‘In file’ 2013

Come lis stagjons, I Colonos si alternin cui apontaments, e se in Istât o vin Avostanis, in Invier al ven fûr In File.
In File al è la schirie di apontaments culturâi che e ven presentade, in maniere plui intime, dentrivie des salis dal agriturism di Vilecjaze. Chest àn si fevele di resistencis cul titul: Resisti.
Il pinsîr al cor a la Resistence partigjane, ma la rassegne no si ferme dome a chel aspiet, ma, come simpri, lu smiluce, in tancj altris aspiets che a metin adun storie, storie locâl, teritori, culture, lenghis, videos e poesie. Cussì nol pâr fûr lûc cjatâ une serade pensade pal Vajont te persone di Tina Merlin, femine e gjornaliste che, une des pocjis, e veve decidût di resisti al progjet da SADE stant de bande dai contadins che dopo a paiarin cu la vite la svualmenade cinicitât di un progjet falât. Nol par fûr suaze fevelâ di piçui museus che a tegnin cont la memorie, resistint a modei diferents e a une globalizazion che a semplifiche dut. Il percors di Agnul Floramo che al propon di cognossi lis documentazions storichis che a resistin tal timp testemoneant la vite dal Patriarcjât di Aquilee. Ancje chê e je resistence al timp e a la ignorance. Tancj, dut câs i protagoniscj des seradis: des Feminis in Neri di Udin, al za citât Agnul Floramo, a William Cisilino a Paolo Comuzzi e Andrea Trangoni, fint a Vladislav Shabalin, dome par nomenâ cualchidun.
Siet apontaments che a invidin la int a partecipâ a un percors di profonditât e complessitât.
La iniziative dai Colonos si desvuelzarà ogni vinars a partî dali 25 di Zenâr fintramai a domenie ai 24 di Març, juste sul ôr de vierte, timp di sfloridure, vilie di une gnove cuete fate no dome di vuardi e di blave, ma ancje di ideis e di culture di chenti, par un mont curiôs che al crôt tune resistence ative che e cjale denant, savint ce che al stâ daûr te nestre memorie. Ducj i spetacui a scomençaran aes 20.30, cu la ecezion dai 24 di Març che al tacarà aes 3 dopomisdì.
Ogni particolâr dex seradis si pues cjatâlu sul sît web dai Colonos: www.colonos.it.
✒ Mauro Della Schiava