LA FABRICHE DAI… LIBRIS – La art di contâ ai fruts

Al contrari di ce che si podarès pensâ la leterature pe infanzie e je une forme artistiche une vore sofisticade e dificile di fâ ben.
Se o cjapìn par esempli i albums ilustrâts, si cjatìn denant di oparis che a àn plui nivei comunicatîfs. Di une bande e je la storie contade dal test, dongje a son i dissens, che par solit a son une altre storie te storie. Se po dopo il libri al è scrit par furlan i nivei comunicatîfs, e lis dificoltâts, a cressin.
Spes tal test dal autôr (o tradutôr), soredut se al ven de leterature par “grancj”, a jentrin in zûc dinamichis leadis ae grafie, al ûs de coinè o des varietâts e a la “necessitât” di cirî peraulis il plui lontan pussibil dal corispondent talian, che a fasin cori il riscjo di slontanâ masse il test de lenghe dai fruts. Chest no vûl dî che e ledi doprade une lenghe puare o banâl, anzit, ma si à di rivâ a liberâsi des paranoiis dai adults.

Al va ancje marcât che a voltis no je juste la sielte de part grafiche, contentantsi, pes ilustrazions, di un nivel masse diletantistic.
Dal pont di viste linguistic lis robis plui interessantis a vegnin di chei che cui fruts a lavorin, par solit  mestris o animadôrs. E esist dute une produzion di tescj, cun pocje circolazion e cuntune stampe spes amatoriâl e magari aprossimative, che e rive a jessi dongje al regjistri linguistic just pai piçui.
Dal buligâ di chest ambient a son vignudis fûr tal ultin an oparis impuartantis come i libruts cu lis aventuris di GiatUT o l’audiolibri “l’Arbul feliç”.
Cul audio (duncje cuntun nivel di complessitât in plui), Lussia di Uannis e continue su la strade di chê che e je probabilmentri la plui grande autore moderne di tescj furlans par fruts, Marie Fanin, vere e proprie teoriche dal savê contâ a vôs.
Il so librut di cualchi an indaûr “une Cjase cussì cussì e altris contis” al è un

vêr tesaur platât de leterature tout court, opare di riscuvierzi e valorizâ che no sfigurarès di sigûr denant a che dai  grancj autôrs modernis di oparis pe infanzie.
Maurizio Biasizzo