridionâl e la Padanie) e 11 a son invezit provisoris (tra chescj la Sardegne e ultin rivât il Ream des Dôs Siciliis).
La Manifestazion Uficiâl de »NF-Board» e je la »VIVA World Cup», che e sarès come i Campionâts dal Mont e che dopo il 2008 si zuie ogni an. Tal 2009 e à vint la Padanie, in spiete de edizion di chest an che e varès di tignîsi su la Isule di Malta e di chê dal 2011 in Kurdistan.
Par cumò, dut câs, lis scuadris dai teritoris che a fasin part de Italie a son la Padanie, la Sardegne e apont il Ream des Dôs Siciliis. Si spere che un doman ancje il Friûl al podedi jessi presint, parcè no, cuntune proprie rapresentative di Balon.
(Enrico Turloni)