Sfuei Mensîl Furlan Indipendent
Archivi de Patrie

In France e je nassude la Ocitanie

............

Cui 25 di Jugn si à sierade la sielte dai nons de gnovis regjons jessudis de riforme teritoriâl metude in vore intal stât francês, ancje se la ultime peraule i spiete al Consei di Stât che dentri dal prin di Otubar al decidarà se fâ bogns o no i nons sielzûts a nivel locâl. Sîs regjons a àn mantignût i confins che za a vevin e cun chei ancje il lôr non, altris dôs a àn decidût juste di meti adun i nons des lôr parts (Borgogne – Francje Contee, e Alvernie – Rhône-Alpes), intant che la fusion tra Alte e Basse Normandie e à puartât ae nassite di une regjon che nissun al à vût dubis intal clamâ Normandie.
Plui ingredeade la sielte dai nons par chês altris regjons. La union di Alsazie, Lorene, Champagne e Ardenis e je stade batiade Grand-Est, cence nissun riferiment duncje ai nons tradizionâi. Stesse logjiche ancje pe union tra Nord, Pas-de-Calais e Picardie che e je deventade Hauts-de-France. Il leam identitari al è invezit evident par dôs des grandis regjons che a cjapin dentri la part sudocidentâl dal stât francês. La union jenfri Lenghedoc – Roussillon e Misdì – Pireneus e je deventade Ocitanie pirenaiche mediteranie.
La Ocitanie e je une antighe nazion de Ete di Mieç che e cjapave i sud de France par rivâ ancje in Italie. La sô carateristiche principâl e je di jessi fondade su la difusion de lenghe ocitane, o lenghe di Oc, evoluzion dal ocitan antîc o provençâl. Un câs tipic di nazion-non nazion o di nazion improibide: une aree esistente inte realtât, diferente dai cunfins dai Stâts costituîts in maniere legâl li che al è il so teritori.
Il riferiment ae Ocitanie volût de maiorance dai citadins clamâts a dî la lôr sul non gnûf no je plasude par nuie ae diestre republicane e a chê nazionaliste ma al à vût la poie ancje de maiorance dai conseîrs regjonâi che i àn zontât la adietivazion pirenaiche mediteranie par slizerî un tic il so impat. Par contentâ i catalans dal Roussillon si à invezit prometût un impegn concret a difindi lis carateristichis linguistichis e identitariis de Catalogne setentrionâl. De fusion tra Aquitanie, Limusin e Poitou-Charente e je nassude invezit la Gnove Aquitanie, là che l’adietîf al varès di fâ riferiment al gnûf avignî unitari di chest teritori. ❚
✒ Internazionalitari/LPdF

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +