LA FABRICHE DAI… LIBRIS – Cuatri stagjons dal an, Contis de disincressite

Si che par solit, cuant che si à di cjoli alc, la prime robe che si fâs e je informâsi, provìn a cjacarâ di chest libri a fuarce di domandis.
Ce libri isal?
Cuatri stagjons dal an” al è un libri di contis scritis di Gianfranco Pellegrini.
Un librut picinin (11.5×17), incartonât in brossure, di 78 pagjinis, vignût fûr pe cjase editore Kappa Vu. Il titul al è peât aes cuatri contis principâls, une par stagjon, ma dentri a ‘nd è ancje altris dôs contis plui picininis e une jentrade di Bepi Mariuz. Lis cuviertinis a ripuartin dôs temparis di Evaristo Cian.
Ma l’autôr cui isal?
Gianfranco Pellegrini al è dal ’54 e al è a stâ a Val di Reane. La sô passion pes tecnologjiis, pe logjiche e pe algjebre a doi valôrs lu à puartât a cjatâ lavôr intal cjamp de informatiche. Al è convint che la scriture e sedi il just completament par considerâ uman” il discors, al à vût insegnât furlan e al à publicât contis sul Strolic, su lis rivistis Sot la Nape e La Comugne e sul blog Contecurte.
Ma ce isal dentri, di precîs?
Dutis lis contis presentadis a metin dongje temis diferents, ma che a àn ducj in comun il passâ dal timp e lis stagjons de vite dal om e de societât, in gjenerâl. Gianfranco al scrîf cuntun furlan une vore net e elegant, che al fâs risaltâ lis ambientazions e lis descrizions dai personaçs. Al cjape ispirazion de tradizion par contâ emozions. Inte prime conte, par esempli, un pari e so fi a cirin di brusâ nuiemancul che une strie ma, lant indevant a lei, si capìs che il cûr de conte al è l’om che si dismentee, sdrumât malamentri de tecnologjie e de modernitât, dal rapuart cu la nature e cu la bielece des piçulis robis di ogni dì. Cussì ta chês altris contis, dulà che al somee che si cjacari di aganis, di drâcs o di fantasimis, ma a la fin si conte il pericul che l’om al deventi simpri plui frêt e lontan dai sintiments.
Ma a cui puediâl plasê?
Al plasarà di sigûr a chei che a gjoldin de biele scriture in lenghe furlane, fate di peraulis e mûts di dî che in dì di vuê a corin il risi di lâ pierdûts. Al plasarà ancje a chei che a àn gust di sintîsi contâ une storie che e misclici il savôr romantic cun chel de modernitât, cence dismenteâsi di meti dentri un tic di fantasie.
E a cui che si abone a la Patrie dal Friûl al plasarà ancje il presit promozionâl: o podarês ordenâlu cu la formule + regâl” zontant 5 euros al presit dal abonament par un an.
Raffaele Serafini