Jù lis mans dal Tiliment

Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che al meretarès?
◆ Al è un destin strani chel di une lenghe di aghe che e somee nassude par dividi. E ancje vuê che la tecniche, i mieçs di traspuart e di comunicazion a podaressin scancelâ la milenarie demarcazion “di ca e di là da la Aghe”, une gnove division e ven creade tra i furlans de Alte e chei de Basse. I seconts, preocupâts par cuistion de sigurece di Tisane e des areis dulintor des rivis dal ultin trat prin de fôs; i prins, dal fat che lis oparis che a varessin di protezi chestis zonis a ledin a creâ dams ancjemò plui grancj al teritori, glotint cjasis, cjamps e ativitâts economichis. Nol pues jessi che la Regjon e sielzi soluzions che a metin furlans cuintri furlans, i timps dal “Divide et impera” a son finîts di un pieç. Si pensial che la int e stedi cidine come i cinês devant de costruzion di dighis che a sfolin milions di personis? Ce sino, in Friûl-Cinesie Julie?
◆ Secont aspiet. La costruzion di autostradis ise ce che nus covente pardabon? Isal chest il model di disvilup che o sielzìn intune ete che e varès di jessi chê de sostignibilitât, dal no straçâ energjie e teritori? La Cimpel-Glemone e varès un sôl vantaç: cjapâ il trafic che al vignarà fûr de Pedemontane venite che aromai e je finide e tancj a stan doprant in alternative ae A4, trafic che se no al sglonfarès la circolazion su la Pontebane o su lis statâls 463 e 464. Ma la Pedemontane venite e je stade costruide in 20 agns e e je costade 2 miliarts e mieç; i abitants dal Friûl-Cinesie Julie staressino cidins se ur cjolessin vie dal belanç che al è fat cu lis lôr tassis une cifre dal gjenar intant che la sanitât e va a patràs e la economie e je in zenoglon?
◆ Intant che o spietìn di viodi cui che al sarà il “Grant Tamonîr” che al fasarà il Plan cuincuenâl dal 2023-2028, forsit al larès sclarît a chei che a àn voie di fâ dutis chestis maraveis un concet une vore sempliç. Se tu lu cjalis suntune mape, il Friûl al à la forme di une fuee. Ogni fuee e à une gnervadure, e la nestre e je il Tiliment. Se a une fuee tu i crevis la gnervadure, e cole daurman: e se no lu fâs a colp, lu fâs sigûr prin di chês altris.
◆ Alore, jù lis mans dal Tiliment: se no si vûl crevâ la coesion de int furlane, covente rifleti e cjatâ soluzions diferentis fasint dialogâ lis comunitâts e no creant mûrs che a deventin simpri plui alts e plui pençs se no je la mediazion dal bon sens a butâju jù. La sience e la tecniche vuê a rivin a fâ miracui e disastris, ma e je la Politiche che ur da ordin di metisi in vore. ❚