L’inventôr Ermanno Taboga di Buie le presente intun event speciâl ae fin di Fevrâr a Dartigne
Il futûr de armoniche al è in Friûl. Il famôs strument popolâr a soflet – nassût a Viene graciis a un brevet dal organâr austriac Cyrill Demian, che ai 6 di Mai dal 1829 al à depositât il prin brevet dal accordion, e intal stes an il fisic e inventôr britanic Charles Wheatstone al à inventât la conciertine inglese – al cjate in chest secul la sô evoluzion plui inovative daûr dal estri di un furlan. Il creadôr de armoniche dal futûr, che al è za presint, si clame Ermanno Taboga e al è di Buie. Al è lui il pari de armoniche “Matrix”, cussì si clame chest gnûf strument, biel a pueste come il famôs film, parcè che si trate di une armoniche che e ven di un altri mont.
◆ Ermanno al è un progjetist, un inventôr, un organâr che al à une formazion e une grande esperience intal cjamp de eletroniche, vint lavorât par agns intal ambit industriâl de gruesse açalarie, risolvint problemis di automazions e aplicant otimizazions a procediments une vore complicâts.
◆ Però, fin di frut, al à une passion fûr di misure pe armoniche, che al à studiade par un periodi de sô adolessence, e pal orghin, tant che al à fat lis scuelis mediis in ’seminari, e al è li che al è restât inmagât pe prime volte dai siei sunôrs.
◆ Daspò la vite lu à puartât a lavorâ tal cjamp des tecnologjiis e de eletroniche, ma ae fin al à rivât a realizâ il so sium. Ven a stâi meti il so inzen a servizi de art musicâl, de organarie in particolâr. E cussì al à molât dut e al à viert, cuntun caric di esperience par nuie indiferent, la dite “Termisound” che e à cjase a Buie. Une dite che si met al servizi pe progjetazion eletroniche e pe creazion di brevets e softwares inte musiche. Progjetazion eletroniche hardware, sistemis a microprocessôrs, realizazion di controi par orghins a canis, robis di chel altri mont, al ven di dî. Ma no si pues no tignî cont che, no dome la fruizion de musiche, ma i stes struments musicâi, a son simpri di plui leâts aes tecnologjiis.
◆ E lui le met, la tecniche e la mecaniche, come nissun altri, tal cûr dai orghins e cumò des armonichis. Tant al è espert e pratic che, tra lis tantis robis, al à fintremai progjetât e costruît lui, di plante fûr, l’orghin de glesie di Avile di Buie, screât tal 2007. Al colabore ancje cun cjasis organariis di nomee internazionâl, come la “nestre” dite Zanin e la Klais Orgelbau di Gjermanie, tant che al è pront di instalâ cun lôr inte glesie di S. Nikolai, a Amburc, un grant orghin proporzionâl a cinc manuâi. Tornìn ae armoniche.
◆ «La armoniche Matrix – nus conte – e je nassude in colaborazion cuntune dite che e costruìs armonichis a Castelfidardo, il centri mondiâl di chest strument. Si clame Beltuna, e je une cjase artesane che e à une storie cetant prestigjose. E stave cirint soluzions par sostituî lis parts mecanichis tradizionâls cun atuadôrs eletromecanics». Cence lâ masse dentri di cuistions tecnichis, parcè che il discors al pues deventâ un pôc complicât par cui che nol è pratic de materie, i domandi di continuâ.
◆ «Par tramit di organârs che o lavori cun lôr, mi àn contatât, e jo o ai rivât adore di realizâ daûr des lôr intenzions un sisteme articolât ma che al funzione in maniere perfete, indulà che al strument armoniche, che al reste dal dut acustic, i vegnin zontadis une serie di funzions avanzadis cence precedents».
◆ I domandi a Ermanno Taboga ce che in pratiche al sucêt, stant che il strument inte sô estetiche nol cambie in nuie. I domandi ancje ce che al pues fâ il sunadôr di armoniche cuntune “Matrix”, a diference di une armoniche tradizionâl, sedi a piano o cromatiche.
◆ «Se un al cognòs cemût che e je fate une armoniche, al sa che la part çampe, la botoniere, e la part a man drete, a piano o a botons, no comunichin tra di lôr in maniere mecaniche e ognidune di chestis parts e à une serie di levis articoladis che a gjestissin i regjistris, lis vôs. Cu la armoniche “Matrix” e sucêt une rivoluzion, cuntune grande pussibilitât di “manovre aumentade” e creazion dai regjistris, par esempli, cuntune ricjece di cumbinazions cence precedents: 28 regjistris pai acuardis e 28 pai bas siolts. Si pues – par dî une altre tra lis novitâts – sunant cu la tastiere di drete, fâ sunâ lis vôs di çampe. Dut al devente plui organizabil in maniere comude, e a nivel creatîf a son ancje li cetantis plui pussibilitâts. Dut graciis ai atuadôrs eletromecanics che a son dentri dal strument e che a implementin dut ce che al è tradizionâl. In plui, si pues lavorâ su lis dinamichis, tal atac o tal molâ i tascj, par vê une jentrade plui lente, o imediade, o dolce, o espressive. A son tantis lis novitâts e tancj armoniciscj a son restâts une vore impressionâts».
◆ Di no confondi in maniere assolude cu lis armonichis digjitâls o midi, la armoniche “Matrix” e manten in dut il sun, o miôr, i sunôrs vêrs de armoniche, in dute la lôr purece e bielece, pûr no mancjant di parts, come dî, evoludis.
«E à une batarie dentri, acumuladôrs al litio che a son bogns di durâ ancje 20 e passe oris, e si pues usâ dongje ancje un tablet, cu la funzion di programadôr, indulà che l’esecutôr al pues programâ in maniere libare, cence limits, lis secuencis dai regjistris che al vûl doprâ. Al pues impostâ daûr tantis sieltis la regolazion, ancje cuntun pedâl atîf vie bluetooth, cussì dut chest al funzione di bessôl parcè che al è programât, tant che in cheste maniere il sunadôr al pues dedicâsi dal dut ae esecuzion, ae interpretazion, cence vê altris fastidis o distrazions».
◆ Sabide ai 25 di Fevrâr al sarà pussibil scoltâ cheste siore armoniche, sedi inte version a piano che cromatiche, dilunc di un event a jentrade libare tal Teatri di Dartigne. Tal dopomisdì, cui che al vûl, al podarà provâ il strument in dutis lis sôs funzions. La sere invezit, tacant des 20.30, si varà il plasê di gustâ un conciert cun musiciscj che a àn cjapât ben confidence cu la “Matrix”: Cristiano Lui cul so Trio Mètro, formât di armoniche, ghitare e vôs, e Andrea Coruzzi, talents che a savaran incjantâ, esaltant te miôr maniere la unicitât de creazion dute furlane dal nestri mestri Ermanno Taboga. ❚
