Sfuei Mensîl Furlan Indipendent
Archivi de Patrie

La Cineteche di Glemone, un patrimoni furlan di interès mondiâl

Sara Traunero
LABORATORI DIGJITAL (ALESSANDRO DEZAN AL SCANSIONADÔR)

Interviste a Livio Jacob su lis potenzialitâts
e sui progjets pal avignî de istituzion
che e ten cont di plui di 23 mil peliculis

No ducj a san che in Italie a son cinc cinetechis che a fasin part de FIAF (la Federazion Internazionâl dai Archivis dal Film, che e da adun lis istituzions principâls che si dedichin ae conservazion e valorizazion dal patrimoni cinematografic mondiâl) e che si cjatin, in maniere rispetive, a Rome, Turin, Bologne, Milan e… a Glemone.◆ La Cineteche dal Friûl, cu la sô sede principâl tal Palaç Gurisatti, devant dal Domo di Glemone, e da acet a un patrimoni filmic e extra filmic (libris, rivistis, opuscui, documents, fotografiis, locandinis, manifescj) di prin ordin, pardabon vere ponte di diamant de nestre Regjon. ◆ La sô storie e tache a pene dopo dal taramot dal 1976, cuant che un grup di apassionâts di cine di pôc plui di vincj agns e organize une serie di proiezions intes tendopolis. Intal Avost dal 1977, Angelo Humouda, fondadôr de Cineteche Griffith di Gjenue, al ven in Friûl e al consee a chel grup di fantats – che intant a àn fondât il cineclub Cinepopolare par racuei fonts par tornâ a fâ sù a Glemone une sale cinematografiche – di creâ invezit une cineteche. ◆ Fasint tesaur dal insegnament di Humouda, e ven acuiside une prime colezion di cines. Intai agns dopo, il nucli di peliculis si inricjìs, intant che si instrecin leams e colaborazions cun altris realtâts regjonâls tant che il Centri Espressions Cinematografichis di Udin e Cinemazero di Pordenon. ◆ Vuê il patrimoni filmic de Cineteche dal Friûl al è di plui o mancul 23.000 titui in pelicule, tra cine di finzion, documentaris e cinegjornâi, che a son conservâts intal Archivi Cine, un dipuesit moderni screât intal 2008 inte zone artesanâl di Glemone, cun trê celârs climatizâts pe conservazion des peliculis e doi laboratoris: un analogjic, dulà che lis peliculis a vegnin esaminadis, comedadis, netadis, catalogadis, e un digjitâl cun scansionadôr di ultime gjenerazion. ◆ O vin intervistât Livio Jacob, president de Cineteche, che al è un dai fondadôrs.


__
Cuâi sono i obietîfs di fonde che si da la cineteche?
“L’obietîf principâl che al è ae base dal nestri lavôr al è chel di preservâ e di valorizâ te maniere miôr il materiâl cinematografic che o vin a disposizion, cjapât dentri chel che al tocje la nestre regjon. Par cheste finalitât, al ven fat un lavôr pardabon curât intal nestri Archivi Cine. Ancjetant impuartantis a son la cure, la catalogazion e l’inzornament de biblioteche, emeroteche, videoteche, fototeche e manifestoteche: i materiâi di chestis colezions a son a disposizion pe consultazion di students e ricercjadôrs inte sede di Palaç Gurisatti, e par une part dai libris e dai audiovisîfs al è atîf ancje il prestit esterni.”
__
Cemût valutaressial l’andament di cumò de cineteche?
“Intai ultins agns o vin partecipât a cualchi bant ministeriâl che nus à permetût di preservâ e di restaurâ in maniere digjitâl tancj dai cines plui preziôs che o conservìn, in cualchi câs copiis unichis; o vin ancje une buine ativitât di scambi e di prestits di peliculis cun altris archivis e festivai. ◆ In merit aes visitis in sede di students e ricercjadôrs e al prestit di libris e videos, pe cualitât dal servizi di consulence bibliografiche che o ufrìn e la cuantitât di materiâi che o metìn a disposizion, il potenziâl al è dal sigûr plui alt a pet dal numar di utents che o vin cumò. Forsit o sin penalizâts de posizion periferiche, ma o invidi cui che al è interessât a fâ un piçul sfuarç par rivâ inte nestre biele Glemone.”
__
Cuâi sono i progjets in cors e chei dal prossim futûr?
“In chest moment o stin lavorant ae preparazion des Zornadis dal Cine Mut di Pordenon, nassudis intal 1982 de colaborazion cun Cinemazero, e vuê un dai festivai internazionâi plui impuartants dedicâts al cine prime che al rivàs il sonôr. La edizion numar 42 e je in program tal Teatri Verdi di Pordenon dai 7 ai 14 di Otubar. ◆ In ocasion dal 60m aniversari che al è stât copât John F. Kennedy, o sin daûr a organizâ cul Comun di Glemone une mostre là che a saran metûts fûr tancj materiâi dal nestri consistent Fonts Kennedy. La mostre e sarà screade tal Cjistiel di Glemone ai prossims 22 di Novembar e e restarà vierte fin ai 6 di Jugn dal 2024. A completament de esposizion, si fasarà une grande rassegne di cine a teme tal Cine Sociâl, la sale cinematografiche di Glemone che la Cineteche e gjestìs di plui di cuindis agns. ◆ In fin, pai 60 agns de tragjedie dal Vaiont al sta par vignî fûr un nestri gnûf DVD, cun documentaris di epoche e un libret par cure di Carlo Gaberscek.Cjalant un pôc plui indenant, si svicine il 2025, l’an di Nova Gorica e di Gurize Capitâl Europeane de Culture. Sedi la Cineteche dal Friûl sedi lis Zornadis dal Cine Mut a saran presintis intal calendari dai events organizâts par cheste ocasion impuartante, che e darà visibilitât no dome al teritori di Gurize ma a dut il Friûl.” ❚

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +