Lu segnale cun preocupazion il Consei de Europe
Di une bande a son lis preocupazions dal Consei de Europe in cont di tutele des minorancis, di dirits linguistics e plui in gjenerâl di discriminazions e di razisim, di chê altre si cjatin la cuistion dal ricognossiment di catalan, basc e galizian tant che lenghis uficiâls intal Parlament European (PE) e chê de difese de decentralizazion de gjestion e de distribuzion dai fonts europeans a pro des regjons. Cussì, intant che la Union Europeane (UE) e je daûr a definî, tra tensions politichis internis e esternis, chê che e ven clamade la sô “governance” pai agns che a van dal 2024 al 2029, al è ancje alc altri che al bol jenfri Strasburc e Brussels.
◆ Ai prins di Otubar stâts il Comitât consultîf dal Consei de Europe che al sta daûr de valutazion de metude in vore de Convenzion pe protezion des minorancis nazionâls al à dât fûr une note là che al segnale che vie pai ultins doi agns, de metât dal 2022 ae metât dal 2024, par ce che al tocje i dirits des comunitâts minorizadis si àn palesât tindincis che a fasin pardabon preocupâ. Cun di fat, lis politichis pes minorancis a son simpri plui strumentalizadis par finalitâts di conflit politic intant che e cres la vision, intes opinions publichis dai diviers stâts de Europe, che e calcole chestis comunitâts e lis lôr rivendicazions tant une probleme e salacor une menace di caratar gjenerâl. L’efiet di ategjaments di cheste fate al è chel che lis personis che a fasin part des minorancis si cjatin a jessi discriminadis e minorizadis inmò di plui, tra stigmatizazion e colpevolizazion.
◆ Ancje cul intindiment di fâi cuintri a cheste ande e cun chê di promovi e di disvilupâ un ambient educatîf là che la diversitât e vene ricognossude e rispietade, il Comitât consultîf in cont de Convenzion pe protezion des minorancis nazionâls al à dât fûr cualchi setemane indaûr une gnove edizion dal Comentari tematic che al tocje i siei contignûts. La publicazion e ponte la sô atenzion in particolâr su didatiche e educazion, dirits linguistics, politichis linguistichis ativis e partecipazion politiche.
◆ Magari cussì no, preocupazions di cheste fate a son stadis palesadis ancje de bande de Comission cuintri dal razisim e de intolerance (ECRI) dal Consei de Europe, che ai 22 di Otubar stâts e à dât fûr il so siest rapuart in cont dal Stât talian, dulà che a vegnin segnaladis la difusion di intolerance e prejudizis e fintremai pratichis di profilazion, di discriminazion e di abûs metudis in vore de bande des fuarcis dal ordin a dam di imigrâts, rom, sinti e personis lgbt+ e si vasin indenant aes autoritâts talianis cuindis racomandazions cun chê di mudâ in miôr cheste situazion.
◆ Par intant il ministri pai Afârs forescj e pe UE dal Stât spagnûl, José Manuel Albares, ancjemò ae fin di Setembar stât, al veve tornât a scrivi ae presidente dal PE, Roberta Metsola, in cont dal ricognossiment di catalan, basc e galizian tant che lenghis uficiâls de assemblee. Ancje in rispueste ae gnove iniziative dal guvier di Madrid, Metsola e à dât la incarghe al grup di lavôr in cont di lenghis e servizis linguistics de presidence dal PE di fâ un studi par valutâ l’impat economic, organizatîf e gjestionâl di chel che al sarès l’ûs di chês lenghis inte ativitât plenarie de assemblee. Al è probabil che a coventaran mês par cognossi i risultâts.
◆ Tra Strasburc e Brussels, vie pes ultimis setemanis, si fevele ancje di programs e fonts europeans a pro des regjons. Al somee che la Comission e vedi chê di centralizâ la lôr gjestion, stramudant che che cumò a son 530 programs specifics in vincjesiet fonts, daûr di un rapuart che nol sarès plui chel tra UE e autoritâts regjonâls ma ben chel tra la Comission e i guviers statâi. Cuintri di cheste pussibilitât e à cjapât posizion la Aleance Libare Europeane (ALE), il partît politic a nivel europrean che al ten dongje la plui part des fuarcis regjonalistis e nazionalitaris, marcant che une sielete di cheste fate ur fasarès cuintri ae comunitâts teritoriâls e al ûs concrêt e diret di chês risorsis.
❚
