LA FABRICHE DAI… LIBRIS. Scûr di lune – contis par ducj i guscj

Scûr di lune l’ultin libri di contis di Checo Tam jessût pe golaine La Comugne de cjase editore Kappa Vu, al è pardabon une biele discuvierte. Il libri al è dut biel: dal formât (comut di tignî in man e di lei sedi in tren che distirâts sul sofà) ae imagjine di cuviertine (che ti fâs vignî gole di vierzilu par viodi ce che si plate daûr di chel voli), passant pal gjenar di cjarte doprât.
Nancje a dîlu però, la robe plui biele a son lis contis. 37 storiis che nus puartin dentri tal mont, reâl e imagjinari, di Checo Tam.
Par cui che, ancjemò, no lu cognòs Checo Tam al è un dai plui poliedrics personaçs de culture furlane contemporanie. Al à publicât une altre racuelte di contis e un romanç/radiodram, al à vinçût un premi S. Simon e chel pes senegjaduris cinematografichis dal Centri Espressions Cinematografichis di Udin, di agns al condûs su Radio Onde Furlane il program cult Indigo, al à colaborât cun cetancj grups musicâi e cun Francis and the Phantoms, il so ultin progjet, al à vinçût la edizion 2008 dal Premi Friûl.
“Gotic, ironic, furlan” al è stât definît e, di fat, chestis trê peraulis a descrivin ben ancje Scûr di lune.
Te racuelte Checo nus fevele de sô vite di frut a Pavie, di un mont e di personis che aromai no esistin plui, ma ancje di fantasience, e di cemût che e je nassude la sô passion pe musiche, par un gjenar che cuasi nissun al cognosseve. Jo e Berto Fari e je pardabon divertente, no si pues fâ di mancul di ridi e di imagjinâsi l’efiet che al à di vê fat un dai prins dark a Pavie! Cussì come che si reste di stuc cuant che si rive da pît di La storie di Meni Fari. Ma ognidun di nô al cjatarà alc di so almancul intune di chestis contis.
Lis storiis si lein di corse, finide une si à subit voie di tacâ chê altre. La lenghe doprade e je vive, Checo al à une biele maniere di zuiâ cu lis peraulis: lis imagjins, i sunôrs, i colôrs, la lûs, i sintiments a jessin de cjarte e a deventin reâi.
Di chest libri no us conseìn dome la leture, ma ancje la scolte. Se us capite che Scûr di lune al sei presentât des vuestris bandis, lait a scoltâ l’autôr che al lei lis sôs storiis e o restarês dal sigûr inmagâts.
Federica Angeli