Sfuei Mensîl Furlan Indipendent
Archivi de Patrie

La critiche ae masse, “un cuarpat cence cjâf ” pront a vendi la sô libertât

Agnul Floramo

Al fo tra i prins a inacuarzisi che imprescj sofisticâts tant che la television a son plui potents di ogni altre forme di convinciment

CJANT – Societât di masse > Nassût intal an de marce su Rome e cressût in chei dal Venteni fassist, Pasolini nol podeve fâ di mancul di sintî fuarte la presince di chê societât di masse che si sta formant propit su la prime sossedade dal ‘900. Al percepìs di subit ce mostri pericolôs che al pues jessi il popul cuant che al rinunzie a pensâ, e al devente, come che al diseve Nicolò Machiavelli, un dai autôrs che al nestri i plasevin di plui, “un cuarpat cence cjâf”, simpri pront a vendi la sô libertât pûr di jessi “sodisfat e imbambinît”. Ven a stâi rinunziant une volte par dutis a chel lambic che di simpri al rapresente il pinsîr critic, un carûl che al oblee a fâ i conts cu la cussience, e par chest – cualchi volte – ti gjave il sium. Miôr duncje durmî, magari cussì no ancje cence indurmidîsi, lassant che a sedin altris a fâ la sielte par nestri cont. Al è cetant miôr lassâ il tamon a cualchidun che al à la fuarce e la ambizion par tignîlu ben strent. Delegâ par no cjapâsi sù nissune responsabilitât. Ubidî, magari ancje crodi e scombati. Murî, forsit. Ma pensâ no. Mai. I disastris di cheste mentalitât a vevin puartade la Italie fin dentri de panze di une des piês ditaturis de storie, par jessi ae fin glotude di chê vuere mondiâl che a Pier Pauli i veve puartât vie ancje Guido, so fradi.
◆ Ma cuâi jerino i struments che il regjim al doprave par rivâ a controlâ la int? Si jere convint, Pasolini, che une opare di convinciment e devente une vore plui fuarte di ogni azion violente. Che anzit: se a di un tu i dâs un pataf, chel al pues ancje rispuinditi cuntun pugn. Ma se tu lu incantesemis in cualchi maniere, come che al fâs il sunadôr di pifar cul sarpint, alore tu puedis domandâi di fâ dut ce che ti covente. Intai siei scrits critics, il nestri al dimostre di vê capît che il lengaç al è il plui grant strument di convinciment. Eh sì, la retoriche che ancje Marcus Tullius Cicero al veve esaminade tant che une arme une vore potente, buine di pleâ al so podê cualsisei animâl. E ce isal il popul se no une bestie pal paron che lu pee tal cjaruç, i met il muars inte bocje, i tapone i voi par che no si distrai, e se dal câs lu vuiscje par che al vadi indevant plui svelt?
◆ Benon! Il lengaç. Che no vûl dî dome “lenghe”. Dut al devente “lengaç” in chê rêt complicade e plene di grops che e cjape dentri ogni forme di comunicazion, dai vistîts ae architeture, e cussì ancje la musiche, la scuele, i gjornâi, il teatri. Il cine: “La cinematografia è la arma più forte”, a son peraulis di Mussolini. Che al promôf “Cinecittà” a Rome. E l’Istitût “Luce”, che al varès cjantade la epopee dal fassisim e dal so duce. Ma Pasolini no si contente. Al è convint che, muarte la ditature, la mentalitât fassiste si fos platade di cualchi bande. E cuant che une malatie e devente “endemiche” al è un lamp e ve che e torne, magari cuntun altri non, une altre forme. Ma la sô pericolositât e reste. E cussì i pericui che e compuarte.
◆ Al veve capît, Pasolini, che la sô tane plui comude e sigure e reste propite la sfere de comunicazion. Si jere inacuart che il pericul al tornave fûr propit intai agns dal boom economic, sclopât une volte finide la fase de “ricostruzion fisiche e morâl dal Paîs”, come che e diseve la gnove classe politiche vignude fûr sot de forcje di plaçâl Loreto, a Milan, cuant che tancj di chei che a vevin saludât “romanementri” cumò si inventavin une gnove piel, ma sot a jerin restâts simpri lôr. E anzit, il pericul al jere deventât ancjemò plui grant, dal moment che i struments par pandi une vision dal mont e imponile “al popul bestie” si jerin fats simpri plui potents e sofisticâts. La television prime di ogni altre forme di convinciment e deventave il plui pericolôs di ducj chei eletrodomestics che aromai a fasevin part de mobilie di une cjase borghese. E chei che no vevin i bêçs par comprâle si cjatavin a viodile te ostarie. O inte sagristie dal plevan. ◆ Lis pagjinis plui modernis scritis di Pasolini, lis sôs argomentazions metudis dongje intai dibatits publics, a son propite chês che a tocjin la potence di convinciment di chê scjatulute là che cualchi valvule e un tubi catodic (une volte e funzionave cussì!) si trasformavin intun curt circuit cerebrâl. Mode, costum, architeture dal pinsîr, sielte lessicâl, impostazion ideologjiche: la television e jere subiete al control des comissions parlamentârs che le programavin (e che a domandavin ae politiche e ae morâl catoliche lis istruzions par doprâle tal miôr des sôs pussibilitâts!). E educave. E formave. No dome cu lis lezions dal famôs mestri Alberto Manzi, che al varès scuelade une Italie ancjemò analfabete dai schermis de RAI. Ma cun dut chel “aparât liturgjic” che, di Gigliola Cinquetti fin a Mike Bongiorno, al varès catechizât il popul talian. Cence plui bisugne di vueli di ricin o di baston. ❚

:::::::::::::::::::::::::::::::::::::::::::::::::::::::::::::::::::::::::::::

DISCJANT. Letare ai pasolinians

DISCJANT. Cjars pasolinians, perdonaitmi la impudence, la eresie, l’afront, che dal sigûr us varà stiçade plui di cualchi puce, a voaltris che o sês – o crodês di jessi! – i sacerdots di chel cristat insanganât bandonât tant che un toc di cjar fraide su la splaze di Ostie, e cjatât propit te dì dai muarts dal 1975. Ai 2 di Novembar. Intune albade grise, che al prin colp e somee cussì diferente di chê altre che e nulive di Vierte e di lûs, cuant che un altri Crist come lui, tibiât compagn, al à berlât al mont la sô Pasche di resurezion dome dopo de becjarie de sô Passion. Ancje in chê volte i predis – int fate sù cu la vuestre stesse paste! – a àn gafade la ocasion buine par inventâsi une glesie, une veretât, la lôr, pandint la sacralitât di un “verbum” cetant lontan di chel che al lusive sot des ceis di Yehoshua Ben Youssef, il fi dal marangon di Nazaret. Un che al stave dongje des putanis, dai laris, dai sassins, dai usuraris, e che al condivideve cun lôr il pan e il vin, il sac là che al durmive e la place indulà che al insegnave. Simpri fûr dal templi. Lontan di ogni liturgjie. Denant di ogni ricognossiment ae catidre e preferint la vite. Ce àno fat, i predis? A àn copât l’om par fâ nassi un diu. I tornave comude, dal moment che l’om al jere scomut. Ve mo. Se o podès judâmi cuntune associazion di ideis – si licet magnis componere parva – par rivâ a capî la operazion che in chescj agns o vês fate cun Pasolini, mi ven di pensâ ae “invenzion” di une mitologjie, o ae celebrazion di un dogme. Ae istituzion di une glesie, cul so vanzeli, la sô liturgjie. ◆ E ancje il so tribunâl potent e dispietât de Sante Incuisizion, là che o clamais a presentâsi, e po dopo o condanais cence remission, ducj chei eretics che no le pensin come voaltris. Che al è ancje piês. Pasolini vivent, o saressis stâts ducj dentri te sô smire di inteletuâl bastian contrari e ledrôs. Us varès sbeleât, cjapâts a vuiscjadis, contâts come esempli di ce che no si varès mai di fâ, parcè che o sês la incjarnazion perfete di chê ipocrisie che lui al à vivût fin dentri di se, acetantle tant che une contradizion sufierte, part di fonde dal so vivi disarmonic e disordenât, degn di cjant e di discjant. Fin te dì de sô muart. Us ai cognossûts di dongje, magari cussì no, tant che aromai us smicji di lontan. No ridês mai. ◆ O sgagnîs, cualchi volte, cu la tristerie dai prins de classe. Une riduçade crudêl. No di plui. Parcè che nol pâr bon jessi legris, dal moment che il dolôr de vuestre mission us puarte simpri, intune cundizion di soference mistiche, a svolâ parsore dal uman. O rivi a olmâus ancje cuant che o metês sù la mascare. Operazion che us ven simpri tant ben. Parcè che i timps a cambiin – come i assessôrs ae culture de Regjon! – ma voaltris o vês il costum just par ogni ocasion. ◆ E al sarà simpri cualchidun che us fasarà jentrâ te cubie di chei che a svantin la braùre dal invît. Critics leteraris, docents universitaris, professôrs, ricercjadôrs, regjiscj, scritôrs di leterature o di teatri, ma ancje filosofs, sociolics e sepi Diu ce altri: us plâs meti dongje de vuestre profession il titul nobiliâr di “impegnâts”, come se il rest dal mont no lu fos e al vivès la buine ore lavorant dibant – magari in fabriche, o tai cantîrs, intun ufici o intune corsie di ospedâl: dute robe che no conte, si capìs – par sudâ il franc che al puarte une gruse di pan su la taule di cjase. O vês pierdût il contat cul popul. Che o dispreseais profondementri, dal moment che nol è studiât come che o sês voaltris, cu la culture che e je dome un titul di spindi in societât, o di picjâ dentri di une suaze su la parêt di cjase. O vês disimparade chê lenghe, fate di blesteme e di cjant, che o pretindês di studiâ tes oparis di Pasolini. No savês nancje cuale che je la sô rabie profonde. Il so marum. O sês masse ocupâts a cirîlu tes metaforis, tes alegoriis, tes visions fatis di ingjustri, no di sanc o di sudôr. Une preiere: tornaitnus PPP. L’om, cun ducj i siei difiets. Cu la incongruence dal so vivi, spieli dal so pinsîr. Liberaitlu di chel pipinot che o vês inventât “a vuestre imagjin e someance”. Lassaitlu libar tant che “un spirt di amòur / che al so paìs al torna di lontàn”. Amen. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +