Sfuei Mensîl Furlan Indipendent
Archivi de Patrie

La gnove stagjon di “Contile juste”

............


E je tacade di gnûf la trasmission televisive in marilenghe che e fevele des notiziis de Provincie di Udin. Cul 30 di Jugn, dopo une polse di cualchi mês, e je vignude fûr la prime pontade de gnove stagjon di Contile Juste, il tg setemanâl dut par furlan in onde su la emitente locâl Telefriuli (ogni vinars aes 19.45, cun repliche di sabide aes 19.15, fin a Dicembar).
Dilunc des pontadis e ven presentade la ativitât istituzionâl de Provincie, ma ancje lis iniziativis tant che cunvignis, events, premiazions, presentazions di libris inmaneadis de Aministrazion. Intal notiziari a vegnin curâts aprofondiments su elements de culture furlane (intal 2016 e je stade fate une rubriche dedicade ae Basiliche di Aquilee, riscuvierts scrits di Riedo Puppo, cun Angelo Floramo), e in graciis de colaborazion cu la La Patrie dal Friûl e je stade proponude ai scoltadôrs la Cuintristorie de prime vuere mondiâl in Friûl.
Chest an, te gnove edizion a son previodûts spazis par spiegâ lis tradizions religjosis dai mês, par presentâ lis personalitâts che a àn puartât in alt il non dal Friûl e une visite a Palaç Belgrât, ma ancje progjets particolârs (tant che la mostre di Dieç, la iniziative gustoCarnia, la gnove biblioteche di Tavagnà che e à une grande sezion in lenghe furlane) o gnovis produzions in marilenghe (come il progjet di Docuscuele e i gnûfs imprescj pal insegnament dal furlan intes scuelis primariis, i lavôrs dal Premi San Simon…), o ancje personalitâts che a pandin la lenghe furlane intune maniere che e cjape dentri, tant che la cabaretiste Caterina Tomasulo.
Lis notiziis che la presentadore, Ilaria Gonano, e anunzie a rivuardin par plui la ativitât dal Ent e a vegnin proponudis ai scoltadôrs de bande di un gjornalist cun cognossince de lenghe furlane scrite, midiant di intervistis ai aministradôrs de Provincie o ai esperts dal setôr. Par esempli: la ativitât dal Ort didatic di vie Urbanis e ven spiegade dai ricercjadôrs che a stan lavorant su chei progjets. Il contignût di ogni pontade al ven definît setemane par setemane, cjapant dentri ancje apontaments e rubrichis.
Une novitât de ultime edizion, che come o vin dite e je partide ai 30 di Jugn, e je le gnove sigle che e cjape dentri lis trê Provinciis dal Friûl Storic: Udin, Pordenon e Gurize; ma si viodin ancje imagjins de basiliche mari di Aquilee, des Dolomitis Furlanis, de lagune di Maran, di Palme e dal mâr di Lignan. Une cartuline su la ricjece dal paisaç e de storie dal Friûl.
E come ogni tg al à un studi televisîf dulà che la presentadore e presente lis notiziis, ancje lis pontadis di Contile Juste a vegnin regjistradis inte sede de Provincie di Udin, ancje se tantis intervistis o servizis a vegnin preparâts “in esterne” e dopo metûts dongje di Telefriuli che al mande in onde il notiziari vinars e sabide di sere. Il notiziari si pues discjamâ ancje dal sît Internet de Aministrazion Provinciâl (www.provincia.udine.it); l’aprofondiment al è acessibil ancje intal portâl web di Vimeo (https://vimeo.com/album/144201).
✒ Sara Palluello
………………………………………………………………………………..
La storie: un classic de comunicazion par furlan
Contile Juste al è un classic de comunicazion par furlan, aromai. Realizât de aministrazion provinciâl, al propon notiziis, servizis e aprofondiments su la realtât de Patrie dal Friûl, in teme di economie, lavôr, turisim, culture, ambient, tradizions e timp libar.
Il program al è partît su la base de esperience dal tg Lis Gnovis, un notiziari volût dal president Marzio Strassoldo che al è nassût intal 2003 e che al leve in onde ogni sere su Telefriuli e al presentave lis notiziis di croniche de zornade. Chest spazi tal 2008, cul president Pietro Fontanini, al è deventât setemanâl, curât di gjornaliscj dal Ent (Anna Casasola, e daspò Ilaria Gonano) e dedicât ai aprofondiments.
Il formât, che al dure 12 minûts, al da spazi a trê o cuatri servizis tra intervistis e scandais, cul obietîf di valorizâ lis bielecis dal Friûl: no dome chês dal ambient, dal paisaç, ma soredut chês des “ideis”. Cun chest notiziari la Provincie e cîr di soperî a ce che al varès di fâ il servizi televisîf public talian clamât a garantî une programazion stabile ancje in lenghe furlane, a front di un dirit garantît in maniere costituzionâl pes minorancis linguistichis. Par chest, inte trasmission, si da spazi a events impuartants tant che l’inseriment des Dolomitis Furlanis tal patrimoni Unesco, lis ativitâts di studi archeologjic de Universitât dal Friûl, il Festival de Cjançon Furlane, la Fieste de Patrie dal Friûl e i lavôrs des scuelis, iniziativis editoriâls che a valorizin il Friûl, elements de culture, de economie o che e doprin la lenghe furlane. (S. Pall.)

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +