Sfuei Mensîl Furlan Indipendent
Archivi de Patrie

La cisile, simbul de primevere (o Vierte) tal imagjinari dai furlans e intune innomenade cjançon

............

«Je tornade Primevere». Al baste intonâ chestis trê peraulis par inviâ lis bielis vôs dai furlans ae famose cjantose di Luigi Garzoni: Cisilute. «Ancje tu, tu sês tornade / cisilute ti vuei ben / vorès dâti une bussade / e tignîti sul gno sen.» Chestis riis, come dute la cjançon, il test al è di Giovanni Battista Gallerio, si poin plenis di serenitât su di une melodie di sium.
Un cjant che al è al stes timp preiere e niçule, come il svol di une cisile che e torne e che e mene cun se, par dut il Friûl, il cîl celestin e l’aiar fresc. Un cjant di amôr, tra i plui bei dedicâts al volatil simbul di chest mês di Març. Un invît a gjoldi la Primevere che e rive, disincjantâts e plens di sperancis, zuiant e cjareçant la cisile che e ven.

Come che al dîs il poete: «Fâs culì la tô cjasute / di stecuts e di pantan», l’uciel lizerin cu la code a so mût, che si poie sui cuvierts e al fâs il so nît, al è jentrât tal imagjinari dai furlans tant che simbul di pâs, di cjase, e la vilote di Garzoni e à cognossût, a dî il vêr in pôc timp, une largje fortune e diviersis versions. Dutis bielis, in virtût de spontaneitât de musiche e des peraulis dal origjinâl. A partî di cheste, a ‘nt son nassudis variis voltadis in forme corâl, in maniere spontanie o plui organizade, magari a cuatri vôs masculinis, come chê cjantade dal Coro de A.N.A., o chês par vôs soliste, interpretadis di Dario Zampa, Beppino Lodolo, la zovine Zuleika e cetancj altris, fin ae version resinte in clâf soul dal FVG Gospel Choir. Il cjant Cisilute nol va mai in dismentie.

A partî dal proverbi: «San Benedet, e torne la cisile sot dal tet», il leam tra l’autôr Luigi Garzoni e il peraulant paisan Gallerio, la cisile, e in gjenar i simbui dal Friûl plui sclet, nus invidin a pensâ aes bielis Primeveris furlanis passadis. Scoltâ – e ce tantis versions che si cjatin su internet! – ma inmò miôr, cjantâ cheste cjançon, nus stice a fâ biele la gnove stagjon. Nus invoie a cjatâ in dutis lis Primeveris, e al vâl ancje par cheste, la cisilute amie dal nestri Friûl. «Reste pûr, reste poiade, / cisilute, su chel len». ❚

✒ Alessio Screm

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +