Là che i ricuarts dal passât a vegnin metûts a disposizion dal avignî

A son simpri di plui i carinzians che a mostrin interès pe archiviazion digjitâl. Inte “topoteche”, il materiâl che al salte fûr di archivis privâts al ven metût a disposizion di ducj, proferint un viaç passionant intal passât.
◆ Ogni famee e à un so piçul archivi privât, bondant di fotografiis – e dispès ancje di filmâts – che a divegnin di un passât ancje avonde lontan. Si trate di documents che a mostrin edificis, manufats, paisaçs o personis in cetantis situazions de vite. Dispès a son tignudis a la buine, dentri di scjatulis di carton in cjascj o cantinis umidis e a vignaran butadis vie dai dissendents che no sintaran plui il rapuart cul passât che chescj documents a incjarnin. Cussì il passât al larà par simpri in dismentie.
◆ La iniziative “TOPOTHEK – unsere Erinnerung” (TOPOTHEK – la nestre memorie) si à proponût la finalitât di tignî cont ducj chescj documents intes lôr formis pes gjenerazions che a vignaran. Cul jutori de popolazion, chest materiâl storic privât al vignarà metût al sigûr e fat disponibil par jessi doprât de comunitât. Il gjestôr de iniziative al è ogni comun singul che al partecipe al progjet. Fin cumò intal web a son acessibilis 12 topotechis comunâls, intant che l’an passât ancje il Land al à sburtât un progjet compagn, che sul imprin al veve previodût di cjapâsi sù i coscj di inviament par 30 comuns. Par vie dal grant interès – di chê strade si jerin bielzà iscrits al progjet pursì 35 comuns – il consorzi al à slargjât il finanziament a 50 comuns.
◆ Daûr di dut chest, l’istitût di formazion carinzian al à inviât un progjet vuide par judâ lis topotechis inte lôr viertidure, cun chê di dâ une man soredut a chei comuns che si zovin di personâl volontari sore nuie. Il progjet vuide al previôt sedi la formazion dai incaricâts sedi la sensibilizazion de popolazion a colaborâ in formis variis al progjet. Si trate di imparâ – par altri – a meti lis didascaliis justis, ma ancje a savê di ce che al rivuarde i dirits di autôr e – ben clâr – a doprâ i programs pe archiviazion digjitâl.
◆ Par fâ un bon lavôr si metin adun dispès incuintris cui chei a àn furnît materiâl, e chest si fâs par vê informazions che a sedin plui completis e precisis pussibil.
◆ Lis pussibilitâts di doprâ une topoteche a son tantis. Prin di dut si trate di une ocasion straordenarie par riprodusi la storie di valadis, tantis voltis lassade di bande par vie che a son sul ôr de “Storie”, chê cul “S” maiuscul; ma si puedin scandaiâ ancje lis feveladis, i costums, lis usancis, la toponomastiche e v.i.
◆ Cun di plui i materiâi a puedin coventâ ancje par ricercjis, esposizions, mostris, percors fotografics, tesis di lauree e ancjemò altri. Nome l’archivi fotografic di Bad Bleiberg, par esempli, al à plui di 1600 fotografiis.
◆ Si trate di un progjet che al podarà vê riscuintris positîfs ancje pai studiôs de nestre regjon o par chei che a cirin i lôr vons, lâts intal Carantan cetant timp indaûr par cirî lavôr e po dopo stabilîts venti sù. ❚