La gnove presidente de Republiche di Slovenie e sarà une femine. Al secont turni des elezions par votâ il gnûf president de piçule Republiche, par Nataša Pirc Musar – indipendente di centriçampe cul sostegn di Moviment Libertât, Democratics sociâi, Partît dai pirâts di Slovenie e Partît dai zovins – a àn votât 480.414 eletôrs, il 53,87% di chei che a son lâts a votâ. A Anže Logar, candidât indipendent di centridiestre cul sostegn di Partît democratic sloven (li che al è ancje vicepresident e li che al è deputât elet), Partît popolâr sloven, Gnove Slovenie, e Verts a son lâts 411.432 vôts, il 46,13%. Si scuen tignî cont che cussì, in totâl, la partecipazion al vôt e je stade dal 53,22% su 1.694.36 eletôrs.
◆ Tal moment che si scrîf chest articul il risultât al à inmò di vignî confermât dal dut cui esits dai vôts par pueste dal forest e tes sedis di rapresentance consolâr e diplomatiche.
◆ Nataša Pirc Musar e tacarà i siei cinc agns di mandât ai 23 di Dicembar, la dì daspò de scjadince di mandât dal president Borut Pahor.
◆ La gnove presidente e à 54 agns e e je nassude a Lubiane, li che si è laureade in Jurisprudence tal 1992. Tal 1997 e à sostignût l’esam di abilitazion a avocat. Tal passât e je stade par sîs agns gjornaliste e condutore dal telegjornâl sloven e par cinc agns condutore dal program di informazion 24ur pe rêt televisive comerciâl Pop Tv.
«Aes elezions democratichis la int e à dit ce Slovenie che e vûl. Preseâts citadins e citadinis, o jentrarai cun braùre tal palaç presidenziâl, cu la fiducie che mi vês dât. Mi impegnarai a jessi par vêr la presidente di ducj e o lavorarai cence molâ pai dirits fondamentâi dal om, i dirits costituzionâi e la democrazie» e à dit Pirc Musar daspò che e à savût i risultâts. «Mi darai di fâ plui che o pues par che si metin ducj adun insiemi sui temis strategjics. Jo o soi par une sanitât publiche di cualitât, pe sigurece, la sigurece dal om al è un teme che o sint dongje», e à dit inmò la future presidente.
◆ Il candidât sconfit, Anže Logar, al jere jessût prin in vantaç su ducj i candidâts daspò dal prin turni di domenie, ai 23 di Otubar, cuant che i vôts che al secont turni a son lâts a Pirc Musar a jerin dividûts cun chei altris concorints.
◆ Daspò vê savût il risultât, Logar si è congratulât cun Pirc Musar. «Al è tal interès di ducj vê une buine presidente. Nataša e sarà une buine presidente, se nus scoltarà ducj. Daspò e varà la nestre poie tal superament des diferencis, di chês che a gjavin l’aiar aes velis. Diferencis tra nô a son e a saran. Chest nol pues jessi un ostacul par no metisi adun tal cirî soluzions comunis. Par chest o sburti ducj chei che a àn votât par me a complasêsi cu la prime presidente di Slovenie», al à dit il candidât sconfit, che cul so 46,13% di preferencis al podarès ancje viodi vierzisi cualchi altre puarte.
◆ Plui di cualchidun al spere che un politic plui zovin – e Logar al à 46 agns – al cjapi il puest dal bielzà prin ministri Janez Janša ae vuide dal Partît democratic sloven, che cumò in Slovenie al è il partît di oposizion principâl. ❚
La gnove presidente de Republiche di Slovenie e sarà une femine
Luciano Lister