LA FABRICHE DAI… LIBRIS – Cuant finissie la fature di un scritôr?

Se lis motivazions par che un al tachedi a scrivi a puedin jessi difarentis, la ambizion finâl e je dut câs chê di vignî let. Un probleme no di pôc soredut pal autôr in marilenghe dulà che il numar di letôrs potenziâi al è bas e ancje chei pôcs a son dificii di cjatâ, nol fos altri che par fâi cognossi la esistence de opare.
No si à di pensâ che une volte finît di scrivi e publicât un libri la vore dal autôr e sedi finide, al contrari il lavôr al è ancjemò lunc parcè che si à di cirî di promovilu, di fâlu cognossi, di vê segnalazions e recensions. Un biel berdei pai autôrs furlans che di une bande si cjatin denant a la indiference dai mass media in lenghe taliane, di chê altre spes no àn la capacitât o la mentalitât par cirî di movi lis robis finint cul fâ des promozions masse diletantistichis.
Cun cheste ande se Manzoni al diseve di vê vincjecinc letôrs un Manzoni furlan al rivarès a fâ savê di vê scrit i siei “Promessi Sposi” sì e no a un cuatri cinc di lôr.
Al va dite che tai ultins agns si è viodût ancje alc di difarent, il câs plui interessant al è probabilmentri stât chel dai Gnognosaurs di Dree Venier e dal mût che al è stât doprât internet cuntune strategjie moderne e professionâl di promozion dai libris.
Dal rest al è ancje di marcâ che cuant che si cîr di coinvolzi il public cun spetacui tirâts fûr di oparis o adiriture cun leturis diretis a vôs alte, un alc di interès lu si cjate simpri, a dimostrâ che, no cate l’analfabetisim e la difidence viers la lenghe scrite, lis potenzialitâts a esistin.
Maurizio Biasizzo