La Giant Trees Foundation, cun sede a Tarcint,
e vise: «La bugade di brut timp no je stade
une fatalitât. E si ripetarà ancjemò»
«Invezit che dâ bêçs a cui che nol fâs nuie, il redit di citadinance che al coventi a sostignî cui che si da di fâ e che al oriente lis propriis sieltis di vite par che la mont no mueri»: Andrea Maroè, president de Giant Trees Foundation, nassude a Tarcint, ma cuntune cjalade che si slargje a dut il globi par cambiâ il mont tacant dai arbui, al jentre a pîts unîts intal dibatiment politic su la prossime leç di belanç.
__
La vuestre analisi e je clare: no sin devant di une fatalitât, ma dal risultât di diviers erôrs fats intal passât su la gjestion dal teritori. Di cui sono lis responsabilitâts?
«Cu la dibisugne di vê di plantâ arbui par produsi legnam, tantis cuestis des monts dal Friûl de Alte a son stadis popoladis cu lis stessis speciis, cun plantis coetaniis e cuntune disposizion une vore fisse, cence valutâ la specificitât dai terens e dai lûcs. Dopo, chest bosc costruît dal om al è stât bandonât a se, in tancj câs par vie dal dispopolament. Dut chest al à influît in mût determinant inte calamitât des setemanis passadis, che purpûr e je stade ecezionâl, ma che intal prossim futûr e je destinade a deventâ la norme».
__
Trop ise difondude cheste situazion di pericul inte mont furlane?
«Vuê la situazion di emergjence e somee passade, ma in realtât e je dome scomençade. O vin pierdût il patrimoni boschîf che o varessin vût di doprâ intai prossims 4 agns, plui o mancul il 20% dai nestris boscs. Ma il dam plui grant al sarà chel sucessîf ae catastrofe, intal sens che i boscs ferîts dal brut timp a deventin tant plui delicâts e sometûts ancje aes intemperiis di intensitât minôr. A laran indenant a colâ i arbui e, une volte gjavâts vie i troncs che a son colâts, il teren al sbrissarà a val cu la prime ploie e lu cjatarìn dut a Lignan e a Tisane. Duncje, si varà di pensâ no dome a rimplaçâ i boscs, ma ancje a dâ un regjim aes aghis e a creâ barieris par frenâ il slavâ dal teren, se di no no savarìn nancje dulà plantâ arbui gnûfs. Si varà di tornâ a pensâ a ce plantâ, cemût e dulà».
__
Il probleme al è tant complès: di mieç al è il dispopolament de mont, i terens a son di proprietât privade e il sfrutament dal len al domandarès une filiere moderne che e pues jessi promovude dome des aziendis privadis dal setôr. Di dulà scomençâ?
«La nestre propueste e je chê di preparâsi a frontâ altris avigniments estrems gjenerâts dal cambiament climatic, ricostruint un tiessût economic e di lavôr in mont. Al moment, no vin implants di seis in stât di lavorâ volums alts di legnam, ni di stocâlu par doprâlu intai moments che il presit al è favorevul, robe che cumò e sarès tant utile dopo de ondade di brut timp che e à provocât la colade des cuotazions. Chest però al vûl dî ripuartâ la int a stâ e a lavorâ intal teritori di mont. A van dâts incentîfs fuarts ai zovins par tornâ o par insediâsi. Il redit di citadinance dinlu a cui che al torne a vivi e a lavorâ in mont!».
__
Al è un lavôr enormi, che al durarà decenis, par introdusi une rotazion culturâl dal bosc… Di dulà si aial di partî?
«Il progjet de nestre fondazion al è chel di racuei fonts, inte iminence dal Nadâl, vendint i ramaçs e lis pontis crevadis dai arbui butâts jù dal aiar. Cun chescj bêçs, o volaressin creâ boscs sperimentâi su variis cuestis de Cjargne, caraterizâts di diviersis tipologjiis di terens, cun plantis diviersis di etâts diferentis. I risultâts no saran ciert imediâts, ma a tocjaran diviers decenis, ancje se cualchi buine idee e podarà vignî sù za tant prime. Il bosc al à di jessi plantât dome intes zonis adatis, e ognidune cu lis speciis adeguadis. Inaltrò, lis cuestis a àn di tornâ a prât o al massim a varan di jessi popoladis di cualchi baraç, alaçs e piçul arbossits a cressite lente».
__
Une variabile fondamentâl e je dade però dal redit dal bosc: se in passât si son plantâts pôi o peçs al è par une ricercje disperade di dâ un rindiment aes tieris altis…
«A van plantadis essencis preseadis buinis di dâ une rispueste economiche par cui che al lavore il bosc, ma al è un invistiment plurienâl che al à ciclis di 40 agns o plui luncs. O vin di cjalâ il rindiment dal bosc no dome pal legnam, ma ancje sot forme di difese de diversitât biologjiche, dal aspiet paisagjistic e turistic, de difese idrogjeologjiche. Par chest, cui che al lavore il bosc al merete une poie tant che il redit di citadinance, parcè che al prodûs resis, esternalitâts positivis che dopo a colin su dute la coletivitât e no dome su chê de mont. Si trate di rindi sostignibile une ativitât che pai prins 10-15 agns no sarà profitevule dal sigûr. Infin, e va ricostruide une filiere industriâl dal len che intal timp o vin pierdût». ❚
Roberto Pensa
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +