INTE RÊT.

eFriûl
La “blogosfere” furlane, ven a stâi la sene dai “diaris a teme” tignûts su la rêt, e je simpri plui siore e, stant che e je puartade indenant di un numar cressint di blogarins, e jemple cun vôs apassionade ogni spazi dal savê. Une biele gnove e rive di bande di “Il prin blog di archeologjie par furlan” (http://archeofurlane.blogspot.com): dopo vê sierât par cualchi mês, al à tornât a vierzi in Zenâr, in gracie dal amôr de sô curadore – “Ninine” di Vissandon –, che e torne a saludâ i letôrs disint “il gno blog mi à mancjât pardabon. La voie di scrivi, di informâmi, di condividi cun altris lis mês esperiencis e lis mês opinions mi àn sburtât a tornâ a cjapâ in man cheste mê “creature”. Juste in timp par fevelânus de scuvierte impuartante di doi scheletris de Basse Ete di Mieç, fate sot Nadâl a Sant Canzian dal Lusinç. Vait a dâi un cuc!
Fûr dal eFriûl
Tes aulis de scuelis primariis, in bande de lavagne, ogni gjenerazion e viôt picjade une cjartine de Europe diferente: il risultât al è che par dute la vite i voi e i cjâfs di chê gjenerazion si usin a viodi la realtât dal nestri continent te forme che e veve cuant si jere fruts. E cussì, tal 2010, te fasse confinarie e je ancjemò int che e va a fâ benzine in “Jugo”. La sioretât europeane in fat di ints e lenghis no je mai stade contignude in chês cjartinis, par chest e je nassude cheste pagjine che us segnalìn: Eurominority (www.eurominority.eu).
A cheste direzion o cjatais un sît che al vûl insegnâ a pensâ a une Europe diferente. Tes sôs pagjinis si puedin lei (in 30 lenghis diferentis, ancje par furlan) e soredut viodi lis informazions di fonde di dutis lis nazions cence Stât e dai popui di minorance in Europe (minorancis nazionâls, culturâls e linguistichis, popui autoctons, grups etnics, areis cun fuarte identitât e cun tindincis autonomistis, indipendentistis e separatistis).
Nassût tal 1999, il sît al è curât di un grup di ativiscj e di apassionâts che a dan il lôr contribût par tignîlu inzornât, sparniçâts par dut il continent ma cun fonde in Bretagne. Il sô fondadôr, Mikael Bodlore-Penlaez, al è ancje chel che al cree e al met sul marcjât, midiant di chest sît, cjartinis e atlants une vore ben fats che a mostrin un mont che al maravee une vore, jessint plui siôr di chel che si pense in fat di culturis e di demografie.
Michele Calligaris