Sfuei Mensîl Furlan Indipendent
Archivi de Patrie

«La impuartance dal chiosco»

Dree Venier
IL CHIOSC DI GIORGIUTTI

Interviste cun Andrea Giorgiutti, che nus conte di cemût che i chioscs tai cjamps sportîfs a son impuartants pe economie di une societât di balon, ma massime pe agregazion. Cun tantis particolaritâts propit furlanis: une vere “culture dal chiosc”

Andrea Giorgiutti, 38 agns, president de Forum Julii di Cividât che e partecipe al campionât di Ecelence dal F-VJ, al è un dai plui zovins presidents di balon dal Friûl. Grant apassionât di chest sport, se no no si podarès metisi in chest grant impegn, ma ancje grant apassionât dal “concet” (cussì lu clame lui) dal chiosc, la cjasute che no mancje scuasit mai in bande dai cjamps sportîfs furlans li che si vendin bibitis e mangjative ai spetatôrs de partide.
__
Andrea, no ducj a san che il chiosc par une societât sportive diletantistiche al è un grant fatôr di jutori economic…
Sigûr. Nol è fondamentâl, al è come vê un bon sponsor in plui, ma al da une grande man. E dopo al dipent di cemût che tu rivis a gjestîlu. Tu âs di jessi brâf a fâlu rindi: par fâ un esempli, nô o fasìn ancje alc di mangjative, che no ducj lu fasin. O pûr il rindi al dipent de struture che tu âs, no ducj a àn un spazi cuviert pal Invier.
_
Nol è dome chest, ma ancje un biel element di agregazion, no mo?
Al è un grant fatôr di agregazion e di sigûr un dai moments plui biei di un incuintri sportîf in Friûl. Ae fin de partide, ti fâs cjatâ insiemi e i compagns di scuadre si puedin cognossi miôr. Di coleghis di scuadre si pues deventâ amîs. Sei te vite, sei e je une sorte di “dâsi dongje” pe scuadre: magari cheste union e spirt comun ti puarte a vê il sburt par dâ dut e ti puarte chel pont in plui che al pues jessi determinant. E dopo al è un moment li che si confrontin ideis e li che si pensin gnovis iniziativis. Chest al sucêt massime tes categoriis plui bassis, plui insù si va di categorie, plui un zuiadôr al è “atlete” e duncje si ferme di mancul.
Une altre robe impuartante e je che il chiosc dal cjamp sportîf al è l’ultin puest di agregazion restât in tancj paîs piçui, che no àn plui buteghis o ostariis.

La int ator dal chiosc dopo la partide


__
Tu mi contavis che e je une robe che nol è cussì scontât di cjatâle ator pe Italie…
Un spirt tant che chel in Friûl lu ai cjatât ator di râr, se no che adiriture nol esist. O soi lât par un grant torneu des filiâls di une bancje in Sicilie, cun tantis scuadris. Ae fin, nol jere nuie, lôr a van a cjase o a bevi il cafè. Par fortune, furlans che a jerin za stâts a savevin la ande, e duncje a vevin puartât daûr gridele e biris, e duncje si à stât ducj insiemi, coinvolzint ducj. Ti fâs un altri esempli: pe Epifanie si fasin lis finâls di Cope Italie di Ecelence e Promozion regjonâl, ogni volte organizadis di une societât divierse. Chi di nô si tire dongje un public di 2.000/2.500 spetatôrs, ancje parcè che si fâs fieste, e invezit in Lombardie mi fevelin che pe stesse manifestazion a son 200 o 300 di lôr a viodi lis partidis.
_
Un acet che al è ancje pai arbitris, no mo?

Une robe curiose e je che une volte un arbitri sicilian ae fin de partide nus à domandât dulà che e jerie la scorte par menâlu vie, e invezit nô i vin dit: «schercistu, cumò o lin tal chiosc par stâ un pôc insiemi!».
O sai che plui di un arbitri al è content di lâ a direzi la partide li che al sa che al è un biel chiosc. Une altre storiute divertente e je che o cognòs un diretôr di gare che si è trasferît in Friûl dal Sud e cumò al arbitre in regjon: tai prins timps nol jere usât a cheste nestre tradizion e al jere difident, ma cumò si è abituât benon (al rît, ndr).
_
Cui isal che al sta daûr dal chiosc, e ce oraris fasêso?
Cui che al stâ daûr a son ducj volontaris, che si alternin in varis oraris e dîs: jo o ai un zîr di une desene di personis. Tal nestri chiosc o vin in particolâr dôs sioris dal paîs che a fasin dutis lis partidis in cjase e che a stan tacant a tignî viert ancje vie pe setemane pai gjenitôrs che a seguissin la ativitât dai fîs. Come orari, si vierç di cuant che a rivin i zuiadôrs fin tant che nol va vie l’ultin spetatôr, po! Mi visi di un an che te ultime partide dal campionât o vin sierât aes sîs di matine. O jerin restâts un trop di nô e o vin spietât il cricâ dal dì, fra cjacaris e birutis, come che tu fasis di Istât al mâr.
_
A part il vuestri, cuâl isal il miôr chiosc dal Friûl?
A ’nd è tancj che a son impuartants, no volarès fâ tuart a di nissun, e a son tancj che no cognòs ancjemò. Chei che a son tal gno cûr a son chel di Premariâs, li che al è simpri biel lâ a zuiâ cuintri de Azzurra, chel de Juventina Gorizia, e il gno ricuart plui biel al è di chel di Maran. O sin lâts là pe dispate par passâ in prime categorie: lôr a pensavin di vinci e duncje a vevin preparât 50 chilos di pes. Ae fin o vin vinçût nô e ancje gjoldût di chel ben di Diu: al è râr che si fasi il pes tai chioscs. E ae fin, ancje se chei di Maran a vevin pierdût, si à fate fieste ducj insiemi, tal spirt dal chiosc! ❚

::::::::::::::::::::::::::::::::::::::::::::::::::::::::::::::::::

FOCUS. President di une scuadre a 25 agns, il record di Matteo Menarbin

«No sai se cumò o soi il plui zovin, forsit al è un che al à mancul agns di me, ma dal sigûr par 6-7 stagjons o soi stât il plui zovin president di scuadre di balon in regjon: o ai tacât a 25 agns!» cussì mi conte Matteo Menarbin, che cumò al à 37 agns, president dal Trivignan.
◆ Matteo al à scugnût molâ il zûc atîf par vie di un infortuni. In chel moment al Trivignan, dopo agns di glorie, tant che e je stade la societât plui piçule in Italie a fâ 5 agns cence interuzion tal campionât Interregjonâl, si pative un moment di passaç. «Si stave studant dut, nol jere plui ricambi di dirigjents, che aromai a jerin anzians. Un vêr pecjât, mi vaìve il cûr par une societât che e jere stade tant impuartante» al dîs, e cussì cuant che i àn proponût di cjapâ in man la dirigjence, pûr jessint une vore zovin, al à acetât «ancje par ricognossince a une societât che mi veve tratât une vore ben».
◆ Cul jutori dai vecjos dirigjents, massime di Giovanni Forte «che cumò nol è plui e i ten a nomenâlu» al à rivât a tignî bote al moment di flape dal moviment, e cumò a tirâ sù une societât che l’an passât e je stade promovude in Prime categorie li che cumò a son cuints.
◆ No si è fat spaventâ dal prejudizis bande un president tant zovin «o vevi i bodyguards, i dirigjents anzians dongje (al rît, ndr)» e des dificoltâts burocratichis «ancje se cumò e je dute une altre epoche. No sai se cu lis cundizions di vuê o varès tacât cheste ativitât, pûr cun dute la buine volontât che o vevi».
◆ Stant l’argoment di cheste pagjine, i ai domandât dal lôr chiosc e mi dîs che «il chiosc al è impuartant par une societât di balon e in Friûl a son une istituzion uniche: o pensi che come che si vivin chi di nô no je comparazion cun altris lûcs. E a Trivignan, che al è un comun piçul, e je une des pocjis ativitâts di agregazion ancjemò in pîts. Il nestri al è un di chei li che e vâl la pene passâ: vignît a cjatânus!» ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +