Il Valhalla di Pinçan, dulà che i todescs a segnavin l’ultin confin dal Mont

Vêso voie di cjatâ un biel puest che nus conti in maniere clare e precise la “italianitât” de provincie di Pordenon? Un esempli clâr e ancje evident che dut, ma propit dut, al declame, al cjante, al sublime la filiazion culturâl, estetiche, sociâl, antropologjiche di chest teritori cu la Nazion e la Patrie che si ricognòs intal tricolôr di Rome, e che, “benedicamus!”, e mandarà milions di becins pes celebrazions dal prossim an? O soi sigûr che il Comitât che al sta lavorant pe promozion di cheste imprese lu zontarà cence dubi tes propuestis di pandi ai tancj turiscj che a varan voie di bati lis mans a “Pordenon, Capitâl de Culture taliane”. Perdonaitmi la ironie, ma aromai, in chest senari disvuedât di ogni cussience e spirt critic, nus reste dome chê. Oltri che la vergogne. Duncje: nol covente lâ tant lontan. Baste passâ il puint di Pinçan, propit sul confin de provincie di Pordenon. In sumis, daûr di cjase mê, che o stoi ingrimpinât sot dal Cjistiel di Borc, là che e svolave la bandiere dai Eppenstein. Al ven fûr de cime di un cret di clap, strenzût intun cjampâl di bosc. Si va indevant, une curve daûr di chê altre, e propit cuant che al pâr di podêlu viodi in dute la sô magnificence grande e severe, al svanìs. Cussì ti somee di jessiti dome insumiât. Un efiet curiôs, che za ti introdûs intal cjamp dal Mît, ben lontan de cuotidianitât ordenarie che magari cussì no nus scjafoie. Il trampulin di piere indulà che al è stât costruît plui di cent agns indaûr, al va in fûr tal nuie, viers la largje valade dal Tiliment: un lamp di lûs clarissime. Bielece assolude. Nuie ce dî. Il puest al è un dai plui biei dal Friûl, se no altri pe visuâl che si piert in lontanance. Lis muraiis grisis di chest templi pagan a son lis unichis custodis di tante bielece.
◆ No si fevele di une fuartece, e nancje di un cjistiel, ancje se di lontan e je propit cheste la idee che la potente struture e da al viandant che al incrose il so profîl. Si trate di un ossari, o forsit ancje alc di plui. Al varès vût di meti adun e custodî i rescj di ducj chei soldats gjermanics, todescs e austriacs-ongjarês (cirche trente mil, une cifre pardabon impressionante) che dopo de bataie di Cjaurêt (Kobarid), a son muarts culì, su lis rivis dal Tiliment, intune schirie di scuintris tra i plui sanganôs dal prin conflit mondiâl, consumâts cuntun cost di vitis umanis alton, fra Otubar e Novembar dal 1917. Su chest rampon che al monte viers la strente di un spazi cence fin, il lôr spirt al varès vût di fâ la vuardie come une sentinele wagneriane su la bielece sacre di chescj lûcs.
◆ E cussì ae fin o rivìn a capî ce che al è. Par jessi precîs, al è un “Totenburg”: un cjistiel de Muart, te traduzion plui semplificade dal tiermin. Une tradizion che si fonde inte mitologjie gjermaniche, e che e conserve il savôr des aghis antighis cjantadis memoreant l’anel dai Nibeluncs, e Sigfrît. Duncje, come che si diseve, tant plui di un ossari o di un mausoleu. Un lûc une vore simbolic, cjariât di rivocs culturâi bogns di fondâ lis lôr lidrîs intun imagjinari coletîf fat di rituâi antîcs, e bon ancjemò vuê di regalâ sugjestions che a metin i sgrisui ancje a noaltris, modelâts e cressûts tai alfabets culturâi dal tierç milenari. Secont i studiôs di storie de architeture – par fortune o par disfortune in maiorance vignûts des universitâts di fûr, a dimostrazion dal fat che la Italie no rive mai a jessi ae altece dal so patrimoni culturâl, soredut cuant che al riscje di contâ une storie diferente di chê “uficiâl” – la memorie dal Nûfcent in Gjermanie e je sbregade insot fra la necessitât di ricuardâ i siei muarts e il pês di une disfate profonde. Cuant che il prin conflit mondiâl al finì, la classe politiche che e vuidave le Republiche di Weimar e sintì une vore a fuart la necessitât di dâ une sepulture onorevule ai cuasi doi milions di muarts che i lôr rescj a jerin stâts bandonâts, dispès vues cence memorie fra claps e boscam, in ducj i senaris di vuere plui crudêi che a savoltarin la Europe di chel timp, cuant che i fradis, come che bisugnarès sostignî e berlâ cuintri di ogni bandiere nazionalistiche, si coparin cuintri dai lôr stes fradis, massime chi di noaltris in Friûl, dulà che i furlans, come che si sa, a vistirin la monture taliane e regnicule e altris furlans chê altre, dal Imperadôr di Viene.
◆ Par recuperâ la memorie di chei muarts in vuere al ven istituît il “Volksbundes Deutscher Kriegsgräberfürsorge” (Associazion dal popul todesc pe cure dai cimitieris di vuere) cul rûl di progjetâ e duncje fâ sù monuments che a ricuardassin il lôr sacrifici. La intenzion culturâl di fonde e jere che di scjampâ dal glimuç ingomeant de retoriche che invezit a caraterizarin operazions compagnis fatis tal stes timp dal guvier talian, aromai indreçât su la sensibilitât fassiste. In Gjermanie invezit a forin propit lis avanvuardiis – che la lôr vôs si fasè simpri plui clare e fuarte fra i inteletuâi di Weimar – a dâ une gnove sensibilitât al progjet. Une mission sburtade a partî dal 1926 di un gjeni assolût de architeture moderne: Robert Tischler. I critics a concuardin sul fat che si scugnarès fevelâ, plui che di ossaris o di mausoleus, di Totenburgen, come che o vin dit. A vevin di rapresentâ alc di plui di un sempliç memoriâl di vuere.
◆ La posizion ad alt, lis culinis o i crets di clap dulà che a jerin fats sù lis lôr muraiis severis, la stesse orientazion viers l’ultin confin dal Mont, dulà che i rais dal soreli a van a colâ, il ream dai Muarts, tant che tai profîi e tes formis imagjinadis dal pitôr svuizar Arnold Böcklin, inte sô une vore innomenade “Isule dai Muarts”: insome dut al veve di evocâ une sensibilitât antighe. I muarts sul cjamp di bataie, deventâts cussì erois, a vegnin trasfigurâts tal sanc e tal onôr, tal spirt stes de “Heimat” dulà che al svolave, scûr, fuart e sidiât di sacrifici, il podê assolût dal “Volksgeist”, il spirt dal popul, che si nudrive di mîts antîcs, vecjos e barbarics. A dut chest al rispuindeve benon la idee di un “Totenburg”: la fuartece de muart. Il cult de muart tormentade e duncje eroiche in bataie. I erois, colâts combatint, te mitologjie nordiche e norene des origjinis, a jerin cjapâts sù, come che si sa, des Valchiriis, che a planavin in svol, a imbraçavin i lôr spirts e ju menavin tal zardin florît intune Vierte cence mai fin, tal Valhalla. In sumis, un puest propit biel di lâ a viodi te provincie di Pordenon, par tastâ le profonde italianitât di chescj lûcs! ❚