Bielis lis gnovis sul Trio Pakai. Une nomee no dome furlane, amîs di tantis celebritâts

Dal libri di Alessio Screm “Pakai. Il trio che si è fatto in quattro” (Nota, Fevrâr 2023), presentât domenie ai 19 di Fevrâr te sale Sant Jacum a Paluce (a saran inmò diviersis altris ocasions di incuintri cun lui e cui protagoniscj vivents de formazion), a vegnin fûr tantis novitâts sul cont dal famôs tercet cjargnel.
◆ Tantis lis lôr burlis, come chê famose dal Fischiosauro che si è meretade la prime pagjine dal “Corriere della Domenica” dai 25 di Lui dal 1954. Si conte di fat che intal palût Letin tra Cleulis e Timau, vie pe gnot si sintive a sivilâ e vuicâ une bestie che nissun al rivave a viodi, une sorte di mostri di Lochness che al spaventave ducj ma che al stiçave ancje tante curiositât, tant che corieris di int fintremai de Austrie a lavin li par rivâ adore di savê di plui su la cuistion. Une liende durade vot agns, e ae fin no si è mighe rivât a capî nuie! Si conte però che a ideâ il scherç a son stâts Pakai e il fidât Gjenesio, che però no àn mai confermât e no ju àn mai brincâts sul fat. Un misteri restât cence soluzion.
◆ Si sa invezit cumò che i trê – e daspò cuatri: Amato, Gjenesio, Paolo e Stefano – a àn cognossût, dilunc de lôr cariere ator pal mont, diviersis personalitâts. Tra i prins, il re de armoniche taliane Peppino Principe, une vere celebritât. Si son incuintrâts in ocasion di un conciert a Vile Manin di Passarian e a àn mantignût simpri une grande amicizie, tant che al è stât propit Principe a consegnâi a Cleulis a Pakai une armoniche Excelsior, che i vevin regalade. Si sa cumò che ancje un dirigjent de BBC di Londre, Adrian Dante, al à cognossût il Trio e une letare e dimostre la sô stime pal grup cjargnel. Inmò, a son stâts presentâts di Pippo Baudo intune manifestazion a Ancone, inte Tiere dai Cjistiei, tal 1972, te epoche che lui al veve tant sucès cun “Canzonissima”. A àn ancje viert un conciert di Wesley Jones cui Milords, Equipe 84, Maurizio Vandelli e compagns, grups cetant famôs in chei timps. A àn cognossût, amions, Isi Benini, grant mestri de enogastronomie, animadôr e gjornalist. A jerin amîs di Pari David Maria Turoldo, che lu àn incuintrât la prime volte dilunc di une tournée in Canadà; di Ottavio Valerio, tra i fondadôrs dal Ente Friuli nel Mondo. A àn sunât ae Ca’ del Liscio in onôr di Raoul Casadei, a àn scherçât cun Albano e Romina, Nilla Pizzi, la soubrette Louiselle de scudarie RCA. Fintremai une riviste gjaponese e à fevelât di lôr.
◆ Tra i premis e i ricognossiments che a àn ricevût, al è il Moret d’Aur tal ’83, targhis di bande di organizazions di Cremone, Vignesie, Mondovì, in plui che dal Canadà, dal Sud Afriche e, clâr, di ogni bande dal Friûl. Prin grup folk furlan a jentrâ tai juke-box, a àn vendût miârs di copiis dai lôr discs, dîs in totâl, tra 45 e 33 zîrs, cence contâ la riedizion dal lôr repertori in 3 cds. Famôs ancje in television, il Trio al à partecipât a diviersis produzions de Rai, cuntune prime aparizion cuant che il grup inmò no si clamave Pakai, lât in onde su Rai 2. Mitiche la lôr comparsade tal senegjât Rai “Maria Zef”, cuasi dut par furlan, e intal film documentari “Nadalin”, di là des presincis inte “City Tv” e “Gloob International” dal Canadà, par no dî di “Telefriuli” e “TeleAltoBut”.
◆ Insome, une formazion che inte tradizion e à cjapât il svol par jentrâ cuntune mude inovative inte contemporaneitât di chei timps, su la onde dal bum economic tacât tai agns Sessante. Cence mai tradî la lôr origjin di musicants cjargnei, sclets, salts e lavoradôrs, la lôr e je la storie di artesans, muredôrs prestâts ae musiche, o miôr, sunadôrs prestâts al artesanât. La lôr e je une aventure che e va indenant inmò cumò in gracie di tante int, e di tancj zovins che a continuin a eternâ il lôr mît sunant la lôr musiche. La nestre musiche. ❚