Sfuei Mensîl Furlan Indipendent
Archivi de Patrie

La cognossince su la rêt come un valôr par creâ relazions sociâls e gnove economie

Matteo Baldan
DOMITILLA FERRARI AL TEDXVERONA
DOMITILLA FERRARI AL TEDXVERONA

Gjornaliste e blogger indicade di Wired tai prins 50 talians di seguî su Twitter, @domitilla e à lis ideis claris su cemût che vuê e va intindude la Rêt.
◆ Prin di dut, i social network a permetin pe prime volte la creazion di rêts sociâls ibridis – fatis tal stes timp di leams digjitâi e di rapuarts fisics – che a screin un gnûf spazi sociâl, la inter-realtât, une vore plui maleabil e dinamic des rêts che a jerin prin.
Cumò la rêt e je di plante fûr un spazi popolât di natîfs e di imigrâts digjitâi, ven a stâi lis personis che a son cressudis cuant che Internet ancjemò nol jere. Chescj ultins no àn i vantaçs dai natîfs digjitâi, ma a puedin adatâsi ae inter-realtât.

Domitilla Ferrari
Domitilla Ferrari

I social network a son tecnologjiis che a rindin facile la socializazion, ma no le àn cambiade: «che tu fevelis inlinie cul to vicin di cjase o cuntun amì che si è trasferît in Australie, chel che tu fasis al è coltivâ une relazion. Come cuant che tu dopravis dome il telefon o lis e-mail». La tecnologjie, duncje, no rint debile la nestre capacitât di creâ e di coltivâ relazions. Anzit, vivi la Rêt al è tiessi  amiciziis parcè che «la amicizie e je une materie prime».
◆ Par fâ sù il miôr network possibil, al covente lât daûr ai conseis de autore. Bisugne sielzi cun atenzion la int di zontâ: «come cuant che si fâs un casting par cjatâ i atôrs juscj pal rûl di amì», e spieghe la Ferrari. Si scuen pontâ su la cualitât, e no su la cuantitât dai contats. Il valôr di un network nol è dât dal numar di personis che si cognòs, ma di chês che a rispuindin cuant che si à bisugne di scambiâ une opinion, domandâ un sclariment o metisi in contat cun cualchidun. La finalitât no je chê di cognossi tante (o ancjemò piês, masse) int, ma personis interessantis pe nestre vite personâl e lavorative.
◆ Une rêt, a ogni etât e in cualsisedi situazion, e nas de condivision di afinitâts e interès comuns. Bisugne cussì meti in comun ce che si sa, cence pôre di pierdi lis nestris competencis, stant che un consei regalât a chei altris no nus fâs plui puars. Anzit.
◆ Insiemi aes istruzions par fâ cressi i nestris networks, Domitilla Ferrari nus da grampis di conseis par vivi ben in rêt. Nus vise, par esempli, che bisugne doprâ il cjâf e che «jessi risiervâts sui social network nol è un cuintrisens […], ancjemò masse dispès tocje viodi amîs, coleghis e cognossints che a condividin detais masse personâi». E sburte a no fâ peteçs, che a puartin vie timp e che a fasin straçâ energjie. E e racomande di no fevelâ mai mâl dal nestri lavôr. In sintesi, e sotlinie che «ce che si semene, ae fin si cjape sù».
◆”Due gradi e mezzo di separazione” (Sperling & Kupfer, 181 pagj., 17 euros) al è un test svelt che a voli al pues someâ banâl, ma che a una seconde leture si pant profont, tant che une racuelte di proverbis. Proverbis che o ricognossìn valits, ma che o stentìn a cjapâ sù: par chest al covente tignîju iniment. ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +