LA FABRICHE DAI… LIBRIS – Letare pro Giulietta e Romeo

Preseât sâr diretôr,
che mi permeti cualchi piçule note, sul intervent di Carrozzo (Ce celebrâ dal 1511?) sul ultin numar de Patrie.
1. Bielzà “contraponi” dôs musis di une stesse medaie mi somee pôc storic e mancul che mancul leterari, oltri che pôc seri e funzionâl a une informazion e pretint dai parevoi o pregjudiziis che confondedin la ideologje cu la storie. Lis lotis e la storie di amôr, tal nestri câs, a son storichementri complementârs cun buine pâs di Carrozzo.
2. A volê informâsi ben, la rivolte furlane e je stade dome une des tantis fatis tal rinassiment (e nancje la plui sanganante: che si pensi dome a lis vueris hussitis) e partant no je “ni sostanziâl ni origjinâl” si no pe concomitance cul Carnevâl e cu la lote jenfri i clan dominants, i vêrs manovradôrs dal dut – su chest troi si môf ancje il saç di Muir – che a finissin te storie di Lucina e Luigi cu lis sôs conseguencis su la leterature. I fats, partant, a son cetant peâts.
3. La indicazion, ripuartade, di Reitani – che al à grande impuartance tal discors dal Carrozzo – e che e viôt la grandece dal mît dome te elaborazion di Shakespeare sfantant il valôr storic de sô origjine furlane, le consideri imparie di un che mi saltàs fûr disint: «dal moment che dal pont di viste leterari a esistin i Vanzei, i intervents dai Paris de Glesie, lis Enciclichis… biel che dal pont di viste organizatîf o vin Pauli, i Conseis e i rezents (Papis) de Glesie… fats chescj che a son i reâi fondaments de grandece dal catolicesim, a ce covential Gjesu Crist che in fin dai conts al jere un fi di un marangon e nol à fat altri che predicjâ e finî mâl?»
4. Sigurementri dordele e je la afermazion che no acete ancje il fat che «la capacitât di pinsîr (…) si calcole [in base] a ce che al è biel e impuartant par chei altris». Cividât, Aquilee… in chest câs a varessin di lâ a taponâsi considerât che a àn une nomee internazionâl e che (si viodi il câs dai mosaics de basiliche) a son stadis scuviertis e esaltadis soredut di int di fûr. No dome: in pratiche dute la storie artistiche e leterarie umane no larès plui ben…
La int serie, invezit e par solit, e verifiche la informazion che rive sedi su la sô impuartance in base ai destinataris, sedi su lis sugjestions che a puedin rivâ par rindile miôr, procès che al è par se evolutîf.
SANDRI DI SUALD