Sfuei Mensîl Furlan Indipendent
Archivi de Patrie

La gnove stagjon de Corsiche. I nazionaliscj pe prime volte al guvier de isule

............

In gracie dai risultâts des elezions regjonâls che si son tignudis ai 6 e ai 13 di Dicembar, pe prime volte i nazionaliscj a son rivâts al guvier de Assemblee de Corsiche. Cun di fat, cul 35,34% dai vôts cjapâts tal secont turni eletorâl, la coalizion Pè a Corsica e à otignût 24 dai 51 conseîrs che a formin la Assemblee: 17 espression di Femu a Corsica (che tal prin turni e veve vût il 17,62%) e 7 di Corsica Libera (7,73% tal prin turni). Ancje se cun doi conseîrs in mancul de maiorance assolude, i elets di Pè a Corsica a àn rivât a elei l’indipendentist Jean-Guy Talamoni ae presidence de Assemblee e il nazionalist moderât Gilles Simeoni ae presidence dal esecutîf de Coletivitât Teritoriâl Corse.
CHEST SUCÈS STORIC al è il risultât di fatôrs diviers: il slontanâsi dai citadins dai partîts politics “tradizionâi”; la reazion ai no des istituzions francesis pes domandis che a rivin de Corsiche; il fruçonament dai partîts politics “francês” (tal prin turni si vevin 5 listis di çampe e 4 di diestre) alimentât ancje dal “clanisim” o sei dal sisteme di grups locâi di podê; il svicinâsi progressîf des diviersis animis dal nazionalisim cors. Se il prin di chescj elements si lu cjate un pôc pardut ator pe Europe, il secont al è leât aes boçaduris o ai ritarts dai orghins di podê statâl tai confronts di posizions che, su la isule, a àn la poie de plui part des fuarcis politichis, come la couficialitât de lenghe corse (fate buine de Assemblee de Corsiche tal 2013 ma blocade di Parîs), il statût dai residents, il plan plurienâl di svilup de Corsiche, la autonomie fiscâl o la amnistie pai presonîrs politics.
LA INCRESSITE PROGRESSIVE DAL NAZIONALISIM intai ultins agns e je leade ancje ae capacitât di superâ lis divisions internis cun acuardis di program o di obietîf. Un risultât facilitât ancje de decision dal Front di Liberazion Nazionâl Cors di meti fin, vie pal 2014, ae lote armade che par cuasi 40 agns e à segnât la isule. Chel istès si trate di un ecuilibri delicât, dal moment che dongje di une fuarte pluralitât interne – Femu a Corsica e je formade di PNC, Inseme e Chjama Naziunale, intant che Corsica Libera e ten adun Corsica Nazione Indipendente, ANC-PSI e Strada Diritta – la aree nazionaliste e cjape dentri ancje altris sogjets politics plui piçui, ma vivarôs tant che Rinnovu e A Manca.
SI À PO DI RICUARDÂ CHE CHESTE E SARÀ UNE LEGJISLATURE CURTE. Cul prin di Zenâr dal 2018, di fat, si varà une uniche Coletivitât de Corsiche al puest de atuâl Coletivitât Teritoriâl formade di doi Dipartiments. Chest al vûl dî che si tornarà a votâ ca di doi agns. Dongje di vê mancul timp par dimostrâ ce che al è bon di fâ, il gnûf esecutîf nazionalist si cjate za sot dal fûc trasversâl de politiche e de stampe francese. Cheste ultime, par esempli, e acuse i nazionaliscj di vê alimentât il razisim dopo che un lûc di preiere islamic al è stât fiscât sot Nadâl a Ajacciu. I politics di Parîs invezit a àn tacât in maniere feroce Jean-Guy Talamoni par vê “olsât” fâ il so discors di insediament dut e dome par cors. ❚
✒ Carli Pup

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +