Sfuei Mensîl Furlan Indipendent
Archivi de Patrie

La Amazon cjargnele che e puarte la spese tai paisuts

............

Si clame www.risparmioservito.it la gnove frontiere dai servizis a domicili in Cjargne. Un sît internet dulà che i citadins dai 28 comuns a puedin sielzisi i prodots che a vuelin e po dopo ur rive la spese diretementri in cjase tal zîr di 24, massim 48 oris. La idee i è vignude a Ottorino Faleschini che al è cognossût par jessi il sindic di Paulâr (e une volte ancje assessôr provinciâl pe mont) ma che cheste volte al va incuadrât tant che imprenditôr tal setôr dal cumierç. Faleschini al à volut proponi intune dimension locâl ce che Amazon, il negozi online plui nomenât intal mont, al à tacât a fâ tes grandis citâts. Cjariât sul web, il sît al ufrìs miârs di prodots, a presits competitîfs, de verdure ae cjar, dal pes ae paste al vin, ma no dome. Si pues decidi ancje di comissionâ servizis di lavandarie e di stirarie, paiament di boletis, ricjariis di celulârs e manutenzions de machine.
I OBIETÎFS DI FONDE
Trê i obietîfs che a fondin il progjet: rivâ a dâ servizis pe int di chei paîs dulà che nol è restât plui nuie, e in Cjargne a ’nd è un grum; dâ une oportunitât in plui a cui che par problemis di lavôr nol à timp di lâ al supermarcjât, e garantî une vetrine online par chei prodots dal agroalimentâr dal teritori che a vuelin espandi il lôr marcjât. Pal moment, la societât creade di Faleschini – che e à tant che base logjistiche il comun di Damâr, ma la prospetive e je chê di svilupâ il servizi ancje in Valcjanâl e Cjanâl dal Fier -, e je rivade a strenzi aleancis cun vot impresis des valadis de Cjargne, si fâs fuarce cuntun personâl di sîs personis che a son destinadis a cressi cul lâ dal timp, e il sisteme di consegne de spese (fat midiant di corîrs o mieçs de dite) al è stât pensât in maniere che nol incidi masse sul presi dai prodots (che duncje a puedin rezi la concorence) e che al client i costi sigûr di mancul che cjoli la machine e, par esempli, movisi des frazion al cjâf lûc o a Tumieç.
INTERNET A MISURE DI ANZIAN
Cualchidun al podarès domandâsi cemût che dut chest al puedi lâ incuintri aes necessitâts des personis anzianis che cun internet no àn un biel rapuart. Prin di dut, bisugne dî che in plui che cul computer i ordins si puedin fâ ancje par telefon. Par chest, Faleschini al sta lavorant in acuardi cui Cral che a son ancjemò vierts in cualchi borgade (Liussûl, Dieç, Cleulis, Rualp e Val…) in maniere di creâ grups di acuist che a puedin puartâ vantaçs aes personis dal paîs, che duncje a varessin un pont di riferiment fisic dulà lâ a ordenâ o ricevi la spese o cjatâ diretementri i gjenars di prin consum (pan, lat, vueli, sâl, e v.i.). Al moment dut il progjet, fat partî a metât dal mês di Avost, al è in fase sperimentâl e al sarà screât uficialmentri ae fin dal mês di Setembar. Une altre idee che Faleschini al volarès introdusi gradualmentri, e je chê di integrâ il sisteme de consegne de spese ancje cuntune formule di car-sharing, ven a stâi che un viaç di lade pe consegne de spese, al pues deventâ tal stes timp un viaç di tornade par compagnâ cualchidun che se no al dovarès spietâ la prime corse utile de coriere di linie. “Te nestre tiere – al conte Faleschini – no je vere che dut al sta lant a murî, e je ancjemò sperance, baste tirâsi sù lis maniis, colaborâ, sfrutâ la tecnologjie e no butâsi simpri jù. Tai nestris paîs o vin ancjemò une cualitât de vite invidiade di tancj, nus sta a noaltris tornâle a rindi buine a nivel di servizi”. ❚
David Zanirato

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +