Tu vâs vie di cjase a vincj agns, lassantti daûr chel paisut sul ôr de Basse Furlane, indulà che la tiere si lasse lenzi des ondis oziosis di marine.
Prin di partî, ancjemò un salût a chel mont di dute la infanzie, par jemplâti i voi e il cûr cun chê largjure cuiete di aghe e ancje cul tor di chê gleseute dedicade a un forest, par rivâ infin ai amîs, ai fradis e a to pari e tô mari, che ti cjalin ingropâts, ma plens di sperancis pal to avignî.
Sì, parcè che il to nol è un “addio ai monti”, e no dome pal fat che tu vegnis de lagune, ma soredut parcè che no tu sês daûr a bandonâ dut par scjampâ vie, par platâti di un destin nemì: tu tu i coris incuintri al to doman, il spirt lizêr e plen di siums, ma tal stes timp ancje cjamât di sgrimie e determinazion.
No je une valîs di carton, ma un russac sportîf che ti compagne tal to viaç viers di une gnove aventure e viers di un mont avonde grant par rivâ a tignî dentri il to desideri, chel di vinci lis Olimpiadis.
E cussì, metudis te sachete bielzà dôs Copis dal Mont under 20, tu partissis, tignint ben ad a ments ce che i tiei ti àn simpri insegnât: il rispiet pes regulis, par chei altris e pai tiei valôrs.
Po dopo, rivade a Rome, jentrade tal Grup Sportîf Olimpic dal Esercit, a tachin lis primis dificoltâts: l’usâsi a di une realtât cussì diferente di chê di cjase, il passaç a une categorie superiôr e chel sintîsi simpri un pas masse indaûr a pet di chei altris. Ma tu no tu molis, tu strenzis i dincj e tu i dâs di comedon, cun umiltât e sacrifici. Cussì, al rive il moment che dute chê fadie ti torne indaûr tantis pomis indoradis: un om che ti sta daûr ancje te preparazion atletiche, la lauree, doi titui di Campione taliane, l’arint tai Europeans assolûts a scuadris…
E, ae fin, ve che e rive la clamade tant spietade pes Olimpiadis di Londre, a rapresentâ la Italie, savint ben che jenfri il public no saran dome lis bandieris tricolôrs a jevâsi sù, ma tal aiar e svolarà ancje la acuile dal Patriarcjât, in fieste par te.
Si podarès tacâle cussì, la storie di Mara Navarria, zovine di Cjarlins che tal 2012, a mancul di 30 agns (la fantate e je dal 1985) si à vuadagnade la sô prime convocazion aes Olimpiadis.
E la aventure in chescj agns e je lade indenant intun clime di flabe, stant che, dopo di Samuele, zoie rivade tal 2013 a rindi ancjemò plui speciâls lis concuistis di une “mari atlete”, Mara Navarria e à a pene puartât a cjase il so prin titul di Campione di Cope dal Mont di spade te categorie dai Assolûts, lant a concuistâsal nuie di mancul che in Cine, a Wuxi, ai 22 di Lui passâts.
O vin vude la ocasion di fevelâ cu la campione di scherme intun moment di polse a Cjarlins, prin che e tornàs a svolâ pe Americhe e po dopo cui sa viers di cualis medaiis.
__
Campione mondiâl di spade: Mara si spietavie chest risultât?
«Ben, a dîle dute, ancje sì. O soi daûr a lavorâi parsore di agns par rivâ a chest risultât. Il gno obietîf a son lis Olimpiadis: il titul concuistât in Cine al è une sorte di goloset cjapât sù par strade in spiete di Tokyo 2020».
__
Ce savôr aie cheste vitorie par une che e je cressude intun paisut dal Friûl, intun mont “sempliç” e cuiet? Saressial cambiât alc se jê e fos stade la fie di un industriâl milanês?
«No crôt che al sarès cambiât cui sa ce, in cont di risultâts, parcè che chei a vegnin dal alenament. Di sigûr, però, no varès il stes estri tal fâ lis robis. O soi cressude cun spirt di sacrifici, parcè che i miei mi àn insegnât a no molâ mai, ma a tignî dûr e a lâ indenant, ancje dopo des sconfitis. Cun di plui, vignî di un paisut ti fâs sintî di jessi part di une comunitât, che ti sta daûr e e ten par te».
__
A proposit, o ai savût che a Cjarlins i àn fate fieste, a pene che e je tornade, cun tant di sunâ di cjampanis.
«E je stade une emozion grandissime. O soi rivade che e jere gnot, cu lis cjampanis che a sunavin e la int che e vignive fûr di cjase par fâsi fâ une foto o une firme. O soi stade cetant braurose, parcè che o ai sintude la vicinance e il leam cu la mê tiere».
__
Une sodisfazion che e ripaie di tantis faturis. Fevelìn dai alenaments, une vore intensîfs, ma ancje inovatîfs, come chei sot aghe.
«Di cualchi an, dongje dal gno mestri Roberto Cirillo, e dal gno om, Andrea Lo Coco, che al è ancje il gno preparadôr, tal gno grup di lavôr si son zontâts ancje Alessandro Vergendo (origjinari di Muçane) e Rosarita Gagliardi, istrutôrs di Apnea Accademy. Cun lôr mi aleni in pissine cun esercizis di rilassament, respirazion e apnee aplicâts ae scherme. Al è un lavôr impuartant, che mi jude a gjestî miôr il respîr in pedane e in plui mi fâs ancje stâ ben».
__
No jerin dubis, viodût che o stin fevelant cuntune atlete che cuatri mês dopo dal part e jere za pronte pai Campionâts dal Mont. A proposit, Mara Navarria e je ancje la inventore dal hashtag “#mammaatleta”.
«O vîf il sport tant che une espression di salût e o ai creât chest hashtag par condividi i sucès cun gno fi. Al è impuartant vê un ambient seren, jo o soi fortunade, parcè che il gno om mi poie e mi jude. Samuele al viôt dut chest e al è content dai risultâts di sô mari».
__
Passìn ae famee di Cjarlins, inalore. So pari (Diego Navarria, sindic di Cjarlins e ancje president de Assemblee de Comunitât Linguistiche Furlane) al è une vore impegnât a pro de identitât furlane. Ce pensie di cheste sô mission?
«O poi dut ce che al fâs, parcè che al è impuartant jessi cussients des propris lidrîs e si à di jessi braurôs
di puartâ indenant la nestre culture. O ai la fortune di jessi cressude intune famee che mi à insegnât il valôr de tradizion e o varai simpri agrât ai miei par vêmi fat capî che il rispiet pe proprie identitât al è il prin pas par cjatâ l’ecuilibri e par deventâ citadins dal mont. Jo, magari cussì no, no feveli tant la lenghe furlane, stant che o soi lade vie di zovine, ma i miei a cirin di cjacarâi par furlan a Samuele e lui al capìs e al impare. Cuant che mi inrabii, par esempli, al sa benissim ce che al vûl dî “Vonde”. Il gno cûr al restarà par simpri peât ae mê tiere, chê furlane, e o soi onorade di podê rapresentâle tes competizions internazionâls. Ancje se cumò o soi lontane, o sai che chest al è il gno nît e o speri di podê tornâ a vivi culì, un doman, par respirâ ancjemò l’odôr dal gno paîs».
Tu tornis intune gnot di stelis, il timp di fâ polsâ lis alis te pâs di cjase, prin di tornâ a cjapâ il svol par alçâti simpri plui adalt, viers di chel cîl che al spiete dome di jessi concuistât.
Tu rivis che al è scûr patoc, ca di pôc il tor al batarà un bot. Lis cjampanis a son la prime robe che tu sintis, biel che tu ti svicinis cu la veture. Un dindon di fieste, legri e plen di vite, che cu la so lûs al puarte vie il neri e ti jemple di colôr e di calôr, tai voi e fin dentri dal cûr. Tu smontis e finalmentri tu ju viodis, daûr des bandieris, dai balonuts e dai strissons. A son ducj alì, a spietâti: la tô famee, i amîs e i compagns di cuant che tu lavis a scuele. E po dopo, lis vecjutis de domenie a messe, i sioruts che tu viodevis a passâ in biciclete e i fantats di une volte, che cumò a tegnin par man il lôr canai. Cualchi femenute e jes di cjase in vieste di cjamare, ancjemò inçusside e forsit ancje scaturide, ma i baste vioditi che la sô espression sorprese e mude intun riduç di gjonde. E a son desenis, centenârs e plui lis mans che ti saludin, ti strenzin e ti cjapin a bracecuel e tu tu ti sintis fortunade e onorade, che tu âs cussì tante int che ti vûl ben e, in fin dai fats, la tô vitorie e je ancje un pôc la lôr. Nol mancje cuasi nissun, tu pensis, cuntun grop di felicitât che ti cjape il stomi. Al è in chel moment che tu sintis une bavesele jevâsi de marine par vignî a poiâsi su la tô muse un pêl umide, forsit pal cjalt o forsit pe emozion. E alore tu capissis che ancje il to mestri di un timp al è li cun te e tu jevis il cjâf al cîl, a cirî la tô stele fortunade, chê che ti judarà a vinci la prossime Olimpiade. ❚
Serena Fogolini
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +