Int? Une opzion. I argoments dal notiziari vie pe setemane

Ma ce informazion vegnie produsude al Tgr F-VJ? La atenzion principâl e je pe croniche: tra chê blancje e chê nere a passe il 58% dal timp.
La part dal leon se cjape la croniche istituzionâl: scree dal an judiziari dal Tar, interviste al gnûf prefet di Triest, interviste al cjâf de polizie di passaç a Triest, citadinance onorarie dal comun di Triest a Cristicchi, cunvignis, fieris. Totâl, cuasi 31 minûts. Se o metìn dongje i 18 minûts dedicâts ae politiche, si rive a 49 minûts: la durade di trê Tgr intîrs. La int, o miôr, la societât regjonâl, che po e je chê che e mande indevant la barache? Une opzion. Par chest al va segnalât tant che une ecezion di nomenâ il servizi fat di Romoli sui artesans furlans e la crisi dulà che e ven dade la peraule ai vêrs protagoniscj: i artesans.

La croniche nere e cjape cuasi un tierç dal totâl, ma si scuen dî che la setemane e jere condizionade dal câs di Giulio Regeni. A restin altris 23 minûts di gnovis: si fevele de fieste di Sant Valentin a Udin, de lote cuintri la ludopatie a Triest, de mostre sui avions ae Comina di Pordenon. Part dal leon pal meteo: protagoniste la nêf, tant spietade che i àn dedicât ancje un documentari di pueste. In totâl, 6 minûts e 35 seconts.
Tal setôr politiche, il tormenton de setemane i tocje aes candidaturis pes comunâls di Triest: tal Pd a barufin, cemût si fasial a no fevelândi almancul une butade par tg? Dopo trê dîs, cualchidun al à di vêju visâts che a jerin elezions ancje a Pordenon cussì a son rivâts a meti dentri almancul une code martars ai 16: 7 seconts.
Intal setôr de economie, a van simpri a fuart lis investigazions des organizazions des categoriis e i tocs di caratar gjenerâl. Grande novitât de setemane lis gnovis a mieç tra nere e economie, cui câs Coopca e Bancje popolâr di Vicence: un segn dai timps. Tant che la gnove atenzion pe Fincantieri di Monfalcon: che a vebin voie di tirâle dentri te citât metropolitane? Nus mancje tant la Feriere di Servola…
Inte crisi gjenerâl dal sport, colât al 5,8% a pet dal 9,8% dal 2015, al va in crisi ancje l’Udin, no dome parcè che al piert, ma parcè che al piert fûr cjase, a Gjenue. Ma ancje se al ves vinçût la mignestre e sarès stade compagne. In trasfierte si à di contentâsi. Cinisintule la culture, ferme al 4,5%. Tant che lis promozions dai programs Rai: timp robât aes gnovis par fâsi publicitât. (M. Tos.) ❚