Fin chi o vin cirût di meti a fûc il dam grandonon che i è stât fat al popul furlan cu la robarie di chel patrimoni sociâl, culturâl e identitari che Vignesie nus à puartât vie. Une sioretât di miârs di agns gafade cun grande arogance e spirt di supremazie di chê “aristocrazie comerciâl” di lagune che e voleve fâsi simpri plui grande e potente inte suaze europeane e dal Orient di Mieç, sburtant cu la sô diplomazie, peant aleancis e incrosant strategjiis, sparniçant dut intor une rêt di infiltrâts convints a cooperâ cul Leon a sun di monede. E mi pâr che i fats esponûts a vedin bielzà stiçade la reazion di plui di cualchidun. Benon! “Lasse pûr che al vai il cierf ferît, e chel scjampât che al salti dulintor: parcè che il mont al zire tra chei che a son sveâts e chei che a restin indurmidîts”. Ma no vin ancjemò considerade la strategjie politiche e militâr doprade par rivâ adore a scjafoiâ il principât patriarcjâl: une imprese mighe di pôc, stant che al jere un stât fuart e ben organizât, inserît intun contest politic, chel imperiâl, che al garantive une sigurece e un control ancje a nivel sorenazionâl. Come simpri cuant che si fâs une analisi storiografiche, bisugne tignî cont di tancj elements che si instrecin e che si influencin un cun chel altri. Tacant dal plan de economie, o podaressin dî che la presince simpri plui fuarte dai Turcs tes rotis nautichis dal mâr Mediterani e intai trois carovanîrs dai Balcans e veve di sigûr destabilizât la “Dominante” che, intal zîr di dusinte agns, e jere sbrissade intun declin lent ma inesorabil. Cetant diferente la Vignesie dal ‘400 di chê de Ete di Mieç, simpri plui avide parcè che spauride. La cussì clamade “cuarte crosade”, chê dal 1204, e fo inmaneade propit de Serenissime par nuie interessade a deliberâ Jerusalem (che anzit la flote di Sant Marc no je nancje mai rivade in chel an in Palestine), ma pluitost cun chê di dâi une bote, e grande ancje, ae citât di Bisanzi-Costantinopoli, antighe nemie intal control dal stret Bosforeion, il passaç impuartant par jentrâ intal mâr Neri, viers des planuris de Crimee. Duncje une Republiche che e meteve in scac un Imperi. E cumò invezit, intal principi dal secul XV, ancje par vie de nassite dai stâts nazionâi e pal cambiament radicâl dai ecuilibris internazionâi, la pierdite de centralitât economiche dal Mediterani, la grande potence simpri plui peade a gnovis formis di economie bancjarie e di invistiment puartade indevant dai stâts atlantics e baltics si sintive in cualchi maniere scjafoiade. E clopave. E veve bisugne di sigurece. E voleve fâ un “grant invistiment imobiliâr”, par doprâ une imagjin dai nestris timps. E la Patrie dal Friûl i someave un bocon no di pôc: cjistiei e badiis che a garantivin il control teritoriâl e che di secui a controlavin la produzion agricule, tant intensive di lus (vin e ancje vueli) che estensive paniç, buine di garantî no dome la sussistence, ma ancje une ecedence cussì impuartante di podê jessi metude sul marcjât. E chest, ancje in virtût di citâts “gruessis” (Spilimberc, San Denêl, Vençon, Tumieç, Cividât) là che il cumierç al jere ben inviât, cuntune classe borghese inteligjente e scaltride, inseride intune rêt che e cjapave dentri la vocazion antighe dai marcjadants nostrans, bogns di rivâ fin a Cracovie, Praghe, Viene, Buda e Pest, Zagabrie e Lubiane. In plui, si mantignivin contats fuarts cu lis placis plui sioris de aree toscane, in particolâr par vie dal len ma ancje dai peçots di lane. Par fuarce che une realtât cussì ben metude e faseve gole: però bisugnave rivâ a fruçonâle di dentri, se si voleve glotile. E cheste e je simpri stade le strategjie dai venezians: prin di dut indebilî, roseâ, sgnervâ, tirâ a ciment. E, dome ae fin, dâ il colp di gracie. No par nuie, une des detulis plui in ande a Vignesie e ricuarde che “l’acqua marsise i pai”. Un pôc ae volte. Baste vê pazience. Pandi velen, colpî e spietâ. Un lavôr durât plui di cent agns, disìn di daspò Marquart di Randeck inlà. Il grant patriarcje le veve capide plui che ben, dopo la vuere par controlâ la lagune jenfri Chioggia e Maran, se ai 7 di Otubar dal 1380, pôcs mês prin di murî, al scriveve: “I cjapitanis venezians a fasin patî in ogni maniere la Glesie di Acuilee e il so popul cul fûc, cu lis robariis e cu la rapine, massime in tiere di Istrie, doprant la potence des lôr galeis”. Prime di doprâ lis sgrifis al (cui, Marquart, te sô rispueste di difese? O Vignesie tal so atac? Se Vignesie, alore “e”) veve di costruî un teoreme ideologjic che al justificàs la azion militâr. Cuâl? Baste spietâ il numar de Patrie di Avost par savêlu. ❚
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +