Sfuei Mensîl Furlan Indipendent
Archivi de Patrie

Dai roncs laboratoris di biodiversitât a nassin vins “rivoluzionaris”

............

La filosofie dal progjet e va in direzion contrarie
ae viticulture industriâl che e sta cjapant pît in Friûl
cun risits e Prosec

A  son diviersis manieris di fâ bêçs fasint vin in Italie. Une e je chê di fâ tancj ma tancj bêçs, come Gianni Zonin: vâl a dî deventâ il prin produtôr di vin dal paîs cun vignâi e tignudis pe “eno-ospitalitât” ator pe Italie e in Americhe (in Friûl la Ca’ Bolani a Aquilee). E in plui, par aumentâ il vuadagn, fâ il president de Bancje Popolâr di Vicence, gjavantsi un tic prime dal crac (e dopo de ispezion de Bancje centrâl europeane) e intestant, par sigurece, bens e tignudis ae femine e ai fîs.
Une altre maniere e je chê di fâ une vore mancul bêçs, ma avonde di mantignî la famee, fasint un prodot di ponte dal marcjât e vint la cussience nete di fâ ben, par se, pe comunitât e pal ambient. E je la strade sielzude di Lorenzo Mocchiutti e di Federica Magrini dai Vignai da Duline, a Vilegnove dal Judri, une aziende vitivinicule biologjiche nassude une vore in piçul tal 1997 e cressude tai agns in cualitât plui che in dimension, vuadagnantsi un marcjât internazionâl e la stime di passionâts di vin ator pal mont. Cumò i ospits internazionâi a son numerôs, parcè che la aziende e à figurât tal numar di Avrîl di Condé Nast Traveler, la riviste di viaçs de Condé Nast, la cjase editore americane che e publiche Vogue, Vanity Fair e il New Yorker. L’articul al è rivât par câs: il gjornalist al jere lât a gustâ tal ristorant di Antonia Klugmann a Vencò, e al jere restât impressionât de malvasie da Dulina.
I titolârs no jerin partîts cun chê di fâ vin: Lorenzo al studiave medisine e al sunave il bas tai Arbe Garbe, un dai grups plui popolârs de musiche rock furlane dai ultins 25 agns; Federica, une antropolighe culturâl, e insegnave te scuele steineriane di Sagrado. Ma il nono di Mocchiutti al veve une aziende agricule a Vilegnove, che e cjapave dentri ancje doi etars di vignâi, i plui vecjos dal paîs, intune localitât clamade Duline, e al veve bisugne di une man. In realtât, i motîfs par cambiâ direzion a son stâts diviers, comprendûts chel, plui prosaic, di vê un puest par sunâ cui Arbe Garbe, che no vevin une sale provis. Ma ancje chel plui profont di puartâ indenant un percors che Lorenzo al faseve cun Federica di «custodie dal teritori, ancje parcè che ca o sin tal triangul de cjadree, intun ambient une vore menaçât. Za i Arbe Garbe a lavoravin su chei temis, e nô i vin zontât chel de agriculture biologjiche: un at ancje rivoluzionari, viodût che in chei timps di agriculture bio si fevelave pôc».
Il nono Mochiut nol jere convint («al jere une vore di suspiet viers de agriculture biologjiche, chê volte») e di un pont di viste economic a ametin di vê vût un fîl di incussience («a son passâts dîs agns prin che si rindessin cont di jessi imprenditôrs agricui»), ma a disin di vê simpri vût la sigurece di jessi tal just. «Dai agns ’70 – al dîs Mocchiutti – al è stât un cambiament dramatic dal paisaç vitivinicul, parcè che cuant che si è scomençât a plantâ varietâts plui produtivis e a mecanizâ la viticulture in culine, si à gjavât lis vignis vecjis, magari strambis e fatis a man tai secui, e si à cirût cui bulldozers di puartâ la planure in culine. Ma l’impat su la fertilitât dai terens, che e je une robe che si vuadagne in secui di lavôr, al è stât disastrôs. Par che la piere des nestris culinis si sfanti, e i minerâi e microorganisims, lavorant e coltant, a sedin cjapâts sù des lidrîs des vîts, e di li a passedin tal vin, che al à un grant podê di amplificazion de cualitât dal teren, i vûl timp. Clâr che si pues coltivâ intun teren a pene splanât, ma al è come lavorâ tal savalon. O sin a nivel zero. In doi minûts di bulldozer si disfe il lavôr di gjenerazions e si torne a zero».
Tal 2001, ai vignâi de Duline si è zontade la gjestion des vignis di Ronco Pitotti a Manzan, di proprietât di Francesco Valori, il prin a produsi vin biologjic in Friûl. Mocchiutti e Magrini a dan une vore di impuartance ae localizazion puntuâl de vigne e dal vin, ce che i francês a clamin cru, parcè che un vin al è espression de particolâr conformazion e composizion dal teren, e ancje cincuante metris plui inlà la stesse vît no prodûs chel stes vin. Il Ronc, nus spieghin, al è une des pocjissimis culinis a jessi stade sparagnade dal splanament che al à savoltât il paisaç di cheste bande dal Friûl, e duncje il so teren al è une vore preziôs. «Parcè che i vins a son fats in vigne e no in cantine», e note Federica.
La filosofie dai Vignai da Duline, cu la sô atenzion pe organicitât dal teren e la naturalitât te gjestion de plante, e va in direzion contrarie ae viticulture industriâl che e sta cjapant pît in Friûl, par esempli cu la grande espansion de coltivazion dai risits (“barbatelle”), che par jessi certificâts a domandin cundizions di coltivazion di cuasi sterilitât, e un ûs penç de chimiche che al ruvine par agns il teren (si à di ricuardâ che la Italie e je il prin produtôr mondiâl di risits, e il Friûl il prin produtôr talian). Cundut achel, e sta cjapant pît tai ultins agns une ricercje de naturalitât dal vin che, a notin Magrini e Mocchiutti, e je condividude ancje des gnovis gjenerazions di cualchi viticultôr storic.
Il grues probleme, a disin, al è che no je une classe dirigjente che e cjali lontan e cuntune vision juste dal teritori, che e sedi in stât di guviernâ il cambiament: l’invistiment al è dome tai risits e tal Prosec. «Pluitost di valorizâ la nestre ecelence, produsint cru sui nestris miôr terens – e o ’nt vin, di Mugle a Ramandul – si zuie al ribàs. Se nô o rivìn a vendi un tocai a 15 euros, parcè vino di scomençâ a fâ vin a 1,50 euros? Se si passe il messaç che il sisteme Friûl al è inimitabil, e sarà la ecelence a tirâsi daûr il vin di taule. E invezit la mentalitât politiche e je contrarie: e ponte ai numars, suntun teritori che nol pues fâ numars».
«Cumò a stan cirint di irigâ lis culinis, pai cambiaments dal clime e par incressi la produzion. Ma la agriculture di une volte, un vore plui plastiche, e veve la capacitât di gjestî anadis cun clime diferent. Al è il sisteme di cumò – cun alte densitât, pôcs incalms mancul fuarts, plantis une vore sensibilis aes malatiis, terens ruvinâts a fuarce di splanaduris e di diserbants – che al va in crisi pal cambiament climatic. Ma la ricercje par adatâ lis tecnichis di coltivazion no interesse, la progjetualitât a lunc tiermin e je scomude dal pont di viste eletorâl, e invezit si preferìs di spindi 6 milions di euros par fâ un progjet di fatibilitât par puartâ la aghe su lis culinis, come che a àn fat cualchi an fa».
«Cuant che Veronelli, Soldati, a vignivin tai agns ’60-’70 in Friûl e a cjatavin vins sublims, i terens a jerin ancjemò bogns, cumò no son plui. Chei vins che a bevevin lôr su chei terens li no si fasin plui. La soluzion e je chê di acetâ il declin, savint che i vins furlans no son come vincj agns fa e che la int e à simpri mancul voie di beviju, o cambiâ in maniere radicâl». E siere Federica: «Nô furlans si jemplin la bocje cui concets di identitât e di furlanetât, ma no si zirìn daûr se lis aghis di falde a son incuinadis de chimiche o se il paisaç al è colonizât di capanons e centris comerciâi. O resonavi su chest propit îr, cjalant turiscj olandês che a jerin passâts a cjatânus in aziende. O viôt plui maravee, plui amôr pal nestri teritori tai voi dai forescj che a rivin chi pe prime volte che tai voi dai furlans, purtrop».
La aziende agricule Vignai da Duline e je in vie IV Novembre 136 a Vilegnove dal Judri, S. Zuan dal Nadison. Tel. 0432/758115 – e-mail info@vignaidaduline.com ❚
Stefania Garlatti-Costa

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +