Antonella Nonino 46 agns e je maridade cul architet Luca Cendali, e à dôs fiis: Sofia di 15 agns e Gaia di 11 agns. Si è indotorade a Udin in lenghis e leteraturis forestis modernis e e à perfezionât i studis a la New York University e a la Sorbonne di Parîs, dulà che si jere trasferide par plui di un an. E viôt in prime persone dal “Premi internazionâl Nonino”. E je responsabile des relazions esternis, dal ufici stampe e dal marketing, e e viôt di diviers impuartants marcjâts forescj come Gjermanie, Ingletiere, Coree, Singapore e Cine.
La domande di Sgnape Nonino e continue a cressi e vuê il marcjât forest al rapresente il 39% dal faturât.
In distilarie si ocupe dai procès di distilazion e fermentazion; e je daûr a viodi di specifichis ricercjis tal cjamp in colaborazion cun esperts svuizars.
Le vin sintude dopo des sôs jessudis su la television taliane dulà che e à frontât cence pôre i politics in plene campagne eletorâl.
Cemût sono ladis chestis elezions pal Parlament?
Il grant sucès di otignût dal “MoVimento 5 Stelle” al à dimostrât la rabie de int e la necessitât di rignuvî la politiche taliane.
Pensistu che i politics che tu âs frontât in television a sedin stâts segnâts des tôs peraulis?
O ai dome pandût il gno pinsîr personâl e chel dai miei colaboradôrs e forsit di tante int comun che come noaltris e fronte dì par dì la vite reâl, mi pâr che il risultât eletorâl al à confermât chest malcontent gjenerâl.
Rome ise “dongje” o “lontane”?
No je Rome a jessi “lontane”: a son “lontans” i politics sierâts tal lôr palaç.
E il Friûl: sentinele sul confin orientâl o cûr de Europe?
O sin cûr de Europe e o varessin di visâsi di plui de funzion che al à vût il Friûl, ma o pensi ancje a Triest, pal passât. Mi à fat câs visitâ a Gurize l’an passât la mostre su Carlo Michelstädter, filosof di Gurize che o ami une vore. Te mostre si fevelave di Gurize tant che une citât straordenarie, adiritura clamade “la Nize austriache”. Si à di valorizâ lis nestris ricjecis e peculiaritâts locâls, cu la cussience che aromai il contest al è globâl.
Cemût vivie il 8 di Març Antonella Nonino?
Al è fûr di dubi che mi fâs plasê il pinsîr zentîl di cui che al regale une mimose, ma te nestre famee lis feminis a àn simpri vût un rûl no secondari a chel dal om e a àn simpri lavorât. Mê none paterne e à vuidât par tant timp la distilarie di bessole par vie che e jere vedue e mê none materne e jere mestre e e à simpri ricuardât a mê mari e a mê agne che par jessi libare e à di podê mantignîsi di bessole. Mê mari e je Cavalîr dal Lavôr (une des pocjis feminis in Italie) e cressint intun ambient cussì, par me al è stât simpri naturâl viodimi “persone pensante”, plui che femine o om. E po, tal gno mistîr, tra i lambics, il rispiet tu tal vuadagnis sul cjamp. Dal sigûr al coste fadie jessi lavoradore e mame, tu âs di organizâti la vite une vore ben, ma o confessi che lavorâ in propri ti permet di cjapâti i timps pe famee e po di recuperâju in oraris difarents di chei solits di vore.
To nono materni al leieve La Patrie dal Friûl: ce ise par te la identitât furlane?
O soi furlane, ma ancje taliane, e o soi une vore leade a lis tradizions de mê tiere sedi dal pont di viste culturâl che enogastronomic: ogni volte che o partìs par un viaç lunc, cuasi simpri par lavôr, o puarti cun me la imagjin des nestris monts che si viodi dal aeropuart intune biele zornade di soreli. Cuant che o studiavi a Parîs, ancje se la Francie e je famose pai siei formadis, a cui che al vignive a cjatâmi i domandavi di puartâmi il Montâs (che jo o lami “latarie”) e la polente.
In chest ce funzion aial il premi Risit d’Aur?
Chest premi al è stât istituît dai miei gjenitôrs tal 1975 par salvâ lis cualitâts di vîts autoctonis furlanis in pericul di estizion tant che il Sclopetin e par valorizâ la civiltât contadine e tai agns al è deventât un impuartant premi leterari: i miei gjenitôrs si son dimostrâts precursôrs su chescj argoments e chest mi jemple di braure.
Cuâl isal il to rapuart cu la lenghe furlane?
O capìs il Furlan, ma no lu feveli masse ben parcè che i miei gjenitôrs di frute no mai fevelavin par Furlan. Par me al rapresente la lenghe de mê infanzie, parcè che le sintivi a scuele cui miei compagns, cuant che o levi a zuiâ li des mês amiis in paîs e po, cuant che o soi deventade plui grande, lu ai doprât dispès in distilarie tal moment di plui lavôr. Par altri, mi è stât une vore util cuant che o levi, cun mê sûr Elisabetta, li dai contadins e dai produtôrs di vin par tratâ lis trapis tal moment de vendeme o cuant che al jere il gno turni di stâ in pese simpri in distilarie. Cressint e stant daûr dal premi Nonino, o ai imparât ancje a cognossi e amâ il Furlan ancje te nestre leterature. O ai inmò vîf il ricuart des discussions tra mê mari, Gianni Brera, Mario Soldati, Luigi Veronelli, Amedeo Giacomini, Leonardo Sciascia, pari David Maria Turoldo, cun nô trê frutis lis a scoltâju inmagadis. E po o adori lis vilotis furlanis: tantis lis cognòs a memorie e mi plâs cjantâlis e sivilâlis.
Lis tôs frutis fevelino par Furlan?
Lu fevelin pôc ma lu capissin grazie a lis personis che a frecuentin a Percût.
Une vuestre briscule e je stade la comunicazion: in chest il Friûl cemût lu viodistu?
Mê mari e partive dal sempliç presupost che la int par inamorâsi de Sgnape “Nonino Monovitigno” distilade dal papà e veve di cerçâle e savê il parcè che e jere difarente di dutis chês altris. In Friûl o vin tantis ecelencis ma o vin di fâsi cognossi di plui. Se o pensi che dispès cuant che o soi tal forest, par fâ capî di dulà che o sin, al è plui facil dî che o sin dongje de Cravuazie che no a Vignesie, al è evident che o vin inmò tante strade di fâ.
Ce isal di tignî e ce di miorâ tal Friûl di vuê?
O vin une culture fuarte dal lavôr, o sin rigorôs e o sin usâts a fadiâ. O pensi che o vin di miorâ la nestre comunicazion cul rest dal mont.
Dutis lis personis forestis che a vignin nestris ospitis, a tornin a partî inamoradis dal Friûl.
Fevelìn di elezions regjonâls: cui vincial, Tondo o Serracchiani o…?
Prin di dut o vin di viodi la scuadre che a proponin e viodi cemût che si môf il M5S.
Cence dubi Tondo al varès vût di fâ di plui sul teme des riformis ma al è impussibil di neâ che al sedi ancje une vore stimât. La Serracchiani si sta dimostrant une femine une vore dinamiche, cun ideis claris e che e fâs valê dentri dal partît e duncje in stât di dâ un contribût impuartant a la Regjon, ancje in chest câs si à di viodi ce scuadre che e propon
3 prioritâts di domandâi al President de Regjon?
Taiâ i coscj de politiche e rindi plui eficiente la machine burocratiche. Ancje se o sin une regjon a statût speciâl, no viôt parcè che la nestre Sanitât e vedi di costâ trê voltis chê de Lombardie. I bêçs sparagnâts a àn di jessi investîts pes fameis e pes personis cun dificoltâts, par rindi pardabon compagn par ducj il dirit a studiâ, par diminuî a lis aziendis lis tassis che no son mai stadis cussì altis. Ancje in Friûl tantis ditis a sierin o a delocalizin in Austrie e Slovenie e e je une pierdite par dute la comunitât.
Ce opinion âstu su lis Provinciis?
Se al è necessari ridusi i coscj al è just sparagnâ ancje acorpant lis provinciis e i ents e miorâ la lôr eficience.
Cemût viodistu il Friûl di doman?
Il Friûl al è une tiere ancjemò sane, cun grande tradizion e un passât che al à cognossût la fadie e il sacrifici duncje o viôt un avignî in positîf, o almancul jo o lavori di cheste bande.
Cuâl isal l’insegnament plui grant che tu âs vût dai tiei gjenitôrs e che tu passarâs a lis tôs fiis?
La lealtât, il rigôr tal propri lavôr e mi àn insegnât che se o crôt cun fuarce intune robe no ai di molâ mai!
✒ Christian Romanini
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +