Sfuei Mensîl Furlan Indipendent
Archivi de Patrie

La impuartance de ricercje des lidrîs: il Friûl al è dentri dal Trio Pakai

Alessio Screm
Trio Pakai e Stefano

Us conti la mê esperience di scuvierte e riscuvierte traviers de scriture dal libri su la mitiche formazion musicâl cjargnele

Prin al ven il gust di cognossi, de scuvierte, e ancje de riscuvierte. Tantis voltis si crôt di cognossi ben une robe, e alore si da simpri dut par sigûr. Ma cuant che cul lâ dal timp tu i tornis parsore, tu ti inacuarzis che alc ti è scjampât. No tu ti impensis di dut. E alore tu vâs a cirî inte memorie e tu scuvierzis che alc al è lât. Tu tornis cun buine volontât aes fonts indulà che chês robis tu lis vevis imparadis, e tu vegnis a savê che al jere ben cognossi ancje alc altri, bielzà in chel timp, cuant che si jere convints di savê dut. Chel alc di impuartant che di simpri al jere li a spietâti. E duncje, di dut ce che si crodeve di savê, si scuen tornâ indaûr par cognossi une gnove volte. Si lu ricognòs, si lu riscuvierç.
◆ Scrivi un libri, contâ une storie, ti met dispès in cheste situazion. Se si trate di une storie inventade di plante fûr, nol covente, ma se al conte une storie vere, alore ti tocje par fuarce, se tu ciris la veretât.
◆ Chest mi sucêt dispès e mi è sucedût ancje cheste ultime volte, propit tal scrivi un libri. Mi scusaran i letôrs se o dopri la prime persone par contâ cheste esperience che mi viôt autôr di une liende che e je cetant popolâr, indulà che i protagoniscj a son tra i plui rapresentatîfs de culture musicâl furlane dal secont Nûfcent, intun arc di timp che al va, in maniere uficiâl, dai prins agns Setante ai Novante. Ma a cjalâ ben, la lôr aventure e va indenant inmò cumò.
◆ La musiche, si lu à capît, e je la mê materie, e il sogjet di une “gnove” musiche furlane che e cjate il gnerf intune tradizion che e tocje il Friûl e lis tieris dongje, Austrie e Slovenie soredut, nol pues che indreçâsi bande un grup musicâl che o crôt che ducj, almancul une volte, a varan sintût a nomenâ: il Trio Pakai, o ben il tercet di Cleulis, formât dal armonicist Amato Matiz “Pakai”, dal sunadôr di liron Gjenesio Puntel e dal ghitarist Paolo Morocutti. Cu la jentrade, tal an teribil dal Orcolat, de vôs di Resie, Stefano Paletti. Un tercet che si è fat in cuatri e che al à viazât sunant no dome in dut il Friûl, tal Nord Italie, in Europe, ma ancje in Canadà, Americhe, Sud Afriche, segnant diviersis “primis voltis” inte storie musicâl furlane: primis tournée pal mont, prins tai juke-box, prin grup di un gnûf folk revival inte storie de produzion discografiche musicâl furlane, prins di une notorietât nazionâl.
◆ Su di lôr, invidât a fâlu de associazion “Giovins Cjanterins di Cleulas”, o ai vût l’onôr di scrivi un libri, il prin sul lôr cont. Che al è come dî, in cualchi maniere, di vê vût la pussibilitât di scrivi, se o pensìn di jessi par esempli in Ingletiere, la prime storie dai Beatles.
◆ E alore, tornant aes premessis, dal moment che di gjenerazions si sintin in Cjargne – la mê tiere di nassite -, tantis storiis sul lôr cont, che al somee di vê il Trio Pakai dal DNA e di sintîlu ancjemò cumò sunât des armonichis dal Friûl e di grups improvisâts, mi someave un zûc facil componi un biel volum sul lôr cont. E invezit no, ancje se mi soi divertît pardabon une vore a fâlu. E je vere, jo o soi de gjenerazion dal Otante, il Trio al à tacât tai agns Setante e i components a fasin part di une storie scomençade, pai doi che no son plui, inmò prime de Seconde Vuere Mondiâl. Pakai al jere dal ’31, Gjenesio dal ’24: il prin mancjât tal ’85, il secont, che o ai vût gust di cognossi e di frecuentâ, tal 2016. Ancje Paolo Morocutti, dal ’40, al è nassût prime de Vuere, e Stefano Paletti cuant che e jere a pene finide, tal ’47. Chescj doi, inmò cumò cetant atîfs, o ai il plasê di frecuentâju e a son stâts la linfe pe scriture dal libri, fonts diretis di tantis storiis che no si puedin plui dismenteâ, massime cumò che lis ai metudis neri su blanc.
◆ Duncje, tornâ tal profont suntune liende musicâl che o crodevi di cognossi benon, mi à metût inte cundizion “perverse” di vanzâ une ricercje inmò plui detaiade sul lôr cont, rivant fintremai a savê di robis che nancje i vivents si impensavin plui, o che propit no savevin.
◆ Al è chest ce che al vûl dî ricognossi, cognossi di plui, discuvierzi. Scuvierzi in chest câs. O ai passât rivistis, gjornâi de epoche, analizât documents, fotografiis, diplomis, letaris, domandant di ca e di là. Preseât al è stât il librut di Celestino Vezzi pai 15 agns de muart di Pakai, e sore o ai fat intervistis, o ai scoltât e analizât dute la lôr produzion discografiche cun ben 45 tocs musicâi, e nol è stât facil cjatâ fûr ducj i lôr 45 e 33 zîrs, i biei vinîi che a sunin inmò cumò miôr dai cds.
◆ Il libri si titule “Pakai. Il trio che si è fatto in quattro. Storia e aneddoti del mito musicale carnico”, al è editât de cjase editore Nota di Valter Colle, che e trate di musiche popolâr e di etnomusicologjie, duncje nuie di miôr e di plui adat. A proponimi la ricercje e la scriture al è stât il grup dai “Cjanterins di Cleules”, che di agnorums si dediche ae divulgazion de storie e de musiche dal Trio Pakai. Cun lôr, a Cleulis, tacant dal 2012, o ai direzût dal pont di viste artistic il Concors Internazionâl Armonicistic dedicât al Trio, lât indenant fin tal 2015. Insiemi o vin organizât e o organizìn diviersis iniziativis sul lôr cont, come la “Domenie cun Pakai e amîs” tal storic Bar Pakai.
◆ Il libri al è scrit par talian, ma al à dentri diviersis parts par furlan, includûts i articui che nô de “La Patrie dal Friûl” o vin dedicât ae mitiche formazion cjargnele. A son in dut 33 cjapitui curts, scrits in maniere divulgative e divertente, cuntune introduzion di caratar musicologjic par incuadrâ la tipologjie de lôr musiche intal contest alpin e mitteleuropean. Po dopo a son profîi biografics su ognidun di lôr e daspò la storie in ordin cronologjic, smiezade di sezions che a tratin dai lôr discs, dal prin al ultin, lis tantis macacadis che a àn cumbinât, tantis fotografiis storichis di archivis privâts, estrats di gjornâi, cjapât dentri il nestri, chel dal “Ente Friuli nel mondo” e dai Fogolârs Furlans di France, Canadà e Sud Afriche, letaris e altris documents. La part finâl e racuei testemoneancis di amîs e cultôrs dal Trio: Claudio Calandra, Dario Zampa, Massimo De Franceschi, i Amîs de armoniche dal Friûl-Vignesie Julie, Denis Biasin, Sdrindule, Gigi Maieron.
Scrivint, o ai imparât inmò une volte la impuartance de ricercje e il valôr des lidrîs che, come il Trio Pakai, a son par simpri. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +