LA INTERVISTE. 50 agns di «Tutto il calcio minuto per minuto»

Dino Zoff al è stât un dai ospits principâi di «Goal a Grappoli», doi dîs di fieste a Cormons che al à celebrât i 50 agns di «Tutto il Calcio minuto per minuto», storiche trasmission di Radiorai che à compagnât mieç secul di balon. Alfredo Provenzali, Livio Forma, Ezio Luzzi a son lis storichis vôs de trasmission (cun lôr ancje Gigi De Agostini, Giovanni Galeone, Tiziano Crudeli, Lorenzo Buffon) che pal galà dai 29 di Mai a àn rispuindût al invît di Bruno Pizzul e Francesco Pira, de Universitât dal Friûl e ideatôr di un master sul gjornalisim sportîf. E sierant la serade e je rivade ancje une anticipazion: il prossim an il teme de manifestazion al sarà «I furlans mondiâi» ven a stâi i zuiadôrs che dal Friûl a son rivâts zuiâ te selezion taliane di balon dilunc i diviers agns. E noaltris, come che o vin za segnalât te nestre formazion ideâl par une Nazionâl furlane di ogni timp publicade su la Patrie di Avost dal 2008, o pensìn che sul portîr e cjapitani no varessin di jessi dubis! Baste cirî tra Rome e Marian…!
Un esempli di braure e identitât: Barcelona FC
La Catalogne e pues vantâ une des scuadris di balon plui fuartis dal mont. Ma la braure no je dome a nivel sportîf: la scuadre di balon e à simpri sostignude la cause catalaniste, deventant propit une bandiere di identitât: il sît www.fcbarcelona.cat («.cat» al caraterize i sîts Internet de Catalogne, ndr) al è multilengâl e la prime lenghe e je chê catalane (chês altris a son: castilian, inglês, gjaponês, cinês e arabic, ndr).   L’avocat Joan Laporta, president dal Club dai 15 di Jugn dal 2003 al è un dai plui vivarôs sostignidôrs de campagne indipendentiste catalane. Cun di plui, par contrat, i zuiadôrs de scuadre a àn la clausule che ju oblee a imparâ il «català» in maniere che se, par esempli, un gjornalist ur fâs une domande par catalan, lôr a àn di jessi bogns di rispuindi te stesse lenghe.
Un altri episodi significatîf al è leât a la Champions League 2009: il Barça al jere in finâl (vinte 2 a 0 sul Manchester United) e sul sît dal Comun di Rome dulà che si è davualte la partide, lis informazions pe tifoserie blaugrana a jerin par catalan.
(C. R.)