Sfuei Mensîl Furlan Indipendent
Archivi de Patrie

INCHIESTE. Nus coventin lis scunis plenis

............

Renata Zago: «I ponts nassite a son presidis essenziâi
par sostignî la maternitât»

La sodisfazion e je, dibant dineâlu. Ma ancje grant rispiet e solidarietât par Palme che cumò e va incuintri ae stesse odissee. Renata Zago, par tancj agns a cjâf dal Comitât “Nascere a Latisana” i à crodût fin in fonts, sperant cuintri ogni evidence, e cumò e pues esultâ dopo la sielte de Zonte (validade dal Consei regjonâl) di tornâ a vierzi il pont nassite tisanot. «O vin sostignût simpri che l’ospedâl di Tisane al à di continuâ a tratâ lis emergjencis e lis urgjencis – e sclarìs Zago -. O sin il presidi ospedalîr plui distant di Udin intune zone caraterizade di flus turistics fuarts di Lignan. Di là dal grant valôr simbolic pe nestre comunitât, si salve ancje il repart di Pediatrie. No podevin plui assisti a câs di fruts sbalotâts (magari dome par une disidratazion) di Lignan a Tisane, dopo a Palme par finî magari a Udin o a Triest se a jerin complicazions. I fruts no son pacs postâi. Cumò, i intervents di routine normâl ju podarìn gjestî chi, lassant ai ospedâi grancj dome i câs plui complès».
Su Palme, Zago e je categoriche: «Sierâ un servizi al è simpri une disfate par ducj. Inte nestre lote no vin mai trat su Palme, parcè che nol è just fâsi la vuere tra comunitâts. A son i cjapons di Renzo che si bechin, ma no si acuarzin che ae fin a vignaran mangjâts ducj. Tant che feminis, o metìn come prioritât il fevelâsi, il cjatâ un pont di contat. O sin passâts par li e o capìn la delusion e il sconciert, ma no ciertis robis che a butin pantan su chei altris. La salût no à di vê colôr. Dulà jerial il Pd intai agns passâts? Intervegnial dome cumò che al ven tocjât un so sindic? E i sindicâts? Cheste e je une politiche intindude tant che lote tra bandis e no tant che servizi ae int».
Renata Zago e je convinte invezit che si vedi di invistî su ducj i ponts nassite: «Se no tu dâs servizis aes mamis, lis feminis a son disincentivadis a meti in cantîr un frut. Dutis a vuelin jessi siguris di vê un pont di riferiment di podê rivâ cun facilitât in câs di problemis. Une mame che e lavore o che e à plui fruts e à bisugne di sigurece e di rispuestis concretis. Se o lin daûr dal decret Balduzzi, che al ponte ai mil parts ad an par tignî viert un pont nassite, no son pussibilitâts par nissun in Friûl. A son regulis pensadis par Milan e par Turin, dulà che lis distancis a son minimis, no par une regjon tant che la nestre o par une realtât tant che Tumieç. E dopo, cui lu aial dit che sot dai 500 parts no je sigurece? I piçui ponts nassite dispès a garantissin grande cualitât. La sigurece no je un calcul algjebric, ma la sumatore di tancj fatôrs, tant che la presince e la cualitât dal pediatri e dal anestesist, o un traspuart svelt par rivâ ae Neonatologjie di Udin in câs di complicazions imprevistis».❚
Roberto Pensa

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +