Sfuei Mensîl Furlan Indipendent
Archivi de Patrie

Inte prospetive popolâr al cjate la redenzion dal Uman

Agnul Floramo

Al fo il prin a inacuarzisi che Crist no si jere fermât dome a Eboli, ma forsit ancje a Flumisel

CJANT – Il Popul > Il Popul al è stât il grant protagonist intes discussions dai critics e dai inteletuâi europeans a partî de fin dal ‘700. Tacant di chel grant scjas puartât de rivoluzion francese, cuant che forsit pe prime volte inte storie dai umans la vôs di rabie di chei che prime a forin simpri escludûts de storie si è fate sintî par ogni bande, rivant a cambiâ il mont. E di in chê volte indenant, ducj a àn tacât a discuti di ce che al è chest “corpaccio senza testa”, come che intal Cinccent lu definive Niccolo Machiavelli. Ognidun lu interpretave a so mut, clâr: i Romantics a cirivin la lidrîs ancestrâl intes liendis, lis lenghis, lis tradizions, i cjants, i mîts; Ippolito Nievo lu nasave in chê “ancestralitât” dal paisaç contadin fat di cjistielats, borgadis, fontanis e brigants che, metûts insiemi, a pituravin il so Friûl. Cualchi an plui tart si à tacât a pensâlu tant che une “classe sociâl” definide dal procès economic, il revoc di une “struture” profonde, la espression dal marcjât, part di chel motôr dialetic di oposizions e contraposizions continuis che inte vision di Karl Marx a deventin la suste che e fâs scaturî il pipinot dal disvilup uman. E vie indenant cui “puars tant che biâts” dal Naturalisim, cu la smanie di lâ a cjatâju tes minieris, o tai piçui paisuts di contadins o di pescjadôrs. Un biel mosaic di interpretazions, come che si pues viodi ben. E il Nûfcent al è stât un laboratori ancjemò plui grant: cun chei siamans dal mâl che lu àn evocât, il spirt dal popul, tant che une fantasime paurose vignude fûr dal scûr di une cussience insanganade de Prime vuere mondiâl. Il Popul nazion si stave trasformant in nazionalisim. Cu la sô liturgjie patriotarde di paradis e bandieris, monturis e placis di adunance. Chê fufigne di “ein volk, ein land, ein führer” che il nazisim al copià dal fassisim, declarant vuere a ogni diference considerade un tradiment al “volksgeist”. Il spirt dal popul. Ma come che lu imagjinavin i ditatôrs. Un mostri che al gloteve chê diference maraveose che si fonde su la diversitât. Il model sovietic nol jere tant diferent: il ros de bandiere al scjafoiave ducj i colôrs identitaris intal non di une gnove redenzion. Tatars, Turcmens, Gjeorgjians, Armens e ducj chei altris no esistevin plui: a jerin deventâts sovietics. Ma spes la violence esercitade dal podê e prodûs dut il contrari des sôs intenzions. I studiâts le clamin “eterogjenesi di fins”. E cussì, cuant che il fassisim al mandave i dissidents al confin, su lis monts dai Apenins o tes isulis dal Mediterani, ju obleave a rindisi cont che la Italie come che lôr le vevin imagjinade no esisteve, e cussì nancje i talians. Di chê lezion alì al nas il Neorealisim e une gnove atenzion pal popul come che prime nissun lu veve considerât. E Pasolini ce jentrial? Inteletualmentri curiôs e preparât, al veve ben clare intal so cjâf cheste “prospetive popolâr” che o ai cirût di meti dongje in struc, straçant pôc ingjustri a pet de grandece di une problematiche ancjemò pôc investigade. Salacor al fo il prin a inacuarzisi che Crist no si jere fermât dome a Eboli, ma che probabilmentri al veve fate une polse ancje a Flumisel. E che la lezion magjistrâl de Glesie di Aquilee e jere stade chê di cjapà sù sedimentazions profondis che di cristian a vevin mancul di nuie. A puçavin di pagan, pluitost. E chê puce li i plaseve a Pasolini. Parcè che e jere eretiche, ledrose e contrarie come lui. La campagne furlane e deventave cussì un laboratori di impuartance straordenarie par capî lis dinamichis che a produsin l’imagjinari popolâr, la sô rapresentazion dal mont, chê vison mitiche, epiche, magjiche e contadine che la etnografie e tacave a sgarfâ fûr pardut, propit intai agns daspò de Seconde vuere mondiâl, firmant oparis di une impuartance straordenarie. E che plui tart Pasolini al varès cjapât sù cun passion furiose par imbastî chel mût visionari di contâ il mont, lassant che al sprofondi dentri di une dimension alternative. Rivoluzionarie tal sens etimologjic de peraule: obleâ il timp a mangjâsi la code, tornant indaûr là che la oscuritât dal principi e devente un berli fat di sanc, di eros, di cuarp e di pôre. Dome cjapant sù chê fuarce primordiâl, il popul al varès glotude la societât borghese contemporanie, butant la fonde pe redenzion dal uman. E cussì al firme, intal 1952, “Poesia dialettale del Novecento”; e intal 1955 “il Canzoniere italiano. Antologia della poesia popolare”. Intun ciert sens ancje lui, intant che al scrîf, si cjate in esili. Censurât dal P.C.I., obleât a bandonâ Cjasarse, al torne a pensâ ae cuistion dal popul in fuarce di chê “contaminazion” che la campagne furlane i veve regalât. Un inmagament che no lu bandonarà mai plui. ❚

::::::::::::::::::::::::::::::::::::::::::::::::::::::::::::::::::::::::::::::::::::::::::::

DISCJANT. Nol ricognòs ai furlans il status di “Popul”

Par solit chei che si son ocupâts di popul, dal popul no son mai stâts part. Nievo e la Percude, juste par fâ doi nons, a vignivin fûr di une lidrîs nobiliâr. A cjantavin chei pastôrs e chei contadins che a lavoravin par insiorâ lis lôr fameis, come che a vevin fat intai secui passâts. E di sigûr, ben plantâts cun ducj i doi i pîts inte lôr cundizion di sorestants, no si insumiavin di ciert di cambiâ il mont bandonant i lôr privileçs. Il stes discors al vâl ancje par Pasolini, ma salacor cun cualchi colpe in plui. I critics a son ducj concuardis tal sostignî la discuvierte dal popul furlan, che par Pasolini si madrès cuant che si trasferìs a Rome cu la mari. E il trasferiment sfuarçât al jere stât fat par bandonâ lis cjacaris e lis tristeriis che a Cjasarse si fasevin sul so cont par vie di chê cuistion che aromai e je stade contade, esaminade e studiade avonde par no vê bisugne di altris aprofondiments. O sin tal 1950. La vuere e je finide di cinc agns, so fradi Guido al è muart copât propit tal 1945: un an prime Pier Pauli al firmave i “Turcs” scrits par furlan, e no je une coincidence. Pier Pauli, di profession, al fâs il “disoccupato disperato”, come che lui stes si definìs. Par fâle curte, si fas mantignî di sô mari. In cheste lontanance dal Friûl, al cove la sô riflession linguistiche come un imprest impuartanton par capî la anime dal popul – cussì almancul al somearès – un lavôr atent di dulà che e vignarà fûr une opare mestre assolude tant che “Tal cour di un frut” (1953), curât in maniere significative di Luigi Ciceri, un che si ocupave di etnografie; e un an dopo, “La meglio gioventù” (1954). Al vignarès di pensâ, cuntune leture superficiâl, che cheste atenzion pe lenghe furlane e puedi jessi la strade che e mene Pasolini a inacuarzisi dal popul che le fevele e a valorizâ la sô specialitât. Ven a stâi i furlans. Ma il cuadernut za publicât tal 1948 e che si intitule “Taccuino di un dialettale” le conte lungje sul pinsîr pasolinian. E compagn ancje la racuelte, za citade, che e à come titul “Poesia dialettale del Novecento”. No si inacuarzêso di nuie? Us doi un indizi: la clâf e je dute in chel “dialettale”. E chest al è il pont. E ancje la colpe che no si pues perdonâ. Dialet, no lenghe. Imbastardiment dal talian. No espression di un culture “altre”. Ma dome une variante. Pasolini nol ricognòs ai furlans il “status di popul”. A restin, ancje par lui, cence une identitât definide che nol somee interessât a sclarî. Nô o sin i “Senzastoria”. Al è curiôs dal lengaç, si capìs. Lu cjape sù e lu dopre. Ma il so intindiment al è un altri. E lu pant in maniere clare inte dediche scrite in memorie di so fradi, propit sul tacâ de sô antologjie de poesie popolâr: “A mio fratello Guido, caduto nel ’45 sui monti della Venezia Giulia, per una nuova vita dal popolo italiano”. Cemût? Vino let just? Tornin a controlâ. Eh sì. Pasolini al scrîf propit cussì. E duncje? Venezia Giulia? Popolo Italiano? Ve mo. Apont. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +