Si dopre materiis primis che a rivin des aziendis agriculis dongje des cjasis des coghis
Nol è pussibil che dut al sedi gjestît e controlât di cui chel al compre e che al vent e no di cui che al fâs e che al dopre. O scugnìn tornâ a cjapâ in man lis filieris produtivis, par puartâlis plui dongje di nô, aprofitant di timps come chel atuâl, là che si rindìn cont che la robe di mangjâ e je ce che al è di plui impuartant inte vite”, al à marcât Massimo Montanari, un dai storics de alimentazion talians plui autorevui. “O scugnìn inlidrisâ a nivel locâl i sistemis alimentârs”, e zonte la sienziade ecologjiste indiane Vandana Shiva. In pratiche, si trate di valorizâ lis economiis di prossimitât, lis filieris curtis e teritoriâls de agriculture e dai aliments di cualitât. Su chest, di tancj agns incà, si fasin tantis cjacaris dismenteant di cjapâ decisions precisis, o ocasions e oportunitâts che a rivin, par esempli, cuant che a àn di fâ compris lis mensis coletivis, che a sedin scolastichis, universitariis, militârs, tai ospedâi e intes aziendis. Su lis primis si à di segnalâ che, intal 1987, la pioniristiche puarte vierte nostrane (e in dute la Italie) ai prodots biologjics e jere intes scuelis di Murùs. Di chê volte, ancje in graciis ae leç regjonâl dal 2000 e ai incentîfs publics statâi dal 2018 e seguitîfs, il Friûl-Vignesie Julie al à il primât in Italie par densitât di mensis che a àn adotât i prodots bio intai menûs proponûts ai students (almancul in part): 73,2 ogni milion di abitants (cul prin puest assolût inte provincie di Udin a 102), cuintri de medie taliane di 23,2. Stant ai dâts Bio Bank dal 2018, inte nestre regjon lis scuelis che a àn inserît prodots biologjics inte lôr propueste alimentâr a passin il centenâr e a dan fûr passe 36.500 pascj in dì.
E, alore, fasìnlu!
Lontanis des “cjadenis” dai apalts publics, lis impresis industriâls a puedin movisi cun plui libertât. A fasin cussì (cence doprâ un franc di contribûts publics), ae I.CO.P. Spa di Basilian, une impuartante imprese edîl gjestide dai fradis Vittorio e Piero Petrucco. Inte lôr mense aziendâl che, in medie, e prepare e e dâ fûr uns vincj pascj in dì, si svantin di prontâ il menù cui prodots dal teritori, doprant, in pratiche, materiis primis che a rivin des aziendis agriculis e agroalimentârs che a àn sede dongje des cjasis des coghis che a son daûr des pignatis. Si à di zontâ che la I.CO.P. e fâs part di une rêt regjonâl di aziendis che a vuelin jessi “lûcs di vore che a promovin la salût”: si clame Workplace Health Promotion e e je un program racomandât de Organizazion Mondiâl de Sanitât. A aderissin al WHP F-VJ, a vuê, une desene di impresis, ma la I.CO.P. e je la uniche che e declare e che e pratiche l’“inlidrisament locâl” dal so menù. Dut chest, savint ben che la educazion alimentâr corete e fâs ben ae salût de int, al tacuin, al ambient e ae agriculture dal teritori. ❚
