Sfuei Mensîl Furlan Indipendent
Archivi de Patrie

LA INTERVISTE – Dut al tacà cuntune note…

............

E jere in prime o in seconde elementâr cuant che la mestre e à dât un temut di fâ. Il titul: «Tu sês di bessôl intune stanzie, imagjine che al jentri cualchidun…». Cui che al à scrit che al rivave un mostri, cui un animâl, cui un amì. Tania e je stade la plui origjinâl, e e à pensât di fâ vignî dentri une note musicâl.
E veve 6 o 7 agns e di chê volte al è passât timp, progjets, esperiencis. E à tacade la lauree in Biologjie, a Triest, ma la musiche le à puartade viers un altri destin. Cumò, 32 agns a pene finîts, e je un diretôr di orchestre. Une des pocjis feminis tal mont che a fasin chest mistîr.
E zire teatris, citâts, di resint e je stade in Argjentine a direzi la opare «Il flauto magico» di Mozart a la Avenida di Buenos Aires. Ma la sô «base» e je Vergnà. Li e vîf cui gjenitôrs, tal mieç de  campagne. E e torne simpri, a pene che e pues.
Tania Morandini, ma chel temut cu la note, cemût lavial a finî?
A sei sincere, no mi visavi di vêlu scrit. Ma une dì mê mari e je lade a cjoli pan e lat in paîs e e à cjatât la mestre des elementârs, Ottorina Pagani. Jê e veve savût dal gno mistîr e alore e à contât  chest fat. Sal visave ben, parcè che e à dit che al jere stât pardabon origjinâl.
Âstu simpri pensât di lavorâ tal mont de musiche?
No, e je une strade che o ai cjapade in maniere graduade. No varès mai crodût di deventâ une diretore di orchestre. Di piçule o ai studiât pianoforte di privade cun Manola Facile, une brave conciertiste dal gno paîs. E o sunavi l’orghin te glesie di Vergnà, cun don Marco Visintini. Propit lui mi à fat direzi i prins coros, chei dai Pueri e Iuvenes Cantores. Mi plaseve tant, e jere une ativitât che mi divertive e mi coinvolzeve. Cu lis  formazions corâls, o ai tacât ancje a componi musiche e a fâ concierts cun coros e bande insieme.
Però tu ti sês iscrite a Biologjie, ae universitât di Triest…
Eh sì. Dopo il diplome al «Stellini», il liceu classic di Udin, mi soi trasferide là. Par curiositât, però, mi soi iscrite ancje al Conservatori di musiche «Tartini», simpri a Triest. La mê vite e je cambiade li.
Parcè?
Parcè che mi soi laureade in composizion vocâl e direzion di coro, e o ai cognossût doi mestris impuartants: Sofianopulo e Gessi. La passion e deventave simpri plui fuarte tant che o ai lassade la universitât par dedicâmi a cheste strade.
Il conservatori si fâs in dîs agns, tu tu lu âs finît in siet. E no tu ti sês fermade li.
No, la preparazion e je fondamentâl par podê lavorâ ben un doman. Dopo la lauree al conservatori, o ai frecuentât dôs academiis di perfezionament a Siene cul mestri Gelmetti e a Pescara cun doi grancj professioniscj: i mestris Kalmar e Renzetti. E dopo, o ai tacât a lavorâ.
Il prin incaric?
Tal 2008, par direzi la prime orchestre filarmoniche marcjesane. Tra lis tantis, o ai lavorât cun dôs formazions de Romanie, la Brasov e la Oradea, e tal Març di chest an o ai diret la mê prime opare a Buenos Aires. Une esperience maraveose parcè che là e je une vere raritât vê une femine ae direzion, massime zovine. E alore il public al ven numerôs a viodi, e al partecipe cun calôr.
Be, ancje in Europe lis feminis che a fasin il to mistîr no son tantis…
Sì, ancje se cumò il moment al è avonde bon. A comencin a sei avonde diretôrs cu la cotule. Di sigûr, un ostacul al mistîr al è il stîl di vite stressant. Si sta vie cualchi volte ancje par mês, e prime di une esibizion si prove ancje dut il dì. Se tu âs famee, la robe e devente pardabon complicade,  par chest a son soredut i oms a fâlu.
La int aie cualchi prejudizi tal viodi une femine ae direzion?
A voltis sì, ma par fortune lis robis a stan cambiant. Dut câs, viodi une femine che e fronte une formazion musicâl che par solit e je formade dute di oms, nol è cussì normâl.
Tu âstu vût cualchi probleme cui tiei sunadôrs?
Di imprin ti cjalin cun curiositât e difidence ma dopo, se a viodin che tu sês brave e professionâl, ti seguissin e ti rispietin. E covente plui che mai la competence e il studi ancje parcè che, come in ducj i lavôrs, purtrop, se tu sês femine e tu falis, tu pais di plui di un om.
In Friûl tu âs debutât al Teatri Giovanni da Udine, tal Avrîl dal 2009. Tu âs diret un conciert benefic pe Crôs Rosse taliane cu la orchestre formade di membris de sinfoniche di Oradea e altris di chê de formazion dal Friûl-Vignesie Julie. Ce ti visistu di chê sere?
I tignivi tant al debut te mê citât. Il Giovanni da Udine al è un teatri che mi plâs particolarmentri parcè che al à une acustiche stupende e, dopo, direzi te mê tiere e je une emozion uniche.
Une tiere che tu sês leade in maniere fuarte…
Sì. Vergnà, il gno paîs, al è il lûc dulà che o sint la pâs. Vivi in campagne, tal mieç de nature e des robis plui semplicis mi jemple la vite. Al è l’unic puest dulà che mi sint pardabon a cjase. E ancje i mei paisans mi dimostrin tant afiet, mi plâs vivi li.
Su «La Patrie dal Friûl» si scrîf, si lei e si pense par furlan. Tu ce rapuart âstu cu la marilenghe?
Cun mê none o fevelìn simpri par furlan, une lenghe che e à une musicalitât uniche. Cuant che o voi fûr regjon e o dîs cualchi peraule in marilenghe, la int e reste colpide dal ritmi che e à. O pensi, però, che la sô sorevivence e sedi leade ai vecjos. A son lôr che le custodissin, le fevelin e le tramandin. La scuele e pues judâ a no dismenteâle ma dispès mi pâr che si fasin tancj progjets che no lassin nuie di concret. Il furlan al restarà vîf se la int e larà dilunc a fevelâlu in famee.
Tania, par finî, gjavinus cualchi curiositât: sêstu un «diretôr» ancje te vite?
No, no. O soi une persone trancuile e dolce, ancje se no varès di sei jo a dîlu, chest al è ce che o sint a dî dai miei amîs. Ma cuant che o voi sul podi o deventi un leader. Determinade, sigure: insome, o ai dôs personalitâts.
Chei che a lavorin tal mont dal spetacul si dîs che a son scaramantics, ancje tu?
A son chei che prin di tacâ il conciert a metin lis bachetis simpri te stesse posizion, chei che a fasin i stes mots, chei che a cjaminin sù e jù. Si viôt di dut. Jo o soi dome tant emozionade, ma no ai rituâi particolârs.
Si rivie a vivi fasint il diretôr di orchestre?
Dipent. A pene tacât, come me, no. Tu âs di mandâ il curriculum ai diretôrs artistics dai teatris o aes associazions che a organizin events e sperâ che ti cjapin. Ma al è un lavôr saltuari, che no ti permet di vê un stipendi par vivi. Cuant che tu deventis un pôc plui famôs, invezit, a son lis agjenziis che ti contatin e che a gjestissin i tiei impegns.
E cumò, cul tai gjenerâl dai fonts pe culture?
E je une vere vergogne! Dome in Italie a sucedin chestis robis. Al baste lâ in Austrie o in Gjermanie par rindisi cont che là si pense in mût diviers: la musiche e je une materie insegnade ai fruts za tes  scuelis elementârs. Forsit fin cumò i diretôrs artistics a àn vivût intune realtât privilegjade e a àn doprât mâl i bêçs, formant busis economichis no di pôc. E a paiâ, cumò, o sin nô musiciscj.
Ancje la musiche ise in crisi?
Sigûr, come che si sierin lis fabrichis, si sierin ancje i teatris. O vevi za firmât un contrat par lavorâ a Chieti, tal teatri Marruccino, par proponi lis suite de Carmen di Bizet in balet. Ma il cartelon al è stât sierât parcè che no son rivâts i fonts. Tante int e pense che fâ il sunadôr, l’orchestrâl, l’atôr nol sedi un mistîr. Invezit, nô o sin propit come i muradôrs, i inzegnîrs e i eletriciscj: o vin bisugne di lavorâ par vivi.
Valentina Pagani

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +