Instalazion di implants: la crisi che e colpìs cence fâ rumôr

A metât strade tra la metalmecaniche e la edilizie, e cun carateristichis in cierts câs assimilabilis aes societâts di servizis, lis aziendis che si ocupin de instalazion di implants a son daûr a vivi il periodi plui neri che al vedi cognossût chest setôr.
I implants che si fâs riferiment a son chei eletrics, termoidraulics ma ancje di videocontrol, telecomunicazion e trasmission di informazions digjitâls. Se la crisi di grande part de industrie des manifaturis e je scomençade intal 2008, pes aziendis di instalazion di implants de Provincie di Udin i prins segnâi a son rivâts intal 2011.
Il 2012 al è l’an li che si è confermade  la gravitât de situazion: tacant dal faliment de JOB IMPIANTI Srl – impuartante realtât produtive cun sessante agns  di ativitât aes spalis – che al à causade la pierdite dal lavôr a di une sessantine di dipendents.
I ven daûr un 2013 là che realtâts industriâls impuartantis tant che la DOME Srl di Martignà e la FC IMPIANTI TECNOLOGICI SpA di Sant Zorç di Noiâr a falissin dutis dôs intal mês di Mai.
La prime, specializade te instalazion di implants di videocontrol, setôr che al someave in cuintritindince fuarte, dulà che a jerin impleâts une cuarantine di lavoradôrs che, di là di vê pierdût il puest di vore, cumò a son impegnâts a recuperâ dal faliment lis tantis mesadis indaûr che a vevin cumulât  e che a van a pericul di pierdi. La seconde, une realtât che di plui di vincj agns e operave inte instalazion di implants eletrics e termoidraulics, dulà che a jerin a vore cincuante di lôr.
In dutis chestis crisis aziendâls il sindicât al à podût ativâ i amortizadôrs sociâi par ridusi il discomut sui lavoradôrs, stant che al è stât pussibil ricori  ae casse integrazion straordenarie e ae mobilitât; struments chescj,  che nol è stât pussibil meti in at  inte plui part dai câs intes  piçulis e piçulissimis aziendis dulà che si  à podût intervignî, cuant che si à  podût, dome cu la casse integrazion in deroghe.
Ancje intal 2014 no si viodin  lûs al orizont. Lis gruessis realtâts produtivis dal setôr a sofrissin ancjemò e a àn di lâ indevant a ricori ae casse integrazion par no pierdi lis professionalitâts dai propris dipendents,  evitant cussì i licenziaments.
Tra lis causis principâls di cheste situazion, insiemi cuntune crisi gjenerâl de edilizie, e je la assence totâl di apalts publics.
Se pes gruessis ditis a son dificoltâts, pes piçulis aziendis artesanis – che no son struturadis par frontâ  grancj volums ma che a son plui sveltis a rispuindi aes esigjencis plui piçulis dal marcjât – lis robis no van miôr.
Intes ditis che a dan di lavorâ a pocjis unitâts di dipendents, chescj –  simpri plui dispès – no vegnin retribuîts par mês e mês, e a acetin la promesse, simpri deludude, di un futûr paiament des mesadis indaûr parcè che a son cussients che no son alternativis di ricolocazion.
Cemût che si viôt, chest setôr, che mai al veve cognossude crisi, cumò al è in plene contrazion e si scuvierç che a son centenârs e centenârs i lavoradôrs che a àn patît e che a van indevant a patî lis consecuencis dal rosari infinît di crisis aziendâls.
Di dut chest, fale in câs sporadics, no si sint a fevelâ, ma ancje chest  al è un fenomen che al contribuìs  a distruzi il tiessût economic e produtîf dal nestri Friûl. ❚
Fabiano Venuti, Operadôr sindacâl FIM-CISL